John 18

Judas Jisas i una awi to kaye toi

(Matyu 26.47-56 ne, Mak 14.43-50 ne, Luk 22.47-53)

Jisas kamang embe ye kere, une kogoye una boll er nu Kidron konato po iko olip mau ta yei al er pakna pi. Iko olip mau ge Jisas kogoye una boll kune merke pi pille, Judas Jisas i kunda yem una aunda iwa ge kani. Embe pille Judas po ami una ne, opa gale awi una kerman ne, Parisi una yenekne eine dji womaka, une ga boll aike po wamo suwa gale i, dje bainat amblo er iko olip mau pakna pi.

Pumaka Jisas wal pillau djinda wal ge pille kane ye embe dji, ye una ne mal pille kro wonj ne? dji.

Djika kambono embe dji, no Nasaret iwa Jisas ge pille kro wonmon we dji. Djimaka Jisas embe dji, na wale moro we dji. Una merke wo moi al ge Judas, Jisas i kunda yem una aunda iwa ge une para pakna aike aglo moi. Jisas, na wale moro we djika, kambono mop mop kill po yage makimb al pai. Pamaka Jisas kandja alla dje embe dji, ye una ne mal pille kro wonj ne? dji. Ga embe dji, Nasaret iwa Jisas ge pille kro wonmon we dji.

Djimaka Jisas embe dji, na dje kerill, na wale moro. Ye na pille woi dal, na kogena una dje worneke er pineke, ye na taimane ine we dji. Jisas embe dji ge, une kandja asa dji mal megye tonda dje pille dji. Une kandja embe dji, Nena, ni na awin kambono ge, na kantau yell, ga porapora wopake mor we dji.

10 Alla, Saimon Pita bainat pagi ge amblo us dje i toika, iwa Malkus we dji ge une kamale wokill bolo baske to wo er pi. Malkus ge opa gale awi iwa kerman boiye iwa moi we dji. 11 Ba Jisas Pita moi al man dji, ni djein bainat i gulo woro pagle! Na Nena na kap awi ge, ni na nanano dje pille yenden mo? dji.

Una Jisas dje ipo Anas moi al pi

12 Jisas kandja embe djika, Juda una eine ne, ami iwa kerman yene ami una boll wo Jisas to kaye to ipi. 13 Asamoll ga Jisas dje i er Anas numbiye al pi. Iwa Anas abore ge Kaiapas i, alla kognumb ge Kaiapas opa gale awi una kantau ye moi we dji. 14 Nono Juda una porapora gopon kune nayendo, iwa taimanta nono pille goya we dji iwa ge Kaiapas dji.

Pita na Jisas nakando we dji

(Matyu 26.69-70 ne, Mak 14.66-68 ne, Luk 22.55-57)

15 Una Jisas dje i pi al ge Pita ne, Jisas kogoye una ta aike are pupill. Una Jisas dje ipo opa gale awi iwa kerman numbiye gull pai al er pakna pi. Jisas kogoye iwa ta ge, une opa gale awi iwa kerman kane yei pille, Jisas dje i pakna wori al ge, une aike pakna pi ba, 16 Pita gull djillake orko aglo moi. Jisas kogoye iwa opa gale awi iwa kerman kane yei ge, une po ana ta gull djillake kantau yei ana ge, dje awika Pita dje i pakna wori. 17 Ana gull djillake kantau yei ana ge Pita moi al embe dji, ni Jisas kogoye una moren we dji. Pita man dji, na namoro we dji.

18 Kam bi yeika, opa gale awi una boiye kambono ne, eine una boll wamo gale pille molmaka, Pita ga boll aike wamo pille moi.

Opa gale awi iwa kerman Jisas kot ye awi

19 Opa gale awi iwa kerman Jisas moi al embe dji, ni kandja beke awin mal ne, kogen una ye wani mal, djiye! dji. 20 Djika Jisas embe dji, Juda una makai to moi ge, lotu numb ne, lotu numb kerman Jerusalem yei al ge na po kandja pene djill, gulo nadjill. 21 Ni namba yei pille, kandja ge dje piyo dje djinden? Na kandja dje awill pi una ge dje pupen. Ga na kandja djill ge pi we dji.

22 Djika eine ta moi ge Jisas paune al alldag to embe dji, ni opa gale awi iwa kerman bakale aunden mo? dji. 23 Djika Jisas embe dji, na kandja ta dje ale yell dal, ni megye djimben. Ba na kandja pai mal djill dal, ni namba yei pille na tonden ne? dji.

24 Djika, Anas embe dji, ye Jisas dje i opa gale awi iwa kerman Kaiapas moro al pume! dji. Djika, Jisas kaye to pagi ge, Juda una dje i Kaiapas moi al pi.

Pita kandja alla dje embe dji, na Jisas nakando we dji

(Matyu 26.71-75 ne, Mak 14.69-72 ne, Luk 22.58-62)

25 Dje i pumaka Saimon Pita wamo pille moika, kambono moi ge embe dji, ni Jisas kogoye una wale moren kana? Djimaka Pita man dje, na namoro we dji.

26 Opa gale awi iwa kerman boiye Pita asa bainat toika kamale al bolo baske toi iwa ge, une epil taimane iwa ta Pita moi al embe dji, Jisas iko olip mau al moi poke ge, ni une boll aike mon na kanill dje pro we dji. 27 Dji ba, Pita alla tormang yeika, ola dje ka kondwale yau toi.

Una Jisas dje i Pailat moi al pi

(Matyu 27.1-2 ne, 27.11-14 ne, Mak 15.1-5 ne, Luk 23.1-5)

28 Kam kindja tagika, ga Kaiapas numbiye al kere, Jisas dje ipo Rom iwa kerman numbiye al ge pi. Po gull pai al orkoto molo embe dje pi, pakna bon ba, God nale al djengimb pandaka, ege kerman Pasopa ge kwa nambon kune nayenda. 29 Embe ye molmaka, Pailat er orko po kambono moi al embe dji, iwa ge ke namba mal yei pille ye kot ye awinj ne? dji.

30 Djika kambono embe dji, une ge singare ke ta nayeika, no ni moren al dje naiwpinka we dji.

31 Djimaka Pailat embe dji, ye loine paro mal pille kot ye aune we dji. Djika Juda una embe dji, man, no Juda una kot dje una to gopon ge kune nayendo, Rom una man dji we dji
Rom Juda una kantau yei pille, kandja kembis ta pai mal ge, Juda una yenekne kandja kot dji ba, kandja kot kerman ye una to goye paro ge Rom una embe dji, ye Juda una kot dje una ta to nagolme! dji. Kot embe mal panda ge, Rom una ipo to goye we dji. Una iko pera al nil to golo golo yei mal ge Rom una yenekne singare yeye yei mal ge pille yei we dji.
.
32 Kambono kandja embe dji ge, Jisas asa una na iko pera al tane we dji ge megye tonda dje pille ga embe dji.

33 Gull pai al ge Pailat alla er yem po embe dji, Jisas wondabe dji. Djika Jisas woika, Pailat embe dji, ni Juda una kingne moren mo? dji.

34 Djika Jisas embe dji, ni kandja djinden ge nenem nomanin pai mal pille djinden mo, mo una ta ni dje awi pille djinden ne? dji.

35 Djika Pailat embe dji, na Juda una moro mo? Ni nenem eplin una ne, opa gale awi una kerman kambono, ni na moll al iwi moren, ni namba mal ale yen ne? dji.

36 Djika Jisas embe dji, na king kaima moro ba, makimb al king kantau ye mor mal ge, na embe namoro. Na king embe mal mollka na wombana wo Juda una na to djine dje pille kunda yemaka ba, na king embe mal namoro pille, wombana embe nayenj we dji.

37 Djika Pailat embe dji, ni king moren kana? Jisas embe dji, ni king we djinden ge kune djinden, na wale moro. Na mana kui makimb al woll ge kandja kaima djino dje pille woll. Alla, kandja kaima dje waninj una ge piye we dji. 38 Pailat embe dji, kandja kaima ge wal naral wal ne? dji.

Pailat ami una Jisas nil tane dje pille dji

(Matyu 27.15-31 ne, Mak 15.6-20 ne, Luk 23.13-25)

Pailat kandja embe dje kere er yem po Juda una moi al embe dji, na kanill une ke ta nayei.
39 Ba ye singare paro ge embe mal paro. Ege kerman Pasopa yenda poke ge, ye djineke na una kaye par al iwa taimanta dje orko worno. Ge pille, Juda kingne moro ge na i orko worno mo?

40 Djika una yau to embe dji, una ge man, Barabas dje orko worben we dji. Barabas ge une geke bolo kandja napi iwa moi
18:40Barabas Rom una to worbon, ga no Juda una kantau nayene we dji. Dji ge une unakye kambono boll wo Rom una toi. Toi pille une kaye pai.
.

Copyright information for `GAM