John 5

Nu Betesda moi al ge iwa ta kake ke yei Jisas ye wopake ye awi

Are Juda una ege kerman ta pillau djino dje yeika, Jisas er Jerusalem pi. Jerusalem gull kerman i pakna wori yei al ge, gull djillake merke yei. Taimanta yei ge kandjiye kog sipsip kond we dji. Kond yei al ge, nu erim ta moi. Ibru una kandjine pall ge nu Betesda we dji. Nu djeke dumo 5-pela yei al una moi. Yei al ge una ke toi una ge merke molmaka, pende nalene emill yei, pende kakene ke yei, pende kakene aglene golo ke yei una ge porapora moi.

Iwa taimanta moi ge yene ke toi, kognumb 3-pela ten eit (38) er wo pi. Iwa ge dumo pera pa moika, ke kanan toi pai. Jisas wo kane embe dji, ni ke tondo ge kiwa moyo dje pren mo? Iwa ge embe dji, Iwa Kerman, tau agelo ta wo nu amblo olup yenda poke ge, una na i nu al worne una ta namor. Na nu pano dje yendo ge, una asamoll popo yenjka, na are eri wondo we dji. Jisas embe dji, ni agle! Kunomin amblo i er piye! dji. Jisas kandja embe djika, iwa kake ke yei ge ola dje kiwa yeika, une kunomye amblo i er pi. Jisas wo embe yei ge ege Sabat yei kune ge yei. 10 Iwa ta asa kake ke yei iwa moi al ge Juda una wo embe dji, ipon ege Sabat yero, ni kunomin i wanden ge kune nayendo we dji. 11 Djimaka une ge embe dji, iwa ta na i gun woro awi ge, une na moll al embe dji, ni kunomin amblo i er piye! dji. Dji mal ge na yendo we dji. 12 Djika kambono embe dji, ni kunomin amblo i er piye dji iwa ge, una ne mal dji ne? dji. 13 Kambono kandja embe dji ba una merke moi al ge Jisas er pi pai, iwa ta wo une i gun wori ge iwa ge kanpol natoi.

14 Are iwa ge lotu numb kerman gull pai al pakna po moika, Jisas kane embe dji, na ni i gun worill pora dji, ni singare ke ye wanden ge kerben. Ke kerman are ni boll wo djinda we dji. 15 Djika une Juda una moi al po embe dji, iwa na i gun woro awi ge Jisas we dji.

16 Embe djika Juda una kani Jisas kogo embe yei ge une ege Sabat poke ge yei. Ge pille, ga une ye ke ye aumbon dje pi. 17 Embe yemaka, Jisas kambono moi al embe dji, na Nena kogo ege ege yendo, ipon ye pa moro, na para kogo yendo we dji. 18 Embe djika, ga Jisas to gopon dje pi. Kambono yei ge me embe mal paro. Ege Sabat yei poke Jisas po kogo yeika, kambono kane ke pi. Ba Jisas wo dji mal, God ge na Nena moro we dji ge, kambono kani une God moyo dje yei. Ge pille, Jisas kaima to gopon dje pille moi.

God wariye namba paro pille kogo yendo

19 Juda una embe yemaka Jisas embe dji, na kandja kaima dje ye aundo, God wariye yene nomane paro mal pille kogo nayendo. Yene Ne kogo yendo ge wariye kane kogo embe yendo. Wal porapora Ne yendo ge, wariye embe yendo. 20 Une embe yendo pille, Ne ge wariye wopake kando ne, kogo porapora yendo ge, une wariye ombine dje aundo. Iwa kake ke yei wopake ye awi ge man, kogo dongall ta mal ombine dje aundaka, ye kane aya djine. 21 Ne ge, gor una i gun wordo mal embe, wariye yene nomane paro mal pille, una i gun woro aunda. 22 Ne ge una porapora kot ye naunda, man, wariye ge kot piya. 23 Une embe yenda ge, una porapora Ne pille pla yenj mal embe, ga wariye pille pla yene. Ba una wariye pille pla nayei dal, ga na dje wori woll iwa pille pla nayene.

24 Na kandja kaima dje ye aundo, una na kandja djindo ge pille, na Nena na dje wori woll iwa pillgi dji dal, gun molo pane, kot naine, man, goi mal moi ge kere gun molo pane. 25 Na kandja kaima dje ye aundo, ege ta yenda we dji ge ipon yero. God wariye yau tondaka una goi mor ge pille moye. Una pille i dal, gun moye. 26 Yene Ne gun moro mal ge, yene ye worika wariye ge gun moro. 27 Une ge Una Wombe moro pille, yene Ne une namba awi, kot piya. 28 Na kandja djindo ge, ye pille gok nadjine. Ege ta yendaka, God wariye yau tondaka, 29 una gull al golo mor ge pille, aglo er orko wone. Una singare wopake ye wani dal, aglo er wo gun pineke, una singare ke ye wani dal, aglo er woneke God tonda we dji.

Jisas wale woi mal una kandja dje pene worinj

30 Jisas embe dji, nanam wal ta yeno kune nayenda. Na una okum tondo ge na Nena na dje wori woll iwa kandja djindo mal pille tondo. Ge pille, na okum tondo ge to kune yendo.

31 Na wale wondo we dje na nanam djino ge kune nayenda. 32 Ba God moro. Na singare ne, kogo yendo ge une djindo, alla une kandja kaima djindo dje na kando.

33 Une wale wondo we dje makimb una kandja embe dji dal, na pille we nayeno ba, ye una dje wormaka, Jon moi al po kandja dji. Na singare yell mal ne, kogo yendo mal ge Jon dje pene woro awi, ye pi. Na kandja embe dje ye aundo ge, God ye i yem worda dje pille djindo. 35 Jon wamo suwa mal embe moi, une do au djika, ye ege tuge ta kani ge, ye wopake pille awi.

36 Na singare yendo mal Jon dje pene wori, ye pi ba, wal kerman ta yenaka ye kane, na wale wondo mal pille kune yene. Ge na Nena kogo yeno dje awi mal ge, na pille yell dal, Nena na kaima dje wori woll mal ye kane kune yene. 37 Na Nena dje wori woll iwa moro ge, une na kaima woll mal dje pene woro awi ba, ye une numbke pall kandja dji ge kaima napi. Ye une gume djillake nakani. 38 Yene kandjiye ye boll naparo pille, yene wariye dje wori wo kandja dji ge ye para napir. 39 Ye gun mopon dje pille Baibel kere kaninj ba, na kaima woll mal ge, Baibel al bolo wori paro. 40 Baibel na pille bolo wori paro ba, ye na moro al gun mopon dje pille nawonj.

41 Na kandja embe djindo ge makimb una na kandjina amblo pla worne dje na nayendo. 42 Ba ye mor ge na kane kune yendo. Ye kumbene al ge, ye God wopake nakaninj. 43 Na Nena kandjiye al pille wondaka, ye djembon to nawinj ba, una djell ta yene kandjiye al pille woi dal, ye djembon to aune. 44 Ye unakne ye kandjine amblo pla worinj ge, ye pille pla kaima yenj ba, God taimane ge, une ye kandjine amblo pla worda dje nayenj. Ye embe yenj ge, ye pillgi namba mal djine?

45 Ye singare ke ye waninj ge, na Nena moro al dje nauno. Iwa Mosis, ye une pille we yenj iwa ge, une djindaka na Nena piya. 46 Mosis na pille pepa boi ge, ye napi, ye kanpol tomaka, na kandja dje aundo ge ye pillgi djimaka. 47 Ba une pepa boi ge ye pillgi nandji pille, na kandja djindo ge ye pillgi namba mal djine?

Copyright information for `GAM