Luke 10

Jisas una 7-pela ten tu (72) dje awo kogo ye pume! dji

Are Jisas una 7-pela ten tu (72) dje i embe dji, na dumo kerman ne, kembis porapora puno al ge, ye soka soka dje molo asamoll er pume! dji. Une kandja buko dje embe dji, kwa bolo wopake yei pora dji, wallke nambon kune yendo ba, wallkne una merke namor. Ge pille, mau ne moro al kamang yene, une kogoye una dje wordaka, yene mauye al pakna po kwa wallke ine.

Ye pillme, na ye dje wornaka ye kog sipsip mal embe molo er kena kunda yendo una mor al pakna pine. Ye pine ge ye kon ne, ku moni ne, kakene kau ge porapora i napine. Ye kondwe pine al una moye ge ye djembon to naune. Una ta ye dje i numog worne ge ye embe djine, ye wopake pille mindalne arngan yenda molme! djine. Una arngan ye moi dal, ye wopake we djine ge kaima wopake moye. Ba una arngan ye namoye ge, ye wopake we dje aune ge, er yem ye boll wonda, ga boll napanda. Ye po numb ta moye al ge, gi dje moye, numb ta po, ta po embe nayene. una kwa aune ge ye i nane. Kogo una kogo yenj mal pille una embe aune ine. Ye po dumo ta pillau djineke, una ye dje i numog wori dal, kwa aune mal ge ye nane. Una ke panda moye ge, ye po i gun woro, God dumoye kantau yendo al ge er manda wo kerdo we dje aune. 10 Ye dumo ta pineke, una ye i numog nawori dal, ye pene molo embe djine, 11 no wopin ye no ye ke ye awi pille, ye numbine al toll no kakene dage paro ge, kill gulo woro kermon. Ye pillme! God dumoye kantau yendo al ge woi manda yei pora dji we djine. 12 Na kandja dje ye aundo, kamasa dumo Sondom una God wamo worika do sege yei. Ba una ye pille mop awi dal, kupill makimb ege pora djinda kune ge, God kaima to derpall ye kerda we dji.

God kandjiye napiye una ge ke wo ga boll wonda

(Matyu 11.20-24)

13 Ye dumo Korasin ne, Betsaida una imb ye boll wonda! Na ye boll aike molo, kogo dongall yell ye kani ba, kamasa dumo Taya ne, Saidon una ye wal kani mal kanmaka, kambono wandill kerman golo, toll to, ami dje molo, nomane ake tomaka. 14 God una kot yenda kune ge, dumo Taya ne Saidon una kot ye aunda ba, dumo Korasin ne, Betsaida una mor ge, une kot kerman ye aunda. 15 Ye dumo Kaperneam una mor ge yenekne kandjine amblo pla kaima worbon dje yenj ba, God ye kamblo kal woro, una gor dumo ge worda.

16 Kogoye una moi al une embe dji, ye kandja djineke una pille i dal, na kandjina ge pille ine. Una ye pille mop awi dal, na pille mop aune. Na kandja djina una pille nai dal, na dje wori woll una kandjiye pille naine we dji.

Una 7-pela ten tu (72) Jisas dje wori pi ge alla er yem woi

17 Una 7-pela ten tu (72) Jisas dje wori po wani ge, wo pille er yem wo Jisas moi al embe dji, Iwa Kerman, no ni kandjin al kandja djipin, una kum ke tukne al moi ge er orko pi we dji.

18 Djimaka Jisas embe dji, ye po embe yei ge na kanmoll, Satan kam kunakna mal kupill al poll dje yage kal toi. 19 Ye pillme! Na yembena dongall paro ge na ye aundo, ye ipo nomaga kallga una tondo wal moro ge kamblo kal woro, Satan yembe paro ge, ye kamblo kal worneke wal embe mal ye gaklene al naboya. 20 Ye kandja djine mal kum ke pille yene ba ye ge pille wo napiye. Ye wo piye ge, God kupill al molo ye kandjine buk al bolo pagi ge, ye ge pille wo piye we dji.

Jisas wo pille God awi

(Matyu 11.25-27 ne, 13.16-17)

21 Kune ge God yene Murble dje worika, wo Jisas boll aike moika, Jisas wo pille kamang ye embe dji, Nena, kupill makimb yero ge ni kantau yenden. Na ni kandjin dje awill mal ge, ni i seke worinka iwa kerman ne, nomane kerman pai una porapora pille nai. Ba ni kandjin na dje awill mal ge, ni ombine dje awinka, womba ker mal moi ge pille i pora dji. Embe yei ge ni wo pille nomanin pai mal pille yenka yei.

22 Wal porapora ge na Nena i na awi. Warye moro mal Ne taimane kando, una ta nakaninj. Ne moro mal wariye taimane kando, una ta nakaninj. Alla wariye ye molo Ne ombine dje una aunda ge, kambono ge aike kanne we dji.

23 Jisas kogoye una boll yenekne molmaka, Jisas kane ake to embe dji, ye wal kaninj ge God ye wopake ye awi pille kaninj. 24 Na kandja dje ye aundo, ye wal kaninj ge, iwa king ne propet asa moi ge kanbon dje yei ba nakani. Ye kandja pir mal kambono pupon dje yei ba napi we dji.

Dumo Samaria iwa ta wo Juda iwa ta pak to awi

25 God lo dje awi iwa ta wo Jisas nomane paro mo man dje su ye embe dji, tisa, na singare namba mal yenaka, God ye worda na gun molo pa moyo ne? dji.

26 Jisas embe dji, Baibel bolo wori pai ni kere kanden ge, kane namba mal pren ne? dji.

27 Une embe dji, ye God wopake kanme! dji. Ye ellne tukne ne, nomane ne, yembene boll God wopake kaima kane gi dje molme! dji. Kandja ta ge embe dji, ye yenekne kane wopake yenj mal ge, agane embe kane wopake yeme! dji we dje pepa embe boi we dji. 28 Djika Jisas pille embe dji, ni kune djinden. Ni embe yen dal, gun molo pa mopen we dji.

29 Iwa ge, Jisas na wal nakanden we dje djinda dje pille embe dji, na agana ye wopake ye auno ba, na agana ge ne mal ne? dji.

30 Jisas pille embe dji, kune ge iwa ta Jerusalem molo kere er dumo Jeriko puno dje pi. Po moika kunumb una wo ku i, konkunom i, iwa ge to derpall ye pagle kere er pi. 31 Er pumaka une goya paika, opa gale awi iwa ta wo kane kere kond djeke kill er wo pi. 32 Pika lotu numb kerman kogo yei iwa ta wo kane kere, kond djeke kill er wo pi. 33 Soka wo er pupillka, iwa ge pa moika, dumo Samaria iwa ta wo kane wandill golo awi. 34 Kopong wel i, nu wain i iwa gakle toi al kisai bolo, ka dage pagi. Samaria iwa ge iwa golo pai i yene kogye dogi mopye al woro, i er po numb pasindia ta yei al po numog woro kantau moi. 35 Kam tagika, Samaria iwa ge numb ne moi al ku awo embe dji, una ge ni kantau yemben. Ni wal top tamben, na ku aundo ge kune nayei dal, na alla yem wo, ni djimben mal auno we dji. 36 Jisas kandja embe dje kere, God lo dje awi iwa moi al embe dji, ni agana wopake ye auno we djin ge, kunumb una wo iwa toi ge, una sokara pi ge, una ne mal pille po wopake ye awi ne? dji. 37 God lo dje awi iwa embe dji, iwa wo wandill golo awi iwa po wopake yei we dji. Jisas embe dji, une yei mal ni po embe yemben we dji.

Jisas ana Marta ne Maria numbine al pi

38 Jisas kogoye una boll kondwe po dumo ta pillau djimaka, ana Marta we dji ge wo Jisas dje i er numbiye al pi. 39 Po moika Marta ambe Maria manda wo Jisas kake al ami dje molo, Jisas kandja dje moi mal une pille moi. 40 Moika ana Marta kwa gale moika, nomane merke paika, wo Jisas moi al embe dji, Iwa Kerman, na kwa galo, kogo merke yendo ba, na ambana nayendo ge, ni napren mo? Ni djimbenka une wo na boll amblo pille dje aunda we dji.

41 Iwa Kerman embe dji, Marta, Marta, ni kogo merke paro dje, kamalen ngundjo djinden. 42 Ba kogo porapora paro ge kogo taimane ta kerman kaima paro. Kogo Maria yendo kogo ge kerman paro, man we nadjino we dji.

Copyright information for `GAM