John 20

Jisas aglo er wo gun pi

(Matyu 28.1-8 ne, Mak 16.1-8 ne, Luk 24.1-12)

Sande kam kindja tagika, Jisas kumur gull to pagi al, dumo Magdala ana Maria wo kani, ku kerman to pel dje pagi ge yapro wori kiwa yei. Une muk dje er yem po Saimon Pita ne, Jisas kogoye una une wopake kani iwa boll aike mopill al, une po embe dji, Jisas goi ge una ipo tabye ta wori pai, woro pagi al ge no nakanmon we dji.

Djika soka muk dje pupillka, kogoye iwa ta Pita i are woro pagle, une asamoll muk dje po kumur al pillau dji. Une magi dje nondo ye kani allap Jisas gakle al were pagi ge kiwa yeika, er numog napi, bekle molo pa moika, Saimon Pita are muk dje wo er numog po kani kon allap Jisas gakle al were pagi ge djell yeika, allap Jisas ngambale al tublo pagi ge, kimbre i wori djell yei. Jisas kogoye iwa ta asamoll wo bekleto moi ge, une numog po kane, pillgi dji. Ba Krais golo aglo er wo gun punda we dje Baibel al pepa boi ge, iwa soka pillpol natopill, are pupill. 10 Soka er yem po yenekne numbine al pupill.

Dumo Magdala ana Maria Jisas kani

(Matyu 28.16-20 ne, Mak 16.14-18 ne, Luk 24.36-49)

11 Maria kumur ge bekleto molo kimb yei, magi dje kane 12 numog woro kani, tau agelo soka kon kuruwo woro wo mopill. Jisas goi pagi al tau agelo ta ngambale al ami dje moika, ta kake al ami dje moika embe yepill. 13 Soka ana Maria moi al embe djipill, ana ya, ni namba yei pille kimb ye moren? Djipillka Maria embe dji, na iwa kerman goi pagi ge, una wo i tabye ta wori pai, na nakando we dji.

14 Kandja embe dje kere, kane ake to kani, Jisas woi aglo moi ba, Maria kanpol natoi. 15 Jisas embe dji, ana ya, ni namba yei pille kimb ye moren? Ni una ne mal pille dulo moren ne? dji. Jisas moi ge Maria kane maune ta moro dje kane embe dji, iwa kerman, iwa golo pai ge, ni ipo tabye ta worin dal, ni dje aumbenka na po ino we dji.

16 Kandja embe djika Jisas Maria! dji. Maria kane ake to Jisas kane embe dji, Rabonai! dji. (Rabonai we dji ge, me tisa paro).

17 Djika Jisas embe dji, na Nena moro al er pla napundo, ni na gaklena nable! dji. Na agana kambono mor al ge ni po kandja embe djimben, Jisas embe dji, na er pla Nena moro al puno. Une na Nena moro alla ye Nane moro, une na Godna moro, alla ye Godne moro we dji.

18 Djika Maria er yem po Jisas kogoye una moi al embe dji, Iwa Kerman moi, na kane wondo we dji. Jisas kandja dje awi mal, Maria po Jisas kogoye una moi al dje awi.

Jisas aglo moika, kogoye una kani

(Matyu 28.16-20 ne, Mak 16.14-18 ne, Luk 24.36-49)

19 Sande kune emill paika, Jisas kogoye una Juda una wo to djine dje pille numb kond tugo numogto molmaka, Jisas wo pakna molo embe dji, ye ellne tukne arngan yenda molme! dji. 20 Dje, yene agle al ne, dambe al wal boi kusye pai ge, ombine dje awika, kambono Iwa Kerman kane wo pille molmaka, 21 Jisas kandja alla dje awo embe dji, ye ellne tukne arngan yenda molme! dji. Nena na dje wori woll mal na ye dje wordo. 22 Kandja embe dje kere, yene djillake mulnge pu dje woro embe dji, God Murble ge, ye ime! dji. 23 Una ye ye ke ye auneke, ye kere awi dal, ga ye kere awi mal embe moye. Ba una ye ke ye auneke ye kere nawi dal, ga ye kere nawi mal embe moye we dji.

Tomas Jisas kani

24 Jisas kogoye una 12-pela ge ta Tomas (kandjiye ta Didimus), Jisas wo moi poke ge une pakna molo nakani. 25 Kogoye una pende une moi al embe dji, no Iwa Kerman kanpin we dji. Ba Tomas embe dji, Jisas agle nil toi kusye pai ge na aglena megye pakna naworill dal, une dambe kusye pai na nabill dal, na pillgi nadjino, man we dji.

26 Ege 8-pela er wo pika, Jisas kogoye una kond tugo pagle numogto molmaka, Tomas ga boll aike moi. Molmaka Jisas wo kambono moi al pakna aglo molo embe dji, ye ellne tukne arngan yenda molme! dji. 27 Dje Tomas moi al embe dji, ni aglen megye woro ba amblo pupen, na aglena kanben, na dambena kusye paro al ge, aglen pakna woro amblo pille! dji. Ni nomanin soka napanda, pillgi djimben we dji.

28 Djika Tomas embe dji, ni na Iwa Kerman moren. Ni na Godna moren we dji.

29 Djika Jisas embe dji, ni na kane pagle pillgi djinden ba, una na nakane pillgi djine ge, God ye wopake ye aunda moye we dji.

Buk ge me paro

30 Jisas kogo dongall pende merke yeika yene kogoye una kani ba, une kogo pende merke yei buk ge al bolo wori naparo. 31 Krais wonda we dje Baibel al bolo wori pai ge Jisas wale woi, une God wariye woi mal ye pillgi djine. Ye embe yei dal, une kandjiye al ye gun moye dje buk yero ge me embe mal paro.

Copyright information for `GAM