John 2

Dumo Kana iwana soka bolo imboll dje yepill

Ege sokara er wo pika, distrik Galili paknato Kana we dji ge, iwana soka bolo imboll dje yepill. Yepillka una kwa mokna gale no molmaka, Jisas me ge wo una boll aike moi. Una djimaka Jisas kogoye una boll womaka aike moi. Molmaka, una nu wain noi ge pora djika, Jisas me ge une moi al wo embe dji, una nu wain noi pora dji, ta namoro we dji. Djika Jisas embe dji, mana, ni kandja djinden ge nenem kogen, na kogena ta man. Na egena ge ipon nayero we dji. Djika une megama po boi una moi al embe dji, Jisas kandja ta djinda ge, ye yeme dji.

Ku sin kerman 6-pela numb al moi ge, taimantaiman dje nu wan andret (100) lita mal embe pakna po kune yei. Juda una lotu singare yei mal pille, nu was yemaka sin ge embe moi. Jisas ga boine una moi al embe dji, ye nu kolo iwo ku sin to puka tome! dji. Boi una po nu kolo iwo ku sin to puka tomaka, nu tulu djinda pai. Jisas embe dji, ye nu pende kolo ipo kwa omuk to aundo iwa kerman ge auneke, une nondambe dji. Djika boi una nu kolo i pumaka, Jisas yeika nu gun ge er wo nu wain kulo pika, iwa kerman ge aumaka noi. Boi una kolo iwi al ge une kanpol natoi ba, boi una pille kane yei. Iwa kerman ge djika ana inda iwa ge er woika iwa kerman ge embe dji, 10 una ana imbon dje yenj ge, nu wain djugo yendo nu ge asamoll kolo awinjka, una nonjka kumbene punda mor. Alla, nu wain djugo nayendo ge are kolo iwo awinj. Ba, ni embe nayen, ni wopake yen. Nu wain djugo nayei ge, ni asamoll kolo awin, alla djugo yei ge ni are awin we dji. 11 Jisas kogo dongall embe yei ge asamoll une embe ta nayei. Ba ipon distrik Galili paknato Kana ge, une kogo kindja yei. Une kogo embe ye kerika, une kandjiye kerman kaima paika, yene kogoye una pillgi dji. 12 Jisas dumo Kana ge, kere po yene megama ne, age kambono ne, kogoye una boll er dumo Kaperneam po ege sokarita moi.

Jisas lotu numb kerman yei al ge numog po una dje bekle wori

(Matyu 21.12-13 ne, Mak 11.15-17 ne, Luk 19.45-46)

13 Juda una ege kerman Pasopa ge manda yeika, Jisas er Jerusalem po 14 lotu numb kerman, numog po kani, kog kau ne, kog sipsip ne, ka ne, una opa gale awi wal porapora una top to imbon dje pille yemaka, una bo tebol yei al ami dje molo, ku megye ta i ta awika, ta i ta awika embe ye moi. 15 Embe yemaka Jisas ka baklain pirngangill to, kog sipsip ne, kog kau maket ye moi una sika to bekle wori. Bo al una ku megye ta i ta awika, ta i ta awika embe ye moi al ge, une po amblo ake toika, ku megye yage kal to er djelldjell pi. 16 Una ka maket ye moi ge Jisas po embe dji, ye kaine ge i er pume! Na Nena numbiye ge, ye wal iwo maket yenj ge kerme! dji. 17 Une embe yei ge kogoye una kane God kandjiye Baibel al pai ge pillpol toi. Kandja pai ge embe dji,

ni numbin yero ge na pille we kaima yendo, numb ge wopake yenda dje na kogo wamo boll yendo we dji.
18 Jisas embe yei ge Juda una embe dji, ni embe yenden ge, ni kogo dongall namba mal yembenka, no kane God kaima ni dje wori won dje kanbon we dji. 19 Djimaka Jisas embe dji, wal dongall ta yeno ge embe, ye lotu numb kerman to sellke worneke, ege 3-pela er wo pundaka, na alla take pagyo we dji. 20 Kandja embe djika, Juda una aya dje embe dji, lotu numb kerman ge una kognumb 4-pela ten sikis (46) er wo pika, take pagi ba, ege 3-pela paknato ge ni ola dje takben mo? dji. 21 Dji ba, Jisas lotu numb kerman pille dji ge, yene gakle pille dji. 22 Are Jisas aglo er wo gun punda mal ge, une kandja ipon dji ge yene kogoye una pillpol toi. God kandjiye pepa bolo pagi mal ge, ga pillgi dji.

Una nomane pakna ge Jisas kane kune yei

23 Ege kerman Pasopa yeika, Jisas Jerusalem kogo dongall ye wane moika, una merke kane yene kandjiye al pillgi dji. 24 Ba kambono ge Jisas yene nomane nawi, makimb una nomane pai ge une pille kane ye keri. 25 Makimb una nomane embe paro we djine ba, ga nomane pai ge, Jisas kane kune ye keri.

Copyright information for `GAM