John 21

Jisas woika kogoye una 7-pela kani

Are, Jisas kogoye una nu erim kerman Taiberias po molmaka, Jisas woika ga wal kani mal kandjinebe embe paro. Kune ge Saimon Pita ne, Tomas (kandjiye ta Didimus) ne, Galili paknato dumo Kana iwa Nataniel ne, Sebedi wariye soka ne, Jisas kogoye iwa soka djell ta yepillka, ga boll aike moi.

Embe molmaka Saimon Pita embe dji, na po pis tano we dji. Kambono, no ni boll aike bon we dji.

Djimaka ga porapora er kanu al pakna po pis tambon dje ye pumaka, kam tagi ba, pis ta natoi.
Kam kindja tagika Jisas wo nu erim djeke aglo moi ba, kogoye una Jisas woi moro dje kanpol natoi. Jisas embe dji, womba kambono, ye pis ta tonj mo? dji. Kambono man we dji.

Djimaka Jisas embe dji, ye pis kon i kanu yemto, aglene woto wori dal, ye pis tane we dji. Djika kambono pis kon i nu al woro pagle, pis merkeke toi. Bolo ye i pakna worne napai, imb yei.

Kogoye iwa ta Jisas wopake kani ge, une Pita moi al embe dji, Iwa Kerman ge wale woi moro we dji. Saimon Pita pille konye saket gulo woro kere, plo dje yage nu al to, nu kapill to er nu djeke pi. Kogoye una kanu al pakna moi ge ellke namoi, wan andret mita (100) mal embe molo, kanu i pumaka, pis kon ngundjo i er nu erim djeke pi.

Er nu erim djeke wo kani, wamo ta do paika, pis ta gale wori paika, bret ta yei. 10 Jisas embe dji, ye pis ipon toi ge pende iwme! dji. 11 Djika Pita alla nu al po pis kon ngunjo i nu erim djeke wori. Pis kerman wan andret 5-pela ten tri (153) moi ba kon ge tup nadji.

12 Jisas embe dji, ye wo nane we dji. Kambono ni una ne mal moren ne? djine pai ba, une wale woi dje kane kand golo nadji. 13 Nadjimaka Jisas bret ne, pis i kambono awi.

14 Jisas aglo er wo gun pi ge, kogoye una kune soka asa kani, alla ipon une wo moi ge kambono kune sokara mal embe kani.

Jisas embe dji, Pita, ni na sipsip kantau yemben we dji

15 Kwa no pora djimaka, Jisas Saimon Pita moi al embe dji, Saimon, Jon wariye moren ge, na kogena una na wopake kaninj mal, ni na wopake kane er wekle punden mo? dji. Djika Pita embe dji, owo, Iwa Kerman, na ni wopake kando mal ni kanden we dji. Djika Jisas embe dji, na sipsip wombe mor ge ni kantau yeye! dji.

16 Dje une Pita moi al kandja alla dje embe dji, Saimon, Jon wariye moren ge, ni na wopake kanden mo man ne? dji. Djika Pita owo, Iwa Kerman, na ni wopake kando mal ni kanden we dji. Djika Jisas embe dji, na sipsip mor ge ni kantau yeye! dji.

17 Dje kune soka kandja dji mal ge, une alla dje Pita moi al embe dji, Saimon, Jon wariye moren ge, ni na wopake kanden mo man ne? dji. Ba Jisas kune sokara ni na wopake kanden mo? dji ge, Pita pi urup djika kandja embe dji, Iwa Kerman, ni wal porapora kane kerden. Na ni wopake kando mal ni kanden we dji. Djika Jisas embe dji, na sipsip mor ge ni kantau ye mole! dji.

18 Na kandja kaima dje ni aundo, ni womba war mon poke ge, ni nenem ka purba tulo ni nenem nomanin pai mal pille kond wane mon ba, ni iwoga yemben kune ge, una djell wo ni ka purba tulo awo, aglen dul to worbenka, ga ni man dje pupen al dje ipine we dji. 19 Jisas kandja embe dji ge Pita are goya mal, God kandjiye amblo pla worda mal pille dji. Jisas Pita moi al embe dji, ni na wondo al womben we dji.

Kogoye iwa ta Jisas wopake kani ge une kandja djindo

20 Djika Pita kane ake to kani kogoye iwa ta Jisas wopake kani iwa ge moi. Kambono bret wain noi kune ge, iwa ge Jisas gonye al seng ye molo Jisas moi al embe dji, iwa ta ni dje i kunda yem una aunda iwa ge una ne mal pille djin ne? dji iwa ge wo moi. 21 Pita iwa ge kane pagle Jisas moi al embe dji, Iwa Kerman, une ge we?

22 Djika Jisas embe dji, na djinaka iwa ge gun molo pa moyaka na are yem wono ge, na kogena, ni kogen man. Ni na wondo al womben we dji. 23 Jisas kandja embe dji ge, pillgi dji una pille kandjambe to pumaka, una merke pi. Kogoye iwa ta moi ge une nagoya we dji. Ba, Jisas iwa ge nagoya we nadji. Une embe dji, na yem wonaka, iwa ge moya mo namoya ge ni kogen man, na kogena paro, ni na wondo al womben we dji. 24 Jisas kogoye iwa ta wal nale al kane, pepa boi ge, na wale moro. Nono pirmon, une wal pille kane ye pepa boi mal ge kandja kaima paro.

25 Jisas kogo pende yei ge, na pepa ge boll ba, une kogo merkeke yei ge na namboll. Na embe pro, una Jisas kogo taimantaiman dje yei mal buk al bolmaka, buk ge merkeke moika, dumo makimb sill djindaka, dumo ta nayenda.

Copyright information for `GAM