Luke 1

Luk pepa bolo Tiopilus awi

Iwa Kerman Tiopilus, wopake we djindo. Jisas kogo kindja ye po golo aglo er wo gun pi mal ge, una aike wani una kani. Kane, Jisas kandjiyembe tomaka, una merke nakani una pille, pepa bolo no awi. Kambono pepa boi mal embe, na pepa bolo ni auno dje pille moro. Na asamoll po Jisas boll aike wani una moi al kandja merke dje piyo dje pille dje pillka, yene kandjiyembe kaima pai mal kambono na dje awi pille, na pepa bolo ni aundo. Na embe yendo ge ni pupen, asa una ni Jisas kandjiye beke awi ge kandja kaima paro dje kanben.

Tau agelo iwa Sekaraia moi al embe dji, ni warin Jon moya we dji

Kadjiyembe ge embe mal paro. Asa iwa kerman Erot dumo Judia king moi kune ge, opa gale awi iwa ta moi; yene kandjiye Sekaraia. Yene epilye una moi ge una Apiya. Apiya una moi ge opa gale awi una epilne moi. Sekaraia game Elisabet moi ge epilye Aron una moi. Soka God nale al wopake mopillka, God lo merke dje awi ge soka kandja dji mal karkar yepill, ke ta nayepill. Embe yepill ba wombane ta namoi. Elisabet womba kuya kune nayei; soka yoga anagama yepill.

Kune ge, opa gale awi una God lotu numb kerman opa gale awo segra segra dje ye moi mal ge, Sekaraia epilye Apiya ge embe yembon dje yemaka, Sekaraia woika aike yei. Embe yemaka yenekne moi al, iwa ta God mapill numb numog po wal garka mirang wopake yendo wal ipo gale opa aundo iwa ge, kambono dje imbon dje pille moi. Opa gale awi una singare yei mal pille, tukye gakle mal embe ye wormaka, Sekaraia dji mal ge pai. Dje i mal ge, kambono dje wormaka Sekaraia er numog po wal wopake gale God opa ye awi. 10 Embe ye awo moika, una merke bekleto molo kamang ye molmaka, 11 God Iwa Kerman tau agelo ta dje worika, wo alta al agle woto, aglo moi. Sekaraia kane 12 gok dje kand golo moika, 13 tau agelo embe dji, Sekaraia, ni kand nagole! Ni kamang ye awin mal God pi pora dji. Ni gaman gama Elisabet wariye ta moya. Womba kandjiye ge Jon we djimben. 14 Ni wopake kaima pupenka, una merke wopake pille womba ge kane wo piye. 15 Una wo embe piye ge are Jon moya mal pille una wo piye. Are Jon molo God nale al iwa kerman moya. Une nu wain ne, bia kaima nanonda. Une me kumbe al moya kune ge, God Murble dje wordaka, wo une boll moya. 16 Une embe ye molo are kandja djindaka, Israel una merke nomane ake to, God Iwa Kerman pille we yene. 17 Propet Elaija yembe ye, nomane kerman pai ye wani mal Jon embe ye wane, wekle po God wonda mal kandja dje pene wordaka una piye. Ne wombe kambono nonga dje mor mal ge kerne, ellne tukne wo er taimane pundaka, kandja napir una ge alla kandja pille kond dume dje wanne. God Iwa Kerman moro ge yene unakye mor al, Jon po kandja dje orko wordaka, kambono pille God wonda dje pille wal amblokun yene we dji.

18 Tau agelo kandja embe djika Sekaraia embe dji, na iwoga yendo, na gamana ge anagama moro, ni kandja djinden ge, na namba mal piyo ne? dji.

19 Djika tau agelo embe dji, na Gepriel wondo. Na God boll moll una wondo. Une dje worika na wo ni moren al kandja dje awill ba, 20 ni na kende djindo dje pren pille, ni albin ake tondaka kandja nadjimben. Ni dall mopenka warin moyaka alla are kandja djimben we dji.

21 Una merke bekleto molo embe dji, une namba yei pille God mapill numb numog kanan moro ne? 22 Djimaka Sekaraia bekle wo, kandja djino dje yei man paika, une dall una aglene yenj mal embe yeika, kambono kane gok dje wal ta une boll yenda yei paro dje kani. 23 Sekaraia kogo opa gale yei pora djika, une er yene numbiye al po moi. 24 Moika, are gamegama Elisabet womba mogi. Elisabet numog molo pa pika takene 5-pela wo er pika, Elisabet embe dji, 25 asa na womba ta namoi, na ngandjill golo wanill ba, ipon God Iwa Kerman yene na ye wopake ye aundo we dji.

Tau agelo ta wo embe dji, Maria wombaye Jisas moya we dji

26 Elisabet womba moglo pa pika takene 6-pela er wo pika, God dje worika, tau agelo Gepriel wo Galili paknato Nasaret we dji yei al pi. 27 Une pi al ge ambo ta moi kandjiye Maria. Depit epilye iwa ta moi ge Josep we dji. Soka bolo imboll dje pille mopill. 28 Embe yeika tau agelo Maria moi al wo embe dji, wopake we djindo. God ni wopake pille awi, une ni boll moro we dji. 29 Djika Maria nomane toi, tau agelo kandja djindo ge me namba mal pai pille djindo ne? dje pi. 30 Tau agelo embe dji, Maria, ni kand nagole! God ni wopake pille aundo. 31 Ni womba moglo kupen ge warin ta moya. Kandjiye ye Jisas we djimben. 32 Une iwa kerman moya, una wo embe djine, God kupill al moro ge une wariye moro we djine. Yene gollye king Depit una kantau ye moi mal, God dje wordaka une po embe yenda. 33 Une king iwa kerman molo, iwa Jekop epilye una kantau ye pa moya, pora nadjinda, kaima molo pa punda we dje tau agelo embe dji. 34 Djika Maria embe dji, na wogana ta namoro, ni kandja djinden ge namba mal yenda ne? dji. 35 Tau agelo embe dji, God Murble ne, yene yembe dongall paro ge wo ni boll mopell. Embe yembellka ni womban moya ge wopake ta mal moya we dji. Una kane embe djine, ge God wariye kaima moro we djine. 36 Ni wamben Elisabet anagama yei pora dji, womba kuya mal namoro ba, une womba alla moglo moraka takene 6-pela er wo pundo; ipon wariye moya manda yero. 37 God embe yendo pille, wal porapora une yeno dje piya ge yenda kune yendo we dji. 38 Tau agelo kandja embe djika Maria embe dji, na God boiye ana moro. Une wal ta yeno dje piya ge yendambe dji. Maria kandja embe djika tau agelo kere er pi.

Maria er Elisabet moi al pi

39 Kune ge Maria yene konnye kunomye amblokun ye i, ola dje er Sekaraia numbiye al pi. Sekaraia numbiye yei ge kona distrik Judia kamkimb al ge yei. Sekaraia game gama Elisabet numb numogto moika, Maria po djembon to awi. 41 Maria Elisabet moi al djembon embe to awika, womba Elisabet kumbe al molo olup kerman yeika, God Murble wo er Elisabet tukye al pakna po moi. 42 Po moika Elisabet Maria moi al embe dji, ana kambono mor ge God kane wopake ye aundo ba, ni moren ge une ni kaima kane wopake ye awo, womba kumben al moro ge une kane wopake ye awo embe yendo. 43 Na ana kiwa moro ba na Iwa Kerman moro ge une megama ni molo na moll al wonden. 44 Ni na djembon to awin ge womba kumbena al ge wo pille olup kerman yendo. 45 God ni womban ta moya we dji ge, ni womban kaima moya dje pin mal pille, God Iwa Kerman ni kane wopake ye awi moren we dje Elisabet embe dji.

Maria gollang dji

46 Elisabet kandja embe djika Maria embe dji, na Iwa Kerman God moro ge na pille pla ye aundo. 47 God na i yem wori pille, na une boll wo kaima pille aundo. 48 Na une boiye ana kiwa moro; une na ye wopake ye aundo. Embe pille, ipon molo po are komato una embe djine, Maria moro ge God wopake ye awi ana moro we djine. 49 God yembe dongall paro ge une na pille wal kerman ye na aundo. Une kandjiye paro ge pla kaima paraka, ta mal kaima yendo. 50 Una God pille kand golo mor una ne, are moye una porapora God wandill golo wopake ye aunda. 51 Una kerman mopon dje yene ge, yenekne kogo yembon dje piye ge, God yembe ye molo amblo kal worda. 52 Una king kambono mor ge une amblo kal woro, una kandjine naparo una mor ge, une ga kandjine amblo pla worda. 53 Una koll golo moi una ge God kwa merke awi no kune yei. Ba una wal merke kane noi una ge une wal ta nawi; dje wori kiwa er pi. 54 God kogoye iwa Israel moi ge God ye molo pak to awi. Na wandill golo wopake ye Abraam auno we dji mal ge une nakeri, kaima awi. Nono gollne moi al God wo embe dji, Abraam wombaye mor ge ne, are moye ge na wandill golo awo pa moyo, pora nadjinda we dje Maria gollang embe dji. 56 Embe dji ge Maria Elisabet boll moika, takene sokara mal embe er wo pika, alla une kere er yem yene numbiye al pi.

Elisabet wariye Jon moi

57 Maria er pika Elisabet womba kuya manda yeika, wariye kui. 58 Womba moika God Iwa Kerman Elisabet wandill golo wopake ye awi we djimaka, Elisabet epilye una ne manda moi una pille Elisabet boll wo pi. 59 Embe yemaka ege 8-pela er wo pika, womba gakle kelip to kandjiye ye ne Sekaraia kandjiye pai mal ge, kambono embe ye aumbon dje pille yei. 60 Kambono embe yei ba Elisabet man dji, une kandjiye Jon we djimbon we dji. 61 Dji ba una embe dji, ni epilin una moi al kandjine embe ta napai we dji. 62 Kambono aglene bulo to womba newoga moi al embe dji, womba kandjiye ge ne mal ne djimbon ne? dji. 63 Embe djimaka Sekaraia yeika, una pepa iwo aumaka une bolo embe dji, womba kandjiye ge Jon we djimbon we dji. Una porapora kane aya dji. 64 Djimaka Sekaraia une dall una mal embe moi ge kune taimane pora djika, une kandja dje God kandjiye amblo pla wori. 65 Una moi ge kane kand golo, wal embe yei we dje kandjambe to wai djimaka, dumo Judia kamkimb al moi una porapora pille keri. 66 Una kandja embe djimaka una pi ge, yenekne nomane to pille, God Iwa Kerman womba ge kane wopake yei. Are womba ge namba mal moya ne? dje pi.

Sekaraia God kandja dji mal dje pene wori

67 Jon ne Sekaraia moi ge, God yene Murble dje worika wo une boll moika, God kandjiye seke pai mal ge, une dje pene woro embe dji, 68 God Iwa Kerman moro ge nono Israel una porapora pak to awo, top to i. Yene kandjiye kerman kaima pandambe dji. 69 God Iwa Kerman moro ge yene kogoye una Depit epilye una moi al, God ye molo iwa dongall ta moi ge dje ika, une wo nono i yem worda, ke naimbon. 70 Nono i yem worda we dji ge kamasa God kandja djika yene propet kambono pepa bolo pagi mal megye toi. Kambono pepa bolo embe dji, 71 are kunda yem una wo nono tambon dje yene ge, une ye molo kamblo kal woro awo, una wo nono ye ke ye awo embe yene ge, une nono i yem woro aunda. 72 Nono kokane Abraam ne, kambono asa moi una ge, God wandill golo awo une asa yeno we dji mal ge kaima nakeri; embe dji, 74 ye kand nagoye. Kunda yem una wo ye tambon dje yene ba, na ye boll molo pak to auno we dji. Na auno ge ye ege ege singare wopake ye, kondwe wopake wane, na kogena paro mal embe ye wanmoye we dji. 76 Sekaraia kandja embe dje kere, yene wariye moi al embe dji, ni ipon molo benka are una embe djine, God kona pla moro una ge ni yene propetye kaima moren we djine we dji. Une kondwe wonda al ni asamoll po ye wopake ye mopen we dji. 77 God unakye mor al ni po kandja embe djimben, ye singare ke ye waninj ge God kere awo, ye i yem woro inda we djimben. 78 Nono emill ye pai al wanmolo gopon pai ba, God kupill al molo nono pille wandill kerman golo awo, olpa awo wori. Nono mopin al do au djika, une nono boll amblo u dje aundaka wanmopon we dji. 80 Sekaraia kandja embe dje kerika, are womba Jon kerman moi poke ge, une nomane dongall paika, po dumo wapra yei al molo, Israel una moi al kandja dje awi.

Copyright information for `GAM