Luke 11

Una God kamang ye aune mal

(Matyu 6.9-15 ne, 7.7-11)

Kune ge Jisas po dumo ta molo kamang ye moi. Yei pora djika, kogoye iwa ta wo embe dji, Iwa Kerman, Jon kogoye una kamang yene mal une dje kambono awi. Une kandja dji mal ge, ni no kamang yembon mal, dje aumbenka pupon we dji.

Jisas embe dji, ye God kamang ye aune ge ye embe djine. Nane kerman, una ni kandjin amblo i pla wornembe. Ni dumen kantau yemben ge kantau yeye! No kwa ege ege nambon mal ni awe! Una wo no ke ye awi kere aupin mal embe, ni no ke yembon ge kere aumben. Wal ke no boll wo kamallne to djinda. Iwa ke no boll wo djinda, ni to i ellke worben we dji.

Jisas kogoye una moi al embe dji, ye una mor al taimane ta moya. Imina pakna pundaka, une yene ye noi una numbiye al po embe djinda, agana, una kond kam ellke yei una ye noll ge woi moro ba, na kwa ta naparo. Ni bret sokara aumbenka une no panda we djinda. Kandja embe djinda ba, age numog moya ge embe djinda, ni kere! Na numb kond tugill pora dji. Wombana boll aike ou pa kerpin, na aglo wo ni kwa auno nayendo we djinda. Na kandja dje ye aundo, age numog moi ge age wo dji ge napiya ba, age wo kandja ninga ninga dje dji dal, age numog molo aglo wo kwa aunda. Embe yenda mal ge na kandja dje ye aundo. Ye wal imbon dje piye ge, ye God djineke une ye aunda. Ye wal dulo kane imbon dje yene ge kane ine. Ye numb kond to guno dje moye ge God yapro aunda we dji. 10 Una ta God kamang ye awo wal ta ino we djinda ge inda. Una wal dulo kane ino dje piya ge kane inda. Una numb kond djillake al to guno dje moya ge God yapro aunda we dji.

11 Ye nane kambono mor ge warne pis ta nano we djinda ge, ye po nomaga ke iwo aune mo? Ge man. 12 Kondwale piye nano we djinda ge, ye po kallga iwo aune mo? Ge man. 13 Ye una mor ge nomane ke pai mor ba, ye wombane ye wopake ye awinj. Ye kamang embe yene, Nane kupill al moren ge ni Murblen dje worbenka no boll moya we dje kamang embe yei dal, une ye naunda dje napiye, une kaima aunda we dji.

Una embe dji, Jisas Satan boll kogo yendo we dji

(Matyu 12.22-30 ne, Mak 3.20-27)

14 Iwa ta kum ke tukye al molo djillake amblo pel yeika kandja nadji. Nadjika Jisas djika kum ke er orko pika une ge kandja alla dji. Una merke moi ge kane aya dji. 15 Ba una pende Jisas bakalo awo embe dji, kum ke ngambalne moro iwa Belsebul ge, Jisas yembe dongall awi pille une kum ke i wordo we dji.

16 Una pende Jisas yembe paro mo naparo dje pille su ye kane embe dji, Jisas, ni kogo ta mal yembenka, God dje wori won mal kanbon we dji. 17 Kambono nomane pai mal Jisas kane embe dji, na kandja djindo ge ye pillgi dje molme! Gapman ta moyaka yene unakye kambono i yemyem dje kunda boi dal, gapman ke yenda. Nub taimane pane una yene i yemyem dje kunda boi dal, ga dongall namoye. 18 Satan yene unakye boll i yemyem dje kunda boye ge namba mal aglo moye? Ge man, ke mal moye. Ni Satan boll kum ke i worden we djinj ba, 19 ye wombane kum ke i worinj ge, Satan boll i naworinj, God boll i worinj. Ye kandja djinj kune nayendo, ye yenekne wombane embe dje ye aune. 20 God yembe dongall ge na awi pille, na kum ke i wordo. Na embe yendo pille, God dumoye kantau yendo ge, ye pakna mor al ge yendo we dji.

21 Iwa dongall ta molo ei kolo i, yene numbiye al kantau ye moyaka, wal mogya ge wopake moya. Ba iwa ta yembe dongall kaima pandaka, wo une kamblo kal woro, iwa eiye pille we ye moi ge, iwa yembe dongall kaima pai una indaka, wal porapora numog moya ge, une unakye boll aike wo arpal nane we dji.

23 Una ta na boll aike namor ge, na kunda yem una mor. Una na boll aike molo i makai to namogir ge, sika to i djelldjell worinj una mor we dji.

Kum ke alla er yem woi

(Matyu 12.43-45)

24 Kum ke una tukne al molo kere er orko punda ge, une dumo ke nu naparo al po molo, numb wopake ta yenda gale pano dje pille dulo punda ba, man pandaka une embe djinda, na alla er yem po asa moll numb al ge puno we djinda. 25 Une er yem po numb asa moi al kanda, kiwa yendaka, brim dje wopake ye worne yenda. 26 Une kane er yem po yene unakye 7-pela kum ketawa kaima mor una, une kamblo awinj una dje i pakna worda. Asa kum ke taimane moi kune, iwa ge ke mal moi ba ipon, kum ke merke wo pakna moye ge, iwa ge ke mal kaima moya we dji.

Una wo piye mal

27 Jisas una merke moi al kandja dje awo moika, ana ta yau to embe dji, ni man kulo am awi non ge, God ye wopake ye awi ana moro we dji. 28 Djika Jisas embe dji, man, God kandja djinda mal pille yenj una mor ge, God wopake ye awi una mor we dji.

Una embe dji, Jisas kogo dongall yenda kanbon we dji

(Matyu 12.38-42 ne, Mak 8.12)

29 Jisas moi al una merke wo wo yemaka, una merke kaima molmaka Jisas embe dji, ye una mor ge nomane ke pai una mor. Ni kogo dongall yembenka kanbon we djinj ba, kogo dongall ta yeno ye nakanne we dji. Kamasa God iwa Jona boll kogo dongall yei ge embe kanne we dji. 30 Kamasa God iwa Jona boll kogo dongall yeika, dumo Ninipa una kani mal, ipon Una Wombe wal embe yenda ye kanne we dji. 31 Kamasa ana kerman ta molo dumo kam gunba kantau moi. King Solomon nomane kerman pai mal djinda piyo dje pille ana ge dumo moi al kere er woi. Er woi ge, are God kot ye aunda kune ge, ana kerman goi alla aglo er yem wonda ge, une wo ye ipon una mor al kane, God ye tonda we djinda. Alla, na woll ge na Solomon kamblo aundo we dji. 32 Kamasa Jona kandja djika, dumo Ninipe una nomane ake toi. Ake toi ge, are God kot yenda kune ge, dumo Ninipe una goi alla aglo er yem wo, ye ipon una mor al kane, God ye tonda we djine. Alla, na woll ge na Jona kamblo aundo we dji.

Una gaklene al talang yenda mal

(Matyu 5.15 ne, 6.22-23)

33 Una wamo lambo gale i gulo woro, baket menameto napagye. Una lambo gale ipo bo al pla pagyeke, una numog wone ge kanne. 34 Ye nalene paro ge wamo lambo mal embe paro. Ye nalene wopake pandaka, ye gaklene al talang ye au djinda ba, ye nalene ke pandaka ye gaklene al emill ye panda we dji. 35 Ye gaklene al talang ye au djindo ge, kanpol tane, emill ye djinda. 36 Ye gaklene talang ye au djinda, wamo lambo do poi djindo mal embe yendaka, ye nomane gaklene boll aike talang ye au dje kerda, emill kaima napanda we dji.

Parisi una ne, God lo dje awi una singare ke mal yei

(Matyu 23.1-36 ne, Mak 12.38-40 ne, Luk 20.45-47)

37 Jisas kandja dje kerika, Parisi iwa ta wo embe dji, ni wombenka kwa aike namboll we dji. Jisas une numbiye al numog po ami dje moi. 38 Jisas agle asamoll nu nawori, Parisi iwa ke kane gok dji. Djika Jisas embe dji, 39 Ye Parisi una mor ge, plet kap boll orkoto nu wopake worinj ba, ye nomane paknato paro ge, singare ke ke yeraka, una tambon dje yenj ge puka to paro. 40 Ye nomane dall pai una mor! Ye nomane paknato paraka, ye gaklene orko to paro ge God soka aike yei. 41 Ye nomane paknato wopake pandaka, wal wopake ye iwo una pak to aune. Embe yene ge ye nomane gaklene aike wopake panda we dji.

42 Ye Parisi una mor ge imb kerman ye boll wonda! God lo kerman asa dji mal, ye nayenj. Ye God wopake kanne ge ne, una djell pille wopake yene mal ge, ye nayenj. Lo kembis asa dji mal, ye ye kune yenj. Nola aiba ne, wal kerker ten-pela una iwo nonj ge, taimane ta God aume dji mal ge ye kune yenj ba, ye lo kembis are yene, lo kerman djindo mal asamoll yene we dji. 43 Ye Parisi una mor ge, imb kerman ye boll wonda! Ye lotu numb numog po iwa kerman mor al, wo pille koi ngibnge al po mor. Ye maket al pijka, una wo ye djembon tonj ge ye wopake pir. 44 Imb kerman ye boll wonda! Una kanpol nato molo, goll pene makimb be to wanne ba, makimb guloto una goi bis ye mor mal, nakanne. Una goi bis ye mor mal ye Parisi una embe mor we dji.

45 Djika God lo dje awi iwa ta embe dji, tisa, ni kandja embe djinden ge, Parisi una ke pir. Alla no para ke pirmon we dji. 46 Djika Jisas embe dji, God lo dje awi una mor ge imb kerman ye Parisi una boll aike wonda! Ye imb kerman paro i una awinjka kakinj ba, imb kakinj ge ye aglene megye taimane ta pakna woro pak to nawinj. 47 Imb kerman ye boll wonda! Kamasa ye gollne po propet to golo gull to pagi al ge, ye po goll pene al numb wopake take yenj ba, 48 ye nomane embe paro, no gollne po propet to goi pille, no goll pene al, numb wopake take aunmon dje pir. Embe pille, ye pora to goi dje pille yenj. 49 Yenj ge God nomane dongall pai mal pille embe dji, na propet dje woro, aposel dje woro yeno ba, una wo pende ye ke ye awo, pende to goye we dji. 50 Asa God wal porapora beki yei kune, una propet to golo woi. Alla wambo pa woi ge, ye una ipon mor ge kot ine. 51 Asa iwa Abel moi ba, yene age wo to goi. Una to golo pumaka, are kaima iwa Sakaraia ge God lotu numb kerman ne, alta yei al une pakna moika una po to goi. To goi wambo pa woi ge, ye una mor ge kot ine we dji.

52 God lo dje awinj una, imb kerman ye boll wonda! Una nomane wopake ine al ge, ye numb ki i nawinj, ye para er numog napinj. Alla una numog bon dje yenj ge, ye kond tugo awinj we dji.

53 Jisas kandja embe dje kere er pika Parisi una kumbene ke kaima yei. Are ga Jisas boll kune merke kandja dji. 54 Ta djinda ale yendaka, kandja kot ye aumbon we dji.

Copyright information for `GAM