John 13

Jisas kogoye una kakene al was ye awi

Ege kerman Pasopa manda yeika, Jisas kani yene makimb al moi ege ge pora dji, er Ne moi al punda manda yeika, yene unakye makimb al moi ge une kamasa kane wopake kani mal, ipon une goya ege manda yeika pille, une ga kane wopake ye pa moi.

Olpa er kal puno dje yeika, kambono kwa no molmaka, Saimon Iskariot wariye Judas moi ge, Satan asamoll une kamale toika, Jisas i kunda yem una auno dje pille moi. Jisas kani Ne ge wal porapora i yene agle al wori. God makimb al dje wori, er yem God moi al puno dje yei ge, une kane kune yei. Ge pille, kambono kwa no moi al ge, une aglo molo konkunom momo wori ge, gulo kal woro, kon taul ta i yale pagle, nu kolo i kuiamb al woro i, kogoye una moi al kakene al was ye awo, kon taul yale pagi ge i kill gulo woro awi.

Po Saimon Pita kake al was yeno dje yeika, Pita embe dji, Iwa Kerman, ni na kakena al was ye auno dje yenden mo? Djika Jisas embe dji, na ipon manda yendo ge, ni pillpol natonden ba, are ni pillpol tamben. Djika Pita embe dji, ni na kakena al nu was ye naumben, man we dji. Jisas embe dji, na ni kaken al nu was ye nawill dal, ni na kogena una namopen. Jisas kandja embe djika Saimon Pita embe dji, Iwa Kerman, ni na kakena al nu was ye aumben pandaka, na kakena al taimane ge nu was nayemben, aglena ne, ngambalna ge, boll aike nu was ye aumben we dji. 10 Djika Jisas Pita moi al embe dji, una gaklene al nu was ye awi dal, alla nayene, kakene taimane ge nu was yeneke djengimb napanda, kiwa moye. Alla, ye mor ge, djengibne pai pora dji ba, iwa taimanta djengibye ge pa moro. 11 Ye porapora djengibne pai pora dji ba, iwa taimanta djengibye pa moro we dje Jisas embe dji ge, iwa ge une i kunda yem una aunda dje pille dji.

12 Jisas ga kakene al nu was ye awo kere pagle, une kon momo alla i woro, ami dje molo embe dji, na ipon ye kakene al nu wordo ge ye pillpol tonj mo? 13 Ye na we dje kandja embe djinj, une nono tisane moro, nono iwa kerman moro we djinj. Ye kandja kune djinj, na wale moro. 14 Alla, na ye Iwa Kerman moro, ye tisane moro pille, na ye kakene al nu was ye nauno mal paro ba, na ye ombine dje aundo. Ta ye molo una ta kake al nu was ye aundaka, ta ye molo ta kake al was ye aundaka embe yene dje pille yendo. 15 Na wal su ye aundo. Na yendo mal ge, ye embe yene dje pille yendo. 16 Na kandja kaima dje ye aundo, iwa kerman kambono mor ge, plato mor, ga boine ge kal to mor. Una kandja sigye dje worinj una ge, plato mor, ga dje wori pinj una ge kal to mor. 17 Na ipon kandja djindo ge, ye kaninj. Ye pille yei dal, ye wopake piye. 18 Na kandja djindo ge ye porapora pille nadjindo. Na dje ido una mor ge na kando ba, God kandjiye Baibel al bolo wori pai ge megye tonda dje pille na kandja embe djindo,

Iwa ta na boll aike kwa nopill iwa ge, yene kake i pla woro na tano dje yei we dji.
19 Ipon na kandja dje ye aundo ge, megye natondo ba, are megye tonda. Toi dal, ye na wale wondo we dje pillgi djine. 20 Na kandja kaima dje ye aundo, na una dje worna pineke una djembon to awi dal, ga na we dje pille djembon to aune. Una na we dje pille djembon to aune ge, na dje wori woll iwa ge pille djembon to aune.

Judas Jisas ipo kunda yem una awi

(Matyu 26.20-25 ne, Mak 14.17-21 ne, Luk 22.21-23)

21 Jisas kandja embe dje kere, yene nomane urup kerman paika, une kandja embe dji, na kandja kaima dje ye aundo, ye una mor ge, iwa taimanta na kunda yem una aunda we dji. 22 Djika yene kogoye una yenekne kane, ge una ne mal pille djindo ne dje pi. 23 Jisas kogoye iwa taimanta moi, Jisas une wopake kane kane yei. Iwa ge Jisas moi al yage gone al pai. Paika Saimon Pita sing to pagle embe dji, 24 ge una ne mal pille djindo ne? dji. 25 Djika iwa ngambale Jisas gone al woro moi iwa ge, embe dji, Iwa Kerman, ni una ne mal pille djinden ne? dji. 26 Jisas embe dji, iwa ta kwa nuye moya al ge na kwa i to bale auno iwa ge, une ge wale moya we dji. Une kandja embe dje kere, kwa nuye moi al to bale i, Saimon Iskariot wariye Judas ge awi. 27 Ika Satan er Judas tukye al er pakna pika, Jisas une moi al embe dji, ni yeno dje pren ge ola dje yeye dji. 28 Jisas kandja embe dji ge, kwa no moi kambono ge pillpol natoi. 29 Judas ku megye bokis kantau yei pille ga embe dje pi, Jisas kandja djindo ge, Judas po ege kerman yenda al kwa top tonda dje pille djindo mo, mo une ku megye ipo una wal kane nanonj una aunda dje pille djindo ne dje pi. 30 Judas kwa i pagle, ola dje er bekle emill yei al pi.

Jisas kogoye una moi al kandja lo kindja dje awi

31 Judas er pika Jisas embe dji, ege ipon manda yero ge Una Wombe kandjiye kerman pai pora djindo. Une kandjiye kerman paro ge alla God kandjiye aike kerman paro. 32 God kandjiye kerman panda ge, Una Wombe kandjiye amblo pla wordaka, kandjiye kerman panda, alla une embe yenda ge, ola dje yenda. 33 Wombana kambono ye mor ge, ege kembis ta molo ye na we dje pille dulo wone ba, na Juda una kandja dje awill mal ge, na ipon kandja ge dje ye aundo, na er puno al ge, ye are wone kune nayenda. 34 Na kandja lo gun ta dje ye aundo, ye yenekne mor al taimantaiman dje kane wopake yeme! Na ye kane wopake yendo mal ge, ye yenekne kane wopake ye molme! 35 Ye yenekne kane wopake kani dal, una porapora embe dje kanne, ye Jisas kogoye una kaima mor dje kanne we dji.

Jisas embe dji, Pita, ni na mop aumben we dji

(Matyu 26.31-35 ne, Mak 14.27-31 ne, Luk 22.31-34)

36 Djika Saimon Pita embe dji, Iwa Kerman, ni er nam punden? Jisas embe dji, na er puno al ge ni na boll nawomben ba, are ni na boll womben we dji. 37 Djika Pita embe dji, Iwa Kerman, na ni boll nawono we djinden ge me namba mal pai pille na nawono? Una na tane ge pora, na ni pille goyo we dji. 38 Djika Jisas dji mal, ni na pille gopen mo? Na kandja kaima dje ni aundo, ni kune sokara na nakando we djimbenka, ka kondwale yau tonda we dji.

Copyright information for `GAM