Luke 14

Iwa ta ke toi gakle yake pai ge Jisas ye wopake ye awi

Ege Sabat yei kune Parisi ngambale pai iwa ta djika, Jisas yene numbiye al po kwa no moi. Moika, Parisi una, Jisas namba mal yenda dje pille kane kane moi Kane molmaka iwa ta ke to, gakle yaki pa moi ge wo Jisas moi al manda moi. Wo moika, God lo dje awi una ne, Parisi una moi al Jisas embe dji, ege Sabat yero kune ge, una ta ke tonda ge, nono ye wopake ye aumbon mo man ne? dji. Djika kambono pille kandja ulle ta nadji. Jisas iwa ge amblo ye wopake ye awika, une kiwa moika Jisas dje wori er pi. Er pika Jisas embe dji, ye una mor ge ege Sabat yendo kune ge, ye kogne kau mo, ye warne ta po nu tupa to pane ge, ye po i orko worne mo man ne? dji. Djika una pille kandja ulle ta dje yem worne napai.

Una yenekne kandjine amblo kal worne

Una Jisas boll aike kwa nambon dje pille woi una wo bo sia ngibnge al ami djimbon dje yemaka, Jisas kane kandja buko dje embe dji, iwa ta ana ino dje pille, kwa kerman nambon we djinda. Une ni djindaka, ni wo kwa kambono boll aike namben ba, bo sia ngibnge yero ge ni po namopen; man panda, iwa kerman aike dji iwa ta wondaka, numb ne ni moren al wo embe djinda, bo sia yero ge ni namopen, une wondo ge wo moya we djinda. Nub ne wo kandja embe djindaka, ni ngandjill golo er bo sia ulle al po mopen. 10 Ni embe nayemben. Una kwa aike namboll we dji dal, ni asamoll po bo sia ulle al po mopen. Ni po embe mon dal, une wo embe djinda, agana, ni ba namopen. Bo sia ngibnge al po mopen we djinda. Une wo embe yenda ge, una aike mor nalene al, ni kandjin kerman panda. 11 Una yenekne kandjine amblo pla worne ge, God amblo kal worda. Ba alla, una yenekne kandjine amblo kal worne ge, God amblo pla woro aunda we dji.

Una wal awo ulle imbon dje pille naumbon

12 Iwa kwa gale Jisas dji iwa moi al, Jisas embe dji, ni kwa kerman gale aumben pandaka, ni una ye non una ne, ni agan kambono ne, nenem unakin ne, wal merke kane nonj una manda mor ge, ni kwa gale naumben. Kambono wal ulle awo yem worne dje yenden ge kune nayendo we dji. 13 Ni kwa gale aumben pandaka, ni iwaana wal kane nanonj una ne, gaklene ke yendo una ne, kakene aglene ke yendo una ne, nalene emill yendo una mor ge, ni djimbenka kambono wo ni boll aike kwa nane. 14 Kambono mor ge wal ulle awo yem worne naparo. Ge pille, God ni ye wopake ye aunda. Are una wopake molo goi una alla aglo er yem wone kune ge, God ni top aunda we dji.

Are una po God boll kwa aike nane

(Matyu 22.1-10)

15 Jisas kandja embe djika, kwa aike no moi iwa ta Jisas moi al embe dji, God dumoye kantau yendo al, una po God boll kwa aike nane ge, wopake moye we dji. 16 Djika Jisas kandja buko ta dje une moi al embe dji, ege ta iwa ta kwa kerman gale pagyaka, una merke wo na boll aike nane dje pi. Una moi al ge une embe dji, ye er wome! dji. 17 Kwa kerman nane ege manda yeika, une boiye iwa ta dje worika, po dji una moi al embe dji, no kwa kepin pora dji, ye er wome! dji. 18 Ba una porapora no nawombon paro we dji. Iwa taimane ta embe dji, mau ta yei ge na top toll, na po kanno pai; na nawono we dji. 19 Iwa ta embe dji, na kog kau tenpela top toll. Kogo yene mal po kanno; na nawono we dji. 20 Iwa ta embe dji, na ana ipon manda ge ill, na nawono we dji. 21 Kambono kandja embe djimaka, iwa kerman boiye er yem po dje awika, iwa kerman tukye ke toika embe dji, ni ola dje er yem po dumo kerman paknato kondwe kembis ne, kerman porapora wane, una wal kane nanonj una ne, gaklene ke yendo una, nalene emill yendo una, kakene aglene ke yendo una porapora djimbenka, er na numbna al wonembe dji.

22 Une kandja dji mal, yene boiye iwa po embe ye kere, er yem po iwa kerman moi al embe dji, ni djin mal na po djill ba, una woi ni numbin al sill nadjindo we dji. 23 Djika iwa kerman embe dji, ni dumo kerman kere er orko po kondwe al ne, kwa mau kondwe ge, djimbenka, una wo na numbna al to sill djinebe! dji. 24 Iwa kerman embe dji, na kandja dje ye aundo, na asa djill una mor ge wo na kwaina kaima nanane, man we dji.

Jisas boll aike wan mopon mal

(Matyu 10.37-38)

25 Jisas pi al una merke are pumaka, une kane ake to pagle una moi al embe dji, 26 iwa ta er na moro al wono dje piya ge, asamoll une yene neme ne, game wombaye ne, age ambe ne, yene gakle al kane ke kanda. Une ga kambono kane ke nakani dal, une na kogena una moya kune nayenda. 27 Una ta yene iko pera ge i nakaki dal, une na kogena una moya kune nayenda.

28 Ye una mor al iwa ta numb plakill takno dje piya. Une asamoll ku moni yendaka, pille kune ye pagle are numb takda. 29 Man pandaka, une simen kiwa ye pagle, numb plakill takno dje yenda ge yene kuye ge pora djindaka, una wo numb ge kane po ye, bakalo aune; 30 une numb takno dje yei ba, une take pora djinda kune nayendo we djine.

31 Iwa king ta moya, yene ami una ten tausen (10,000) moye. Alla king djell ta moyaka, yene ami una twenti tausen (20,000) moye. King asamoll moi una namba yenda? Une asamoll ami dje moyaka yene una boll kandja dje piye. 32 Yene kunda yeno dje piya ba yenda kune nayei dal, une kandja sigye dje wordaka, po king djell ta moya al embe djinda, man, kunda nayembon we djinda.

33 Embe pille, ye yenekne wal kane nonj ge porapora nakeri dal, ye na kogena una moye kune nayenda we dji.

Ap ke mal moi ge Jisas kandja buko dji

(Matyu 5.13 ne, Mak 9.50)

34 Ap wopake nonmon ba djugo nayei dal, ye namba mal yeneke alla djugo yenda? Man, ap ge ke moi pora dji. 35 Una ipo mau al worne mo, mau mole gaye ge kune nayenda. Una seke woro kerne mal paro. Ye kamallne paro, na kandja djindo ge pillme! dji.

Copyright information for `GAM