John 19

Pailat embe dji, Jisas ipo nil to golme! dji

Kambono kandja embe djimaka Pailat djika ami una ka merke iwo Jisas kune merke pirangill toi. King kon pula yero mal embe ami una ka kagle yei iwo Jisas ngambale al pagi, kon bage momo ta i woro awo embe dji, Juda una kingne wopake moyambe! dji. Dje Jisas gume djillake al toi.

Pailat gull pai al er orkoto po embe dji, ye pillme! Na kanill une ale ta napai. Ye embe kanne dje pille na une dje i pene wornaka ye kanne we dji. Djika ga ka kagle yei iwo Jisas ngambale al tublo awo, kon bage momo wormaka, une er orko wo moika, Pailat embe dji, une wale woi moro, ye kanme! dji.

Jisas wo moika opa gale awi una kerman yemaka, eine boll kane yau kerman to embe dji, to gole! iko pera al to gole! djimaka Pailat embe dji, ye yenekne ipo iko pera al to golme! Na kando une ale ta napai we dji.

Juda una embe dji, man, goya mal. No loine bolo wori pai ge embe djindo, iwa ta na God wariye moro we dji dal, to golme djindo we dji.

Kambono kandja embe djimaka, Pailat pille kand golo er yem gull pai al pakna po Jisas moi al embe dji, ni nam pall iwa moren ne? dji. Ba Jisas kandja ta dje yem nawori. 10 Dje yem naworika Pailat embe dji, na kandja djill ge ni ta dje yem woro naumben mo? Na namba paro, ni dje i orko worno mo, ni iko pera al to goye ge na boll yendo, ni napren mo? dji.

11 Djika Jisas embe dji, ni namba paro ge God awi paro. God nawika, ni na iko pera al to gopen ge kune nayeika. Embe pille ni singare ke yenden ge kembis ta yenden ba, una na dje i ni mon al woi una ge, singare ke kaima yei we dji.

12 Jisas kandja embe djika, Pailat Jisas dje i orko worno dje yei ba, Juda una yau to embe dji, ni iwa ge dje i orko worin dal, ni Sisa boll ye no mormell mal ge pora djinda. Iwa ta na king moro we dji dal, Sisa dumoye ge une ino dje yendo we dji.

13 Kambono kandja embe djimaka, Pailat Jisas dje i er orko po dumo kandjiye ku tamban we dji yei al ge worika moi. (ku tamban kandja Ibru pall dji ge dumo Gabata we dji). Jas boiye sia taimanta yei al ge Pailat po ami dje moi. 14 Kune ge Pasopa ege yeika, Juda una kwa amblokun ye molmaka, 12 oklok armina mal embe pika, Pailat Juda una moi al embe dji, ye kanme! Ye kingne ge moriwa! dji.

15 Dji ba, ga yau to embe dji, ni i piye! Ni ipo iko pera al nil to gole! dji. Djimaka Pailat embe dji, ye kingne moro ge na ipo iko pera al nil to goyo mo? dji. Djika opa gale awi una kerman kambono embe dji, no iwa kingne moro ge Sisa taimane moro, ta namor we dji.

16 Dje kermaka Pailat pora we dji. Ami una Jisas iko pera al nil to goye dje awi.

Jisas iko pera al nil toi

(Matyu 27.32-44 ne, Mak 15.21-32 ne, Luk 23.26-43)

17 Awika ami una Jisas kantau yemaka, Jisas yene iko pera kake i Jerusalem kere er orko pika, ami una ipo dumo kandjiye una ngambalne yembe we dji yei al ge pi (Kandja Ibru pall djinj ge dumo Golgota we djinj). 18 Wo pillau djimaka, ami kambono Jisas i iko pera al nil to pagi. Ami kambono po iwa soka i iko pera al nil yemyemto wori papillka Jisas pakna pai.

19 Pailat djika una pepa bolo ipo Jisas iko pera pai al ge to dage pagi. Pepa bolo pagi ge embe dji, iwa ge Jisas Nasaret iwa, Juda una kingne moro we dji. 20 Dumo Jisas nil to pagi al ge Jerusalem manda yei pille, pepa boi ge, kandja sokara mal embe boi, Ibru, Rom ne, Grik kandjine pall boi.

21 Juda una opa gale awi una kerman kambono kane Pailat moi al embe dji, Juda una kingne moro we dje pepa bon mal ge nabopen. Ni kandja embe dje bopen, Jisas yene dji, na Juda una kingne moro we dje bopen we dji.

22 Dji ba Pailat embe dji, na kandja boll ge pandambe, gun ta naboyo we dji.

23 Ami una Jisas nil to pagle kere, Jisas konye kunomye i bill to pagle, ami una 4-pela moi ge i kune yei ba, Jisas konye kunomye momo yei ge allap djelldjell i taimane woro to naboi, allap kerman taimane yei. 24 Yei pille, ga embe dji, to ball nadjimbon, kas tambonka una ta yembe yenda ge inda we dje pagle kas toi. Ga embe yei ge, kandja Baibel al bolo wori pai ge megye toi. Kandja embe dje bolo wori pai.

Na konna konomna una omuk to i pagle, na konna momo ge kas taneke, iwa ta yembe yenda ge, inda we dje Baibel al embe boi. (Song 22.18)
25 Jisas iko pera al pa moika, ana pende aglo moi. Ta Jisas megama ambe boll mopillka, ta Kleopas game Maria ne, dumo Magdala ana Maria ge boll aike moi. 26 Embe ye molmaka, Jisas megama ne, yene kogoye iwa ta wopake kani iwa ge Jisas kane, megama moi al embe dji, ana ya, na kogena una ta manda moro ge, ni warin moro we dji. 27 Yene kogoye iwa ta moi al embe dji, ana manda moro ge ni mangama moro we dji. Kogoye iwa ta moi ge asa Jisas megama ge kantau nayei ba, Jisas kandja embe dji pille, une i numbiye al woro kantau ye moi.

Jisas goi

(Matyu 27.45-46 ne, Mak 15.33-41 ne, Luk 23.44-49)

28 Jisas kogo ye wani pora djika une kane, Baibel al kandja ta bolo wori pai ge megye tonda dje pille, une na nu nano we dji. 29 Nu wain kiwa nume ta yei, una wal bogandara dal embe i nu wain moi al to bale, iko isop ole al woro pagle, i pla Jisas djillake al wori. 30 Une no pagle, ge pora djindo we dji. Ngambale gollka djika, nomane kere goi.

Ami iwa ta Jisas dambe al kulag toi

31 Jisas goi poke ge kumaike ege Sabat kerman yenda paika, una kwa mokna amblokun yei. Juda una embe dje kani, iwa sokara iko pera al pa moye ge kune nayenda dje kane, Pailat moi al po embe dji, ga kakene to buko djineke, goyeke, una i kal wornembe dji. 32 Pailat kune we djika, ami una po iwa ta iko pera al pai ge kake to buko dje, age ta para aike kake to buko dji. 33 Po Jisas kani, une goi paika, une kake to buko nandji ba, 34 ami iwa ta Jisas dambe al kulag toi. Jisas boika ola dje meyam nu boll aike tulu dje er orko woi. 35 Wal embe yei kani iwa ge une kandja dje pene woro aundo. Une djindo ge kandja kaima djindo. Ye pillgi djine dje pille djindo. 36 Baibel kandja asa dje bolo pagi mal megye toi. Una Jisas kake al to buko nandji ge, asa Baibel al kandja dje bolo pagi ge embe dji,

yene yembe taimanta una wo to buko nadjine we dji. (Kisim Bek 12.46; Namba 9.12; Song 34.20)
37 Kandja ta dje bolo wori pai ge embe dji,

kulag toi iwa ta moro ge una toi una ge wo kanne we dji. (Sekaraia 12.10)

Jisas goi una ipo gull toi

(Matyu 27.57-61 ne, Mak 15.42-47 ne, Luk 23.50-56)

38 Josep dumo Arimatea iwa moi ge, une Jisas kogoye iwa ta moi ba, Juda una to djine dje pille une seke ye wani. Une po Pailat moi al embe dji, Jisas golo paro ge na ino we dji. Pailat, kapla ni ipiye! dji. Djika, Josep ne, Nikodemus po Jisas i kal worpill. Asa emill pai al Nikodemus Jisas moi al woika soka kandja djipill iwa ge moi. Nikodemus wal mirang wopake yei wal soka
mirang wopake yei wal soka ge ta iko kiwa, ta iko nuye
i tulu dje i taimane woro pagle iwi. Wal ibye pai ge 3-pela ten (30) kilo mal embe pai.
40 Jisas goi ge iwa soka ipo, allap pende iwo, wal mirang wopake yei wal i pakna pakna woro were pagle, Juda una gorka gull toto yenj mal soka embe yepill. 41 Jisas dumo nil to pagi al ge mau ta yei. Yei al ge kumur kindja ta yei, una goi ge ta ipo gull natoi. 42 Juda una egene kerman kwa gale amblokun yene ege ge er manda woika, kumur ge manda yei pille, soka Jisas goi ge ipo gull to pagpill.

Copyright information for `GAM