John 8

Ana ta iwa boll kunumb nopill ana ge una i Jisas moi al woi

Po kermaka, Jisas er kam mekbe Olip pi. Kam kindja tagika, une er yem lotu numb kerman gull pai al pakna pi. Una porapora womaka, une ami dje molo kandja dje awi.

Une kandja dje moika, God lo dje awi una ne, Parisi una ana ta dje iwo una moi al pakna wori moi. Ana ge iwa ta boll kunumb nopill una kani we dji. Ga Jisas moi al embe dji, tisa, ana ge iwa ta boll kunumb nopill ge una nalene al kani we dji. Mosis lo bolo pagi ge ana singare embe yei dal, nono ku to gopon we dji. Ni namba we dje pren ne? dji. Ga Jisas kandja ta djindaka, ale yendaka, kot ye aumbon dje pille dji. Embe djimaka Jisas magi dje agle megye ge makimb al mon boi.

Bolo moika kambono kandja dje pa molmaka, une alla aglo molo embe dji, ye una mor ge, iwa taimanta singare ke ta nayenda iwa ge, une ku asamoll i ana ge tondabe! dji. Jisas kandja dje kere, alla magi dje molo makimb al agle megye i mon bolo moi. Bolo moika God lo dje awi una ne, Parisi una taimantaiman dje us dje er popo yei. Iwoga kambono ge asamoll er pumaka, iwa komdjill ge are pumaka embe yei. Er po kermaka Jisas magi dje pa moika, ana ge para aglo moika, soka embe mopill.

10 Mopillka Jisas aglo molo embe dji, ana ya, una ba moi ge er nam pi? Ni kot ye aumbon dje yei una ge iwa taimanta moro mo? dji. 11 Ana ge embe dji, Iwa Kerman, ta namor we dji. Jisas embe dji, una ni kot ye aumbon dje keri mal ge, na para ni kot ye nauno. Ni po djingjang alla nayemben we dji.

Jisas wamo suwa do au djindo mal embe moro

12 Jisas una moi al embe dji, makimb una mor ge, na wamo suwa gale aundo. Una na boll aike wanne ge, na kambono nomane al amblo au dje aunaka gun moye, emill yendo al ge kaima nawanne we dji. 13 Embe djika, Parisi una embe dji, ni iwa taimane moren ba, nenem moren mal dje pene worden ge kune nayendo. Ni kandja djinden ge una kandja kende djinden dje kanne we dji. 14 Djimaka Jisas embe dji, na moro mal dje pene worno ge kune nayenda mal paro ba, na er woll al ge na kando, alla, na er puno al ge, na para kando pille, na nanam moro mal dje pene worno ge, kune yendo. Ba na embe yendo ge, ye nakaninj. 15 Na yendo mal ge ye djinj ba, ye nomane al pille djinj, na embe nayendo. 16 Na embe nayendo ba, una yenj mal ge na djill dal, na kandja kaima djino. Ba na kandja kaima djindo ge me embe paro. Na taimane molo una yenj mal nadjindo, man, na dje wori woll iwa ge, une na boll aike moro pille, na kandja ta djill dal, na kandja kaima djino. 17 God loye paro ge embe djindo, una soka molo kandja taimane djipill dal, kandja ge kaima panda we dje pepa embe boi. 18 Na moro mal ge iwa soka kandja taimane djipill pora dji. Na moraka, na Nena na dje wori woll iwa ge moraka, no soka mormoll we dji. 19 Djika kambono embe dji, ni nan nam moro ne? dji. Jisas embe dji, na moro ge ye nakaninj, alla na Nena moro ge ye nakaninj eri. Ye na kani dal, ye na Nena kanne we dji. 20 Jisas kandja dje moi ge, una ku opa iwo yei al, une manda molo dje moi. Ba une egeye nayei pille, una wo nabi.

Jisas embe dji, na puno al ge una are nawone we dji

21 Jisas ga kandja alla dje awo embe dji, na er punaka ye na moro al dulo kane naine, ye yenekne djingne djangne al goye. Na er puno al ge ye wone kune nayendo we dji. 22 Djika Juda una kandja dje pille embe dji, na er puno al ye wone kune nayendo we djindo ge, une yene ka to goyo dje pille djindo mo? dji. 23 Djimaka Jisas embe dji, ye makimb una mor ba, na kupill al iwa moro. Ye makimb una mor mal, na embe namoro. 24 Ye djingjang boll goye we djill ge, me embe paro. Na wale wondo we djill ba, ye pillgi nandji dal, ye djingjang boll goye we djill.

25 Djika ga embe dji, ni una ne mal wonden ne? dji. Djimaka Jisas embe dji, na asa kogo kindja ye wane woll mal, na ye dje awill pora dji. 26 Ye yenj mal na kandja merke djino paro. Ye singare yenj mal na omuk to auno ba, na embe nayendo. Na dje wori woll iwa ge, une kandja kaima djindo. Alla na kandja dji pill kandja ge, na una dje aundo.

27 Jisas kandja embe dji ge, yene Ne pille dji ba, ga pillpol natoi. 28 Jisas embe dji, ye Una Wombe amblo i pla worneke, na kaima moro mal ye pillpol tane. Ye embe yene kune, ye embe dje kanne, na nomana paro mal pille na kandja nadjindo, man, na Nena kandja beke awi mal ge djindo. 29 Na dje wori woll iwa singare wopake kando mal ge, na ege ege yendo. Yendo pille, une na kere naundo, man, une na boll aike moro we dji. 30 Jisas kandja embe djika, una merke une boll pillgi dji.

Una kaye pane ge er orko wone

31 Juda una pillgi dji una moi ge, Jisas embe dji, na kandja djindo mal, ye pille kane yei dal, ye na kogena una kaima moye, 32 kandja kaima ge pille kane yene. Yene ge, kandja ge ye wordaka, ye kaye par ge er orko po kiwa moye we dji. 33 Djika kambono embe dji, nono gollne ge Abraam moi. Una kaye pai mal ge no ta napapin. No kaye pa er orko wombon we djinden ge, me namba mal pai pille djinden ne? dji.

34 Djimaka Jisas embe dji, na kandja kaima dje ye aundo, una singare ke ye waninj una porapora mor ge, yenekne kaye pa molo singare ke yenj. 35 Una kaye pa nu kogo eri ye namoye. Ba God wariye ege ege molo pa moro pille, une 36 ye kaye par al dje i orko wori dal, ye er orko po kiwa kaima moye.

37 Na kando, ye Abraam gollye mor ba, na kandja djindo ge ye nomane al nayero pille, ye na to gopon dje yenj. 38 Na nena ombine dje na awi mal, na ye boll kandja embe djindo. Ba ye nane kandja djindo mal ye yenj we dji.

39 Djika, ga embe dji, no nane ge Abraam moro we dji. Jisas embe dji, ye Abraam wombaye molmaka, ye Abraam singare yei mal ye kune yemaka. 40 God kandja kaima dji pill kandja ge na ye dje awill ba, ye na to gopon dje yenj. Abraam embe nayenda. 41 Man, ye nane singare yendo mal ye embe yenj we dji. Djika ga embe dji, no mane kondwe wane no nakui. No nane taimane moro. Ge God moro we dji. 42 Djimaka Jisas embe dji, God ye nane moika, ye na kane wopake yemaka. God na dje wori woll pille ye na wopake kanmaka. Ba na nomana pai mal pille na nawoll, une dje wori woll. 43 Na kandja dje ye aundo ba, ye pillpol natonj ge, namba yei pille yenj? Na kandja djindo ge ye pille ine napai pille yenj. 44 Ye nane ge Satan moro. Une singare ke yendo mal ge, ye embe yembon dje pille yenj. Une kamasa una to golo woi mal ge, ipon une embe ye pa moro. Kandja kaima ge une nomane al nayero, une kandja kende djindo. Une kandja kende djindo ge, une kandjiye wo. Alla singare kende paro ge, une wal ne moro. 45 Ge pille, na kandja djindo ge, ye pillgi nadjinj. 46 Ye una mor al ge una ne mal molo na singare ke yendo we djinda? Ge man, na kandja kaima dje ye awill ba, ye namba yei pille pillgi nandjinj? 47 God wombaye mor ge God kandjiye djindo mal pir ba, ye God wombaye namoi pille, na kandja djill ge ye napir we dji.

Abraam namoi kune, Jisas, na moll we dji

48 Djika kambono embe dji, ni dumo Samaria iwa moren. Kum ke ni tukin al moro we djipin ge, kandja kune djipin we dji. 49 Djimaka Jisas embe dji, man, na kum ke tukna al namoro. Na Nena kandjiye amblo pla wordo ba, ye na kandjina kamblo kal worinj. 50 Una na kandjina amblo pla worne dje na nayendo. Ba Iwa taimanta na kandjina amblo pla woro, yene kane na yendo mal omuk tonda. 51 Na kandja kaima dje ye aundo, una na kandja djindo mal pille i dal, kaima nagoye, man we dji.

52 Ga embe dji, kum ke ni tukin al moi ge no kaima kanpin. Ge Abraam goi, propet kambono para goi ba, ni kandja embe djinden, una na kandja djindo mal pille i dal, kaima nagoye, man we djinden. 53 Nono nane Abraam goi ge, ni une kamblo aunden mo? Une goi mal ge propet ga porapora goi. Ni namba mal moyo dje yenden ne? dji.

54 Djimaka Jisas embe dji, na nanam kandjina amblo pla worno ge kune nayendo. Ba na Nena kandjina amblo pla worda, une ge ye Godne moro we djinj. 55 Alla ye une nakaninj ba, na kando. Na nakando we djino ge, kende djino, ye kandja kende djinj mal djino ba, na une kando, une kandja djindo mal na yendo.

56 Ye nane Abraam ge na egena yenda mal kanno dje yei. Une kane pagle wo pi we dji. 57 Djika, Juda una embe dji, ni kognumb 5-pela ten (50) namoren ba, ni Abraam kanin mo? dji. 58 Jisas embe dji, na kandja kaima dje ye aundo, Abraam namoi poke ge na kamasa moll pora dji we dji. 59 Jisas kandja embe djika, kambono ku iwo Jisas tambon dje yei ba, Jisas seke er lotu numb kerman gull pai al kere er orko pi.

Copyright information for `GAM