John 16

Na kandja embe dje ye aundo ge, ye na mop awo djine dje pille djindo. Juda una ye lotu numb dje orko worne. Are ege ta yendaka una ye to goi dal, no God kogoye pai mal yepin we djine. Una embe yei dal, ga na Nena boll kanpol natane dje pille yene. Asa na ye boll moll kune, ga wo embe yene we nadjill. Ba una embe yene mal pai pille, na ye pille kane yene dje djindo.

God Murble ge kogo yendo mal Jisas kandja djindo

Ba ipon na dje wori woll iwa moro al ge puno, alla, ye porapora na er nam punden ne dje ge ta nadjinj. Na er puno we djill ge, ye nomane al urup dji. Ba na kandja kaima dje ye aundo, na er puno ge, ye wopake moye dje pille puno. Na er napill dal, ye pak to aunda una nawonda. Ba na er pill dal, na dje wornaka une ye moye al wonda. Une wo makimb una moye al kandja dje aundaka ga pillpol tane, singare ke me ge ne, singare wopake me ge ne, God nono kot ye aunda ge pillpol tane. Singare ke me we djindo ge, ga na boll pillgi nadjinj pille djindo. 10 Singare wopake me we djindo ge, na er Nena moro al punaka ye na nakanne pille djindo. 11 God una kot ye aunda me ge, embe paro, makimb una kantau yendo iwa ge God dji pora dji, une er wamo al punda.

12 Na kandja merke ye dje auno dje pro ba ipon ye pille ine kune nayendo. 13 Ba God Murble kandja kaima djindo una ge, une wo ombine dje aundaka, ye kandja kaima porapora kane kune yene. Une wo kandja djinda ge yene nomane paro mal nadjinda, God kandja dji pi ge wo djinda. Wal are wonda mal, une kandja embe dje ye aunda. 14 Na kandja dje une auno mal, une kandja ge dje ye aunda. Djindaka, na kandjina kerman panda. 15 Na kandja dje une aunaka, une pille ye dje aunda we djindo ge, na Nena wal porapora yero ge na wal moro pille djindo.

Una ellne tukne ke paro ge alla are arngan yenda

16 Ege tuge ta er wo pundaka ye na nakanne ba, are ege tuge ta er wo pundaka ye alla kanne we dji. 17 Djika kogoye una pende yenekne kandja dje embe dji, ege tuge ta wo er pundaka ye na nakanne ba, are ege tuge ta er wo pundaka ye alla kanne we djindo ge, namba mal yei pille djindo? Alla, na er Nena moro al puno we djindo ge, namba mal yei pille djindo? 18 Ege tuge ta wo er punda we djindo ge me namba mal paro? Une kandja me embe mal djindo ge no pillpol natonmon we dji.

19 Kogoye una kandja dje pupon dje molmaka, Jisas kane embe dji, ege tuge ta er wo pundaka, ye na alla kanne we djill ge, ye na dje pupon dje yenj mo? 20 Na kandja kaima dje ye aundo, ye kimb kallgane yene ba, makimb una wo pille moye. Ye ellne tukne ke yenda ba, are arngan yenda moye. 21 Ana womba kuyo dje yenda ge, gakle ngembill yenda ba womba kuyaka, gakle ngembill yei ge, napiya. Womba ta makimb al moi dje kane wo piya. 22 Embe mal ge, ipon ye ellne tukne ke yendo ba, are na wo ye kanno kune ge, ye wo piye. Ye wo piyeke, una kamblo kal worbon dje yene ge kune nayenda. 23 Ye na alla kanne kune ge, ye na moro al wal imbon dje nayene, man. Na kandja kaima dje ye aundo, ye na kandjina al na Nena kamang yei dal, wal porapora ye djine mal une ye aunda. 24 Asa ye kamang embe nayei ba, ipon na kandjina al kamang yeme! Embe yei dal, ye wal djine mal aundaka, ye ellne tukne arngan yenda.

Makimb wal yembe pai ge Jisas kamblo kal wori

25 Jisas embe dji, na kandja dje ye aundo ge, kandja buko eri djindo ba, are na kandja buko nadjino, na Nena moro mal dje pene wornaka ye piye. 26 Kune ge, ye na kandjina al kamang yene. Na ye pille Nena kamang ye nauno, man 27 na Nena yene ye wopake kando. Ye na wopake kaninj, God na kaima dje wori woll ge, ye pillgi dji pille, une ye wopake kando. 28 Na Nena na dje wori makimb al woll, alla ipon na makimb al kere er yem Nena moro al puno we dji.

29 Djika, kogoye una embe dji, aya, ipon ni kandja dje pene worden, kandja buko ta nadjinden. 30 Ni wal porapora kane kune yenden mal ge ipon no kane kune yenmon. Una ni boll kandja dje piye kune nayendo. Ge pille no kanmon, God ni dje wori won we dji. 31 Djimaka Jisas embe dji, ye ipon pillgi djinj mo? 32 Ege ta yenda we djill ge ipon yero. Una wo ye to worneke, ye er dumene al djelldjell po kerne. Nanam moyo ba, nanam kaima namoyo, Nena na boll moya. 33 Na kandja ipon djindo ge, ye na we dje piyeke, ye ellne tukne arngan yenda dje pille djindo. Ye makimb al moye ge, imb kake moye ba, kand nagoye. Makimb wal yembe pai ge, na kamblo kal woro kerill we dji.

Copyright information for `GAM