John 12

Maria Jisas kake al kopong ye awi

(Matyu 26.6-13 ne, Mak 14.3-9)

Kune ge ege 6-pela wo er pundaka, ege kerman Pasopa we dji ge yenda paika, Jisas er Betani pi. Betani ge Lasarus dumoye yei. Lasarus ge Jisas i gun wori iwa. Moi al una Jisas kwa kerman gale aumaka, une wo moi. Marta kwa gale iwo awika, Lasarus ge Jisas boll aike moika, ga boll kwa no moi. Kwa no molmaka, Maria kopong ku kerman boi nume tuge ta iwo Jisas kake al kopong yei. Ge mirang wopake kaima yeika, ga porapora numog moi ge pi. Pillmaka kopong yei ge, Maria yene ngambale ene i kill gulo woro embe ye moi. Ba Jisas kogoye una Judas Iskariot, Jisas i kunda yem una aunda iwa ge, une embe dji, kopong ge nono i ku bolo ku gol silpa tri andret (300)
ku yero ge una kogo ye top i nonjka kognumb taimane dje er wo pundo mal ge ku kerman embe yei we dji.
iwo una wal kane nanoi una mor aupinka kune yeika, ba ana yendo ge kune nayendo we dji.
Une kandja embe dji ge una wal kane nanoi una wopake moye dje pille nadji, une kunumb noi una moi. Ga ku bokisne yei ge une kantau ye, ku ge i nono yei.

Jisas embe dji, ni djinden ge kere! Ana kopong yendo ge, are na goyaka una na gull tane dje pille yendo. Una wal kane nanonj una mor ge ege ege ye boll moye ba, na ege ege ye boll namoyo we dji.

Opa gale awi una Lasarus to gopon we dji

Juda una merke Jisas kanbon dje woi ba, pende Lasarus golo agi iwa ge kanbon dje woi eri. 10 Jisas Lasarus yei mal ge Juda una merke kane opa gale awi una mop awo, Jisas boll pillgi dji. Embe pille, ga Jisas to gopon we dji al ge Lasarus boll aike tambon we dji.

Jisas king mal molo er Jerusalem pakna pi

(Matyu 21.1-11 ne Mak 11.1-11 ne, Luk 19.28-40)

12 Kam tagika una Jisas er Jerusalem wondo we djimaka, una merke ege kerman kwa nambon dje Jerusalem wo moi. 13 Ga iko ta kandjiye pam we dji ge, po ole amblo buko dje i, Jisas woi al yau to embe dji, God iwa kerman moyambe! God dje wori Israel una kingne wondo ge, God ye wopake ye aundambe! dji. 14 Djimaka Jisas kog dogi kop ta ap to ipi ge, God kandjiye Baibel al bolo wori pai ge embe djindo, 15 ye dumo Saion una porapora mor ge kand nagolme! Ye kingne kog dogi kop ta ap to iwdo! we dji. 16 Una yau embe toi ge, Jisas kogoye una pillpol natoi. Ba, are Jisas aglo er wo gun pi, yene kandjiye kerman pai poke ge, una wo Jisas moi al embe yei ge, kandja Baibel al bolo wori pai ge megye toi, kani.

17 Asa Lasarus goika, Jisas i gun wori kani una kandjambe tomaka una pi. 18 Une er Jerusalem wono dje yeika ga po kondwe tabye molo kani. 19 Parisi una kane yenekne kandja embe dji, pir mo? Wal porapora yembon dje yepin ge man paro. Une pundo al ge una porapora are pinj we dji.

Grik una pende Jisas kanbon dje pi

20 Ege kerman yei kune ge, una er Jerusalem wo moi ge dumo Grik una pende wo moi. 21 Pilip Galili paknato dumo Betsaida moi iwa ge une moika, Grik una wo embe dji, iwa kerman, no Jisas kanbonba dji. 22 Djimaka Pilip po Endru moi al djika, soka po Jisas moi al dje aupill. 23 Dje aupillka Jisas soka mopill al embe dji, Una Wombe kandjiye kerman panda ege ge ipon yero. 24 Na kandja kaima dje ye aundo, wal wit megye yage kal makimb al to nagoi dal, megye natonda ba alla, yage kal to goya ge megye merke tonda. 25 Una yenekne pille pla ye moye ge, goye ba, alla una makimb al wane moye mal, ke pille awi dal, gun molo pane. 26 Una ta na kogena yembon dje piye una ge, na puno al ge are pine. Na po moyo al ge, ga wo na boll aike moye. Una na kogena ye moi dal, na Nena ga kandjine amblo pla worda, kandjine kerman panda we dji.

Una Wombe amblo pla worne

27 Ipon na nomana paknato ge imb kerman paro. Nena, wal na boll wono dje yendo ge ni i worben. Na kamang embe yeno ba kune nayenda. Na dje worin woll ge wal embe mal na boll wonda dje pille dje worin woll. 28 Nena, ni kandjin ge kerman pandabe! dji. Djika God kupill al molo embe dji, na yell kandjina kerman pai pora dji, alla ye wornaka kerman kaima panda! we dji. 29 Djika una aglo moi ge pille embe dji, kam kal dji paro we dji ba, una pende embe dji, tau agelo une moi al ge ta wo dji paro we dji. 30 Djimaka Jisas embe dji, na Nena kandja ipon djindo ge, na pille nadjindo, ye pille djindo we dji. 31 God makimb una singare ta yene mal omuk tonda ege ge, ipon yero. Iwa makimb una kantau yendo iwa ge, God to kamblo kal woro kerda. 32 Ipon na makimb al wondo ba alla, are una na amblo pla worne kune ge, na una porapora dje i pakna wornaka, nanam moro al moye we dji. 33 Une kandja embe dji ge une goya mal pille dji.

34 Djika una merke molo embe dji, God lo dje awo Baibel al bolo wori pai ge no kere kanpin, iwa Krais wonda we dji ge une nagoya, molo pa moya ba, ni djinden ge, una wo Una Wombe amblo pla worne we djinden ge, me namba mal pai pille djinden? Una Wombe ge una ne mal ne? dji.

35 Djimaka Jisas embe dji, wamo suwa do au djindo al ge ye boll ege tuge ta djinda. Ye au djinda al ge wane moye. Man panda, emill ge wo ye to bi djindaka, ye abillabill ye wane moye. 36 Wamo suwa do au djindo, we djindo ge, ye pillgi dje molme! Ye embe yei dal, ye wamo suwa wombaye moye we dji.

Juda una merke Jisas boll pillgi nadji

Jisas kandja embe dje kere, una merke moi ge une kere po seke pa moi.
37 Une kogo dongall merke yei, una ge kani ba, pillgi nadji. 38 Kambono yei mal ge propet Aisaia asa pepa boi mal ge megye toi. Une pepa bolo embe dji,

Iwa Kerman, no ni kandjin dje pene worpin ba una napi.
God iwa kerman kogo dongall yei ba una nakani we dji. (Aisaia 53:1)
39 Baibel kandja embe dji pille kambono pillgi djine napai. Una embe yei ge Aisaia pepa ta boi ge embe dji,

40 God kambono nalene al ge amblo pel ye,
nomane amblo bi dje awi.
Na embe nayellka kambono nalene al wal kanpol to,
pillpol to, nomane ake tomaka,
na i gun worillka we dji. (Aisaia 6:10)
41 Aisaia asa pepa boi ge, Jisas kandjiye kerman pai kani pille une pepa embe boi. 42 Juda una kerman merke Jisas boll pillgi dji ba, Parisi una no lotu numb to orko worne pa djindo dje pille, Jisas boll pillgi dji ge dje pene nawori. 43 Ga embe yei ge ga kandjine amblo pla worne dje pille yei, God amblo pla worda dje nayei.

Jisas kandja dji ge una singare yene mal omuk tonda

44 Jisas yau to embe dji, una na boll pillgi djinj una mor ge, na taimane pillgi nadjinj, na Nena dje wori woll iwa ge pillgi djinj. 45 Una na kaninj ge, na dje wori woll iwa ge boll aike kaninj. 46 Na makimb al woll ge wamo suwa mal embe woll. Una na boll pillgi djine ge, emill yenda al po djine dje pille woll. 47 Na kandja djindo ge una pille nayei dal, na jas mal embe namoyo, na kot piyo dje pille nawoll, na makimb una i yem worno dje pille woll. 48 Ba una ta na we dje pille mop awo, na kandja djindo mal nayei dal, ege pora djinda kune ge, kot al pineke jas ta moya. Na kandja djill mal ge yene jas mal embe molo kot djinda. 49 Na nomana pai mal ge na kandja dje ye naundo, na Nena na dje wori woll iwa ge une kandja dji mal ge pille na dje ye aundo. 50 Na kando, une kandja dongall dji ge una gun molo pane dje pille dji. Embe pille, na kandja djindo ge na Nena kandja dje na awi mal ge pille djindo we dji.

Copyright information for `GAM