Luke 2

Maria wariye Jisas moi

(Matyu 1.18-25)

Kune ge dumo Rom iwa kerman Sisa Ogastus molo embe dji, na dumo makimb kantau yendo al ge, una porapora kandjine bolme! dji. Asa una kandjine nai, ipon bopon we dji. I poke ge, Sairinias propins Siria kantau ye moi. Sisa Ogastus kandja embe dje worika, una porapora er yenekne unakne moi al po kandjine bopon dje er pi. Josep unakye kaima moi ge king Depit unakye kambono moi. Embe yeika une distrik Galili paknato Nasaret kere, er dumo Judia paknato Depit makimbye Betlem we dji yei al ge pi. Josep Maria ino dje yeika, Maria womba kumbe al moika, soka aike kandjine bopoll dje er pupill.

Po Betlem mopillka Maria womba kuya ege manda yei ba, numb moi ge una pai sill dje keri. Kog kau numbine ta yei al soka po mopillka, Maria wariye komne kui. Maria womba i kon allap were, kog kau kwa nono yei bokis al ge, womba i pakna worika ou pa moi.

Tau agelo ta wo kog sipsip kantau moi una moi al kandja dje awi

Imina pakna pika dumo Betlem orkoto, una pende yenekne kogne sipsip kantau ye moi. God Iwa Kerman tau agelo taimane ta dje worika, kog sipsip kantau moi una porapora moi al, God talangye au kerman djika, kambono kane kand kerman goi. 10 Tau agelo embe dji, ye kand nagoye. Na kandja wopake ta paro ge dje ye aunaka ye piyeke, una porapora piyeke, ellne tukne arngan yenda. 11 Nono ipon mormon kune ge, iwa Depit dumoye al ana ta womba kui. Womba moro ge Iwa Kerman Krais. God unakye i yem woro aunda iwa. 12 Womba pa moro, ye po kanne. Kon allap wero, i kog kau bokis kwa nono yei al ge wori ou pa moro. Ye po kanme! dji.

13 Tau agelo kandja embe dje kerika, ola dje tau agelo ami una mal merke embe womaka, kambono aike molo God kandjiye amblo i pla woro embe dji, 14 God kaima pla moro una ge, yene kandjiye kerman pandambe! Une makimb una kane wopake ye awi ge, arngan yenda moye we dji.

Kog sipsip kantau moi una womba Jisas kanbon dje pi

15 Tau agelo kandja embe dje kere er kupill al pumaka, kog sipsip kantau moi una embe dji, nono ola dje er Betlem po God Iwa Kerman yendo mal kandja djindo ge kanbon we dji. 16 Embe dje kere, ola dje po kani. Maria ne Josep mopillka, wombane ge kog kau kwa nono yei al bokis ge ou pa moi. 17 Kog sipsip kantau moi una po womba ge kane, tau agelo kandja dji mal ge kambono kandjambe tomaka, una moi ge pi.

18 Kambono kandja embe dji ge una pille, aya dji. 19 Ba Maria ge pille, i tukye al pakna woro pille pille moi. 20 Kog sipsip kantau moi una ge alla er yem pi. Kondwe tambye po yenekne embe dji, tau agelo wo nono boll kandja dje awi mal ge womba kaima moi we dje molo wo pille, God kandjiye amblo pla woro er pi.

Womba Jisas moi ge kandjiye yei

21 Womba Jisas ge moika, ege 8-pela er wo pika kambono yene gakle kelip to, kandjiye ye awo Jisas we dji. Maria womba kumbe al namoi kune, tau agelo wo kandja dji mal ge, kambono womba kandjiye ye Jisas we dji.

Soka Simeon ne, Ana, womba Jisas kanpill

22 Asa Mosis lo pepa bolo pagi mal ge Josep ne Maria embe ye tau mopill. Ege pende er wo pika God nale al djengimb moi ge pora djika, soka Jerusalem po womba Jisas God aumboll dje i pupill. 23 God lo asa dje awo bolo pagi ge embe dji, una warne komne moyeke iwo nanam aune we dji mal ge, soka embe ye ipo aupill. 24 Ka pulma soka mo, ka imul wombe soka to gale iwo na opa ye aune we dji mal ge, soka po embe yepill.

25 Kune ge Jerusalem iwa Simion we dji ge moi. God Murble une boll moika, une singare wopake ye, lotu kune mal embe ye ye yei una moi. Iwa ta wo Israel una i yem worda we dji ge Simion iwa ge wonda dje pille tau moi. 26 Moika asa God Murble wo Simion moi al embe dji, God iwa Krais dje worda wonda we dji ge, ni gun molo, kane pagle are gopen we dji. 27 Dje worika Simion er lotu numb kerman yei al pi.

Po kani womba neme soka molo Baibel kandja bolo wori pai mal ge pille, womba iwo God aumboll dje yepill.
28 Simion kane, manda pika soka wombane ge aupillka, une kagle i God kandjiye amblo pla woro kamang embe yei, 29 womba ta kanben we djin ge, na kanill pora dji. Na ni boin una moro, na tukna arngan yendaka goyo. 30 Na iwa ta dje worno wo ye i yem worda we djin ge, na nalena al kaima kanill pora djindo. 31 Una kurwo kama porapora kanneke, 32 une kogo yenda mal, nono Israel una kandjine kerman panda. Une wamo suwa do au djindo mal embe moyaka, Juda una pakna namor una ge boll porapora kanne we dji.

33 Simion kandja embe djika, womba neme pille, no warne moro ba, une ta woi djindo dje pille, soka aya djipill. 34 Simion embe dji, ye soka mormell ge God ye boll ye wopake ye aunda we dji. Simion womba me Maria moi al embe dji, womba God dje wori ge, une kandja djinda mal Israel una merke piye ba, merke napiye. Una kandja ta pandaka, po bake al molo baka yenj mal embe, une embe mal moyaka una kane man djine. 35 Una kandja embe djine ge kandja nomane al seke panda ge, er pene wondaka una piye. Maria, bainat ta ni mindalen al boyaka ngembill yendaka ke kaima pupen we dje Simion embe dji.

36 Kune ge propet ana ta moi. Ana ge kandjiye Ana we dji. Ana we dji moi ge iwa Panuel abore moi. Panuel ge Aser unakye moi. Asa Ana ge er iwa po moika, kognumb 7-pela moika woge goi. 37 Goika ana ge ana kangill molo pika, kognumb 8-pela ten 4 (84) er wo pi, anagama yei. Ege ege ana ge po lotu numb kerman numogto molo God kogoye ye, kwa mokna nano, kamang eri ye moi. 38 Kune ge Simion Maria boll kandja dje mopillka, anagama Ana we dji moi ge manda wo, womba ge kane embe dji, God ni wopake yenden we dji.

God dje wordaka iwa ta wo Jerusalem i yem woro inda we dji ge, una pende iwa ge wonda dje pille tau moi. Molmaka, ana ge po womba Jisas are kogo yenda mal, kandja dje kambono ge awi.

Josep ne Maria er yem Nasaret pupill

39 God lo porapora dji mal ge, soka embe ye kere, er yem po yenekne dumene Galili paknato Nasaret po mopill. 40 Womba Jisas ge yake kerman moika, nomane wopake paika, God wandill goi me ge une boll moi.

Womba Jisas er lotu numb kerman po yei mal

41 Kognumb ege ege Jisas neme soka er Jerusalem pupill. Ege kerman Pasopa we dji ge yeika, soka po kwa mokna gai namboll dje er pupill. 42 Kune ge Jisas kognumb 12-pela moi pora djika, Juda una yenekne singare ye ye yenj mal, une neme boll aike er Jerusalem po ege kerman ge kwa nambon dje er pi. 43 Pumaka ege kerman ge yeika, yenekne kwa mokna gai ge no moi. Kwa noi pora djika, Jisas neme soka ne, yenekne unakne boll er yem bon dje yei ba, womba Jisas kambono boll aike napi; une Jerusalem pakna pa moika, neme soka nakanpill.

44 Ege taimane ta er wo pika, kambono po kond tambye pumaka, womba Jisas neme soka ye molo, yenekne unakne ne, aike pi una ge po dje kanpill. 45 Ba, womba Jisas aike napi. Soka alla dulo yem Jerusalem pupill. 46 Dulo pupillka, ege sokara er wo pi. Soka er lotu numb kerman numog po kanpill, una kerman kambono moi al Jisas pakna moi. Kambono kandja dje aumaka, une pille kandja dje yem woro awika embe ye moi. 47 Womba Jisas kandja embe djika una kerman kambono pille gok dji. Womba ge kembis moro ba, une nomane wopake pai paro we dji. 48 Kambono kandja embe dje molmaka, Jisas neme soka kane gok djipill. Womba me Maria woi ge embe dji, warna, ni no boll aike nawon ge namba yei pille yen ne? dji. No nan boll ni pille dulo wanpill, man pai pille, nomane to wonmoll we dji.

49 Djika womba Jisas embe dji, ye namba yei pille na pille dulo wonmell ne? dji. Na nena numbiye al moyo mal paro ba, ye nakanpill paro we dji. 50 Embe dji ba, soka kandja dji ge me napupill.

51 Napupillka womba Jisas er woika, neme boll aike er yem Nasaret pi. Po molo, soka kandja djipill mal ge, une pille ye moi. Ba wal porapora ye pai ge yene me Maria pille i nomane al woro moi. 52 Jisas yake kerman moika, yene nomane dongall paika, God une kane wopake kaima yeika, una pille wopake ye awi.

Copyright information for `GAM