Luke 15

Kog sipsip er take dje pi mal Jisas kandja buko dji

(Matyu 18.12-14)

Una ku takis i una ne, singare ke ye wani una porapora, Jisas moi al kandja ta djinda pupon dje wo moi. Molmaka Parisi una ne, God lo dje awi una Jisas kandjiye amblo embe dji, singare ke ye waninj una Jisas boll aike kwa no mor we dji. Djimaka Jisas kandja buko ta dje yem woro awo embe dji, ye una mor al iwa ta kogye sipsip wan andret (100) moye. Taimane ta er take dje pi dal, une namba yenda? Sipsip naindi nain (99) kwa no moye al ge, une kere, taimane ta er take dje pi al une dulo po inda. Une dulo po kani dal, une wo piya. Sipsip ge amblo i pedange al woro kake i er yem numbiye al wonda. Une yau tondaka, yene ye noi una ne, yene unakye ge porapora wo makai to moyeke, une embe djinda, na kog sipsip er take dje pi ge na kane ill pora dji. Nono wo pille aumbon we djinda. Jisas embe dji, na kandja dje ye aundo, iwa taimane ta singare ke ye wanda mal pille keri dal, kupill al mor una ge wo kerman piye. Alla una 99 mor ge, no nomane ake tambon ba ke nayepin we djine una ge, kupill al mor una wo embe pille naune we dji.

Ku ta er take dje pi mal Jisas kandja buko dji

Ana ta ku wan kina tenpela numbiye al woro yendaka, ku taimane ta er take dje pi dal, une namba yenda? Une wamo suwa gale sipdje kuro, numbiye al dumok kuso, yembe ye dulo kanda. Ana ge dulo molo kane i dal, une djindaka yene ye noi una ne, yene unakye wo makai to moyeke, ana ge embe djinda, na ku ta yell er take dje pi ge, pa moi, na kane ill pora dji, nono wo pupon we djinda. Jisas kandja dje embe dji, 10 na kandja dje ye aundo, una ta singare ke ye wanda keri dal, ana ge wo kerman pi mal ge, God tau agelo kane wo embe eri piye we dji.

Iwa ta wariye soka mopill ge ta er take dje pi

11 Jisas embe dji, iwa ta moi ge wariye soka mopill. 12 Warye are moi ge embe dji, nena, ni kog mogoi merke moro ge, no soka omuk to aumben mal, na ipon awe! dji. Embe djika nane wal mogi ge omuk to wariye soka awi. 13 Warye are moi ge ege sokarita molo, ne wal awi ge ipo ku bolo i, er dumo ellke tambye ta pi. Une po ku ipi mal, wal aulaul ye no wanika, kuye ge pora dje keri.

14 Pora djika une dumo moi al kam koll kerman yei. Wal ta nonda nayei; une koll kerman toi. 15 Toika une makimb ne iwa ta moi al po embe dji, ni kogo ta panda na yeno we dji. Iwa ge embe dji, na kogna mor ge ni po kulo ye mole! dji. 16 Iwa ge kandja embe djika, une po kog kulo ye moi ba una wo kwa mokna ta nawi. Une koll kerman toika, bale gakle kog no wori moi ge une i nanaka kumbena pundaka moyo dje pi.

17 Une kandja embe dje pille, yene nomane ake to embe dje pi, na nena boiye una kwa nonjka, kumbene pundaka mor ba, na kiwa molo kam koll golo moro. 18 Na alla er yem po nena moro al embe djino, nena, na ni ye ke ye awo, God boll aike ye ke ye awill. 19 Ni na warna we nadjimben. Na una kiwa, ni kogen una mal embe moyo we djino we dji.

20 Une kandja embe dje pagle, er ne moi al puno dje yei. Une ellke pika, newoga kane, wandill kerman golo, muk dje wo wariye kagle gume djillake to noi. 21 To noika wariye ge embe dji, nena, na ni ye ke ye awo, God boll aike ye ke ye awill. Ni na warna we nadjimben. Na una kiwa, ni boin una mal embe moyo we dji. 22 Une embe dji ba, newoga boiye una moi al embe dji, ye po na kon momo wopake kaima worill yero ge, ola dje iwo une woro aune. Agle ring iwo une woro awo, kake kau iwo woro awo, 23 kog kau wombe kerman ta moro ge iwo to keneke, nono porapora wo pille nambon. 24 Na warna golo er take dje pi ba, alla ipon gun molo er yem woi we dji. Kandja embe djika kambono kwa mokna kerman gai no moi.

25 Kambono kwa no molmaka, wariye komne mauye al kogo ye wanmolo, er yem numb al manda wo pi, una numog to molo gollang dje, kogoll ye molo djimaka, 26 une boi iwa ta moi al embe dji, una numogto dje molo djinj ge, namba yei pille dje mor ne? dji. 27 Boi iwa ge embe dji, ni agan asa er take dje pi ba, ipon wopake wane er yem woi ge, ni nan wo pille kog kau wombe kerman ge to kei no mor we dji. 28 Djika iwa komne elle kumbsika numb al punda nayei. Newoga bekle wo embe dji, ni numog wombenka kwa aike nambon we dji. 29 Ba, iwa komne embe dji, na kognumb merke ni boll kogen ye molo pill, kogke ta nayell. Ni kandja porapora djin mal na po yell ba, ni na ye noll una boll aike wo pille nambon dje kog meme taimane ta nawin. 30 Alla ni warin woi ge ni wal awin mal, une ipo kondwe ana awo yas woro kere er yem woi ge, ni une ge wo piya dje pille kog kau wombe kerman to ke aunden we dji. 31 Djika newoga embe dji, warna, nono nonekne mopill. Na wal porapora moro ge ni wal yero. 32 Ni agan golo er take dje pi, alla gun molo er yem woika, nono wo kerman pille kwa nonmon ge kune yendo we dji.

Copyright information for `GAM