John 6

Jisas una 5,000 kwa mokna awi

(Matyu 14.13-21 ne, Mak 6.30-44 ne, Luk 9.10-17)

Jisas kandja embe dje kere, une nu erim Galili er yem kolato pi (nu erim moi ge kandjiye Taiberias we dji). Jisas kogo dongall ye, una i gun woro awi ge, una merke kane une pi al ge are pi. Jisas er makimb mekbe al pika, yene kogoye una boll aike ami dje moi. Juda una ege kerman Pasopa we dji ge manda yeika, Jisas kane pla woro kani, una merke une moi al womaka, Jisas Pilip moi al embe dji, no djekill po kwa top to aumbonka una wonj ge nane ne? dji. Jisas kogo yeno dje yei ge yene pi ba, une kandja dji ge Pilip namba we djinda dje pille dji.

Dje awika Pilip embe dji, ku tu andret (200) mal embe yei dal, no ipo kwa top tambonka, una kembis kembis dje nane kune nayenda we dji. Yene kogoye una iwa Saimon Pita age Andru ge une Jisas moi al wo embe dji, womba war ta moro ge, une bret 5-pela yeraka, pis soka yero ba, una merke mor ge kwa embe mal nane kune nayenda we dji. 10 Djika Jisas embe dji, ye djineke una ami dje moye we dji. Una moi al ge kull akis merke bolo moika, una ami dje molo pi. Iwa kambono nambane ge paip tausen (5,000) moi.

11 Bret yei ge Jisas i, God moi al wopake we dje awo, bret i una awo, pis ge para aike awika, una ami dje moi ge noi kumbene pi. 12 Kwa noi kumbene pika, yene kogoye una moi al embe dji, kwa mokna ge nakerbon, tuge moya ge ye ngando makai tane we dji. 13 Djika ga po ngando i djengill kon 12-pela to puka toi. 14 Jisas kogo dongall embe yei ge una kane embe dji, God na propet ta dje worno wonda we dji ge Jisas wale wondo we dji. 15 Jisas kani, ga ni no kingne mopen we dje nomane kerman embe pai pille, une dumo ge kere, er makimb mekbe al po yene moi.

Jisas nu erim be kond er pi

(Matyu 14.22-33 ne, Mak 6.45-52)

16 Taman pika yene kogoye una er kal nu erim djeke po molmaka, 17 emill djika, Jisas wani nawoi. Kambono kanu i nu al woro er dumo Kaperneam bon dje pi. 18 Kambono 5 mo 6 kilomita mal embe pumaka, kamkopo kerman woika, nu olup ye, po wo yeika, Jisas nu erim al be ge kamblo woika, kambono kane kand kerman goi. Ba, 20 Jisas embe dji, na wondo, ye kand nagolme! dji. 21 Djika kambono kane wo pille, une i kanu al pakna woro, er dumo Kaperneam bon dje yei ge manda nawoi ba, ola dje kanu ge po pillau dji.

Una merke Jisas pille dulo wani

22 Kam tagika una merke nu erim konato moi ge kani, kanu taimanta yei ge kogoye una i er pi pai. Ba Jisas kambono boll aike er napi. 23 Alla una djell ta kanu pende i dumo Taiberias kere er wo Jisas asa bret wopake we dje awi dumo yei al ge woi. 24 Wo kani Jisas ge namoi, yene kogoye una para namoi dje kane, kambono kanu al pakna po Jisas pille dulo er dumo Kaperneam pi.

Kupill al bret moro ge Jisas yene we dji

25 Kambono nu erim yemto po Jisas kane embe dji, tisa, ni ba won ge kune nam won? 26 Djimaka Jisas embe dji, na kandja kaima dje ye aundo, ye na dulo wonj ge ye kogo dongall ta kani pille, dulo nawonj. Ye bret noi ge pille wonj we dji. 27 Ye kwa kiwa nambon dje pille kogo nayene! Ye kwa no gun mopon kwa ge nambon dje pille kogo yene! Kwa embe mal yero ge Una Wombe ye aunda. Une embe aunda ge God une namba awi pille aunda we dji.

28 Djika kambono embe dji, God nono kogo yembon dje pille moro ge, nono kogo ta namba mal yembon ne? dji. 29 Djimaka Jisas kandja embe dji, kogo God ye yene dje pille moro ge, kogo embe mal paro. Iwa ta God dje wori wonda iwa ge ye pillgi dje molme! dji.

30 Jisas kandja embe dji ge kambono embe dji, ni kogo dongall namba mal yembenka no kane, ni kandja djinden ge pille kane kune yembon ne? dji. 31 Dumo wapra yei al ge, nono Juda una gollne, bret mana we dji yei ge i noi. Kambono bret mana noi ge, God kandjiye bolo pagi mal ge embe djindo, une bret awi kambono noi ge, bret kupill al kere er kal woi bret yero ge, une awika noi we dji. 32 Kandja embe djimaka Jisas embe dji, na kandja kaima dje ye aundo, Mosis bret ye awi ge, kupill al kere er kal woi bret awika ye noi ba, na Nena bret ye aundo ge, kupill al kere er kal woi bret kaima yero ge aundo. 33 Bret God ye aundo ge embe mal yero. Makimb una gun moye dje pille iwa ta kupill al kere er kal woi iwa ge God bretye yero we dji. 34 Djika kambono embe dji, iwa kerman, bret embe mal yero ge ni ege ege aumbenka no nambon we dji. 35 Jisas embe dji, bret una no gun mor bret yero ge na moro. Una na moro al wone una ge, koll kaima kaima nagoye. Una na kandjina al pillgi djinj una mor ge, yenekne numbkane ge asip natonda, nu nambon dje napiye we dji.

36 Na kandja embe djill, ye na kani ba, ye na kandjina al pillgi nandji we djill. 37 Na Nena dje wordaka una na moro al wone ge, na moro al ge kaima wone. Alla una na moro al wone una mor ge, na kaima kaima to orko naworno. 38 Na to orko naworno we djindo ge, na nomana pai mal yeno dje pille kupill al kere na nawoll. Na woll ge, na Nena dje wori woll una, yene nomane pai mal ge pille na yeno dje pille woll. 39 Iwa na dje wori woll iwa moro ge, une nomane embe mal paro. Une dje wordaka una na moro al wone una mor ge, una taimanta er take dje napine. Ege pora djinda poke ge, na djinaka kambono porapora mor ge aglo er wo gun pine dje une nomane embe mal paro. 40 Na Nena nomane paro mal ge embe mal paro. Una Wombe ge una kane, pillgi djine ge, gun molo pa moyeke, ege pora djinda poke ge, na djinaka kambono porapora aglo er wo gun pine we dji.

41 Jisas kandja asa dji ge, na kupill al kere er kal woll bret mal embe moro we dji ge, Juda una man dje 42 embe dji, une moro ge iwa Josep wariye. Yene neme soka mormell ge no kanmon ba alla, une kandja embe djindo, na kupill al kere er kal woll we djindo ge, kune nayendo we dji.

43 Djimaka Jisas embe dji, ye yenekne pille kandja djinj ge kerme! 44 Na Nena na dje wori woll iwa moro ge, une dje wordaka na moro al wone una mor ge wone. Une dje naworda una moye ge na moro al nawone. Alla wone una mor ge, ege pora djinda poke ge, na djinaka aglo er wo gun pine. 45 Propet ta God kandjiye pepa bolo pagi ge embe djindo, una porapora mor ge God kandja beke aundaka piye we dji. Na Nena kandja djindaka, kambono pille i nomane al pakna worinj una mor ge, na moro al wone. 46 Na kandja embe djindo ge, una pende God kani pora dji dje pille nadjindo. Una porapora mor ge God nakaninj. Iwa taimane moro, God dje wori woi iwa moro ge, une God kando. 47 Na kandja kaima dje ye aundo, na kandjina al una pillgi djinj una mor ge, gun eri molo pa moye. 48 Bret una no gun moye bret yero ge na wale moro. 49 Ye gollne po dumo wapra yei al bret mana we dji ge ga i no goi. 50 Ba bret kupill al kere er kal wondo bret yero ge, una no gun moye. 51 Una bret no gun moye bret yero ge na wale moro. Na kupill al kere er kal woll, bret yero ge una ta noi dal, gun eri molo pa moye. Na bret aundo ge na gaklena i ye aundo. Makimb una no gun moye dje pille na embe ye aundo.

52 Jisas kandja embe djika Juda una, yenekne nonga dje kandja dje pille embe dji, une ge embe djindo, na gaklena paro ge ye i nane we djindo ba, une gakle paro ge nono namba mal ye i nambon ne? dji.

53 Djimaka Jisas embe dji, na kandja kaima dje ye aundo, Una Wombe gakle ne, meyamye paro ge, ye ta nanoi dal, ye gun namoye. 54 Na gaklena ne, meyamna paro ge una ta i noi dal, gun eri molo pa moye. Ege pora djinda poke ge na djinaka, kambono aglo er wo gun pine. 55 Na gaklena kwa mal embe paro ba, kwa kiwa man, kwa kaima paro. Na meyamna nu mal embe paro ba, nu kiwa man, nu kaima paro. 56 Na gaklena ne, meyamna nonj una mor ge, na boll aike morka, na kambono boll aike moraka embe yenmon. 57 Na nena ge gun moro alla une na dje wori na wo gun moro mal embe ge, une yene dji mal pille na gun moro. Une yendo mal embe, una na gaklena nane una mor ge na djindo mal pille gun moye. 58 Bret kupill al kere er kal woi bret yero ge embe mal yero. Ye gollne bret no goi ge, kupill al kere er kal woi bret ge embe mal nanoi. Bret kupill al kere er kal woi bret yero ge, una ta noi dal, gun eri molo pa moye we dji.

59 Jisas kandja dji ge une lotu numb dumo Kaperneam molo kandja dji.

Jisas kandja djinda mal ge una pille gun moye

60 Jisas kandja embe djika, yene kogoye una merke moi ge pende pille embe dji, Jisas kandja djindo ge kandja dongall djindo, una ne mal piya ne? dji. 61 Embe djimaka Jisas yene kogoye una ke pi mal ge, une yene nomane al pille embe dji, na kandja embe djill ge, ye na kerbon dje pir mo? dji. 62 Una Wombe ge er yem po dumo asa moi al punda ge, ye kane namba mal piye? 63 Una gun mor ge God yene Murble aundaka gun mor. Una yenekne gaklene al kogo ta yembon dje yene ge gun namoye. Na kandja dje ye aundo ge na God Murble boll aike ye dje aundo, ye gun moye dje pille djindo. 64 Ba ye una mor ge pende pillgi nadjinj. Asa une kogo kindja ye woi ipon yendo ge, Jisas boll pillgi nandji una, Jisas kani pora dji. Iwa ta wo yene ipo kunda yem una aunda iwa ge, Jisas para aike kani. 65 Ga embe yei mal ge Jisas kane embe dji, una na moro al wone una mor ge, na Nena dje wordaka wone. Une dje nawori dal, na moro al nawone we dji.

66 Jisas kandja embe dje kerika, yene kogoye una merke moi ge pende, kere er pi, aike nawani. 67 Una embe yei, Jisas kambono 12-pela moi al embe dji, una yenj mal ge, ye na kane kere embe yene mo? dji. 68 Djika Saimon Pita embe dji, iwa kerman, no una ne mal boll aike mopon? Ni kandja dje wanden kandja ge, no gun mopon mal kandja embe djinden, no ni kerbon kune nayendo. 69 No ni kandjin al pillgi djipin, God yene dje i iwa wopake ta wonda we dji ge, ni wale kaima moren dje pirmon we dji.

70 Pita kandja embe djika, Jisas ga moi al embe dji, ye iwa 12-pela pakna mor ge, ye na dje ill una mor ba, iwa taimanta moro ge une kum pai una mal embe moro we dji. 71 Jisas kandja embe dji ge, iwa Saimon Iskariot wariye Judas ge pille dji. Iwa Judas ge, iwa 12-pela moi al une pakna moi ba, une Jisas ipo kunda yem una moi al auno dje pille moi.

Copyright information for `GAM