Luke 6

Sabat ege yei kune ge Jisas po kogo yei

(Matyu 12.1-8 ne, Mak 2.23-28)

Ege Sabat yeika, Jisas wit mau pakna pika, yene kogoye una boll aike wit megye pende i amblo i wikai ye tandwane i woro noi. Nomaka Parisi una embe dji, ipon ege Sabat yero ba, ye wo kogo embe yenj ge ye Mosis lo to worinj we dji. Djimaka Jisas embe dji, Depit asa yei mal una pepa bolo pagi ge ye kere nakani paro. Depit ne, aike wani una boll koll toi. Une er God numbiye al numog po molo bret yei ge i no, age kambono moi ge awi we dji. Ba bret awi ge God awi bret yei. Una kiwa mor ge nanonj, una opa gale awinj una ge nonj. Embe yei pille ege Sabat yero ge, una singare yene mal Una Wombe wal ne moro we dji.

Iwa ta agle ke yei Jisas ye wopake yei

(Matyu 12.9-14 ne Mak 3.1-6)

Ege Sabat ta yeika, Jisas er lotu numb numog po molo una moi al kandja dje awi. Dje awo moi al ge iwa ta moi. Yene agle woto ke ye, mapa to pai. God lo dje awi una ne, Parisi una Jisas moi al kane gi dje moi, ipon ge Sabat yero, Jisas iwa ge ye wopake ye awi dal, nono une to kot ye aumbon dje pille moi. Kambono nomane al embe paika, Jisas kane, iwa agle ke yei iwa moi al po embe dji, ni aglo wo una mor al ge pakna mole! dji. Djika iwa ge wo pakna aglo moika, Jisas embe dje kambono moi ge awi, nono ege Sabat yero kune ge, una ye wopake ye aumbon mo, ye ke ye aumbon? Nono una amblo pille dje aumbon mo, nono una to gopon ne? dji. 10 Embe dje kere Jisas una moi al, kane wainambo dje kane kere, agle ke yei iwa moi al kane embe dji, ni aglen amblo du djiye! dji. Une agle amblo du djika, alla kiwa yei.

11 Embe yei ba Parisi una ne, God lo dje awi una ellne kumbsika, Jisas ye ke ye aune mal ga po kandja dje pi.

Jisas Aposel 12-pela dje i

(Matyu 10.1-4 ne, Mak 3.13-19)

12 Kune ge Jisas er makimb mekbe al po kamang ye God awo moika kam tagi. 13 Tagika, yene kogoye una dji womaka una 12-pela dje i. Une embe dji, na ye kandjine Aposel we djino. Na namba awo, na ye dje wornaka, ye pille po na kogena yene we dji. 14 Dji ge Saimon kandjiye gun ta yei Pita we dji. Ta Pita age Andru, ta Jems, ta Jon, ta Pilip, ta Bartolomyu, 15 ta Metyu, ta Tomas, ta Alpias wariye Jems, ta Saimon epil Selot moi una we dji ge, 16 ta Jems wariye Judas, ta Judas Iskariot Jisas i kunda yem una awi iwa.

Jisas una merke ke toi moi ge i gun woro awi

(Matyu 4.24-25 ne, Mak 3.7-12)

17 Jisas kogoye una boll makimb mekbe ge kere er kal woi. Jisas dumo tune ta yei al po aglo moika, kogoye una merke woi. Distrik Judia una ne, Jerusalem una ne, nambis una, dumo Taia ne, Saidon moi una porapora yenekne dumene kere er woi. 18 Kambono Jisas kandja djinda pupon dje pille, ke toi mor ge, i gun woro aunda dje pille wo moi. Una kum ke tukne al moi ge Jisas wo kandja djika, kum ke er orko po keri. 19 Jisas nomane dongall ge er orko woika, una porapora ke to pai moi ge kiwa moi. Una merke kane Jisas gakle abpon ge nono ke toi mormon ge pora djinda dje pille, Jisas abpon dje embe yei.

Una wal kane nanane ge wo pille moye

(Matyu 5.1-12)

20 Jisas yene kogoye una moi al kane embe dji, ye una wal kane nanane ge, ye wo pille moye. God yene dumoye kantau yendo ge ye dumene yero. 21 Ye ipon kam koll golo mor una ge, ye wo pille moye. Are koll nagoye. Ye ipon kimb ye mor una ge, ye wopake pille moye. Are ye po yene. 22 Ye Una Wombe pille we yene ba alla, una ellne kumbso awo, mop awo, kandja ke dje awo, ye kandjine abi dal, ye wo pille moye. 23 Kambono embe yene ge ye kane wo kaima pille moye. Are ye kupill al pine ge, ye top kerman ine. Kambono ye ke ye awinj mal ge, yenekne gollne kambono, propet ye ke awo embe ye wani mal, ipon ge embe eri ye pa mor. 24 Ye wal merke kane nonj una mor ge, imb ye boll wonda! Ipon manda ge ye wopake pille mor, ba are ye wopake namoye. 25 Ipon ye kwa nonj kubo yendo mor ge, imb ye boll wonda! Are ye koll goye. Ipon ye una po ye waninj ge, imb ye boll wonda! Are ye kimb kallngane yene. 26 Una ye kandjine amblo pla worne ge, imb ye boll wonda! Asa ye gollne wo propet kende moi al kandjine amblo pla woro yei mal embe ge, ipon una ye kandjine amblo pla worinj we dji.

Kunda yem una mor ge nono ye wopake ye aumbon

(Matyu 5.38-48)

27 Na kandja djindo mal ye pille mor ge, na kandja dje ye aundo. Kunda yem una moye al, ye singare wopake yene. Una wo ye kane ke ye awi dal, ye ye wopake ye aune. 28 Una ye mangal to awi dal, ye kandja wopake dje aune. Una ye ke ye awi dal, kambono wopake moye dje pille kamang ye God aune. 29 Iwa ta ni paunin al tonda ge, ni kane ake to paunin yemto aumbenka, aike tonda. Iwa ta ni kon jaket inda ge, alla kon pakna aike ino we dji dal, ni man we nadjimben. 30 Iwa ta wo, ni wal ta aumben we dji dal, ni aumben. Iwa ta wo ni wal i punda ge, ni dje i yem naworben. 31 Una ye ye wopake ye aune dje pir mal ge, ye wopake ye una embe aune. 32 Una wo ye wopake kanneke, ye kane yem wopake kanne ge, God ye top aunda mo? Man, naunda. Ye yenj mal embe ge, ke yenj una kambono yenekne ye noi una boll kane wopake embe kaninj. 33 Una wo ye wopake pille auneke, ye wopake pille awo yem worne ge, God ye top aunda mo? Man, naunda. Ye yenj mal embe, ke yenj una ye kune yenj. 34 Ni wal aumben ba, wal ulle awo yem worno dje yenden ge, God ni top aunda mo? Man, naunda. Ke yenj una mor ge yenekne wal aune ulle awo yem worbon dje pille yenj. 35 Ye embe nayene. Kunda yem una mor ge ye wopake kane, wopake ye aune. Ye wal aune ge, kiwa aune. Ye awo ulle i yem naworne. Ye embe yei dal, God ye top kerman aunda. Ke yenj una ne, God wopake we dje nawinj una, God kane wopake pille aundo. God embe yendo ge, ye kane yene. Yei dal, God kerman pla kaima moro ge, ye une wombaye kaima moye. 36 Ye Nane wandill golo wopake ye aundo mal ge, ye wandill golo wopake ye embe yeme!

Una singare yene mal nono nadjimbon

(Matyu 7:1-5)

37 Jisas embe dji, una singare yene mal ye nadjine. Ye dje nawi dal, God ye singare yene mal ye dje naunda. Ye una kandjine mopne nabiye ge, God ye kandjine mopne nabiya. Una wo ye ke ye aune ge, ye alla kere awi dal, God ye ke yenj ge alla kere aunda. 38 Ye una wal auneke, God wal ye aunda. Wal kembis ta naunda man, wal kerman kaima aundaka, puka to tulu dje yagno dje yenda. Ye una wal aune mal embe God ye aunda we dji.

39 Jisas kandja buko ta dje una moi al awo embe dji, iwa nalene emill yenda una soka mopellka, ta ye molo ta kond ombine dje aunda ge kune yendo mo? Ge man, soka aike kulnab yage tupa tambell. 40 Skul womba mor ge tisa kamblo naune ba, womba skul dje kere, are tisa moro mal embe moye.

41 Ni nalen al iko dake boll pandaka, alla agan nale al iko djekene kembis panda kane djimben mo? 42 Agana, ni nalen al iko kembis paro ge, na i worno we djimben ba, ni nalen al iko boll paro ge nakanden mo? Ni djillaken soka paro una moren! Asamoll ni nalen al iko boll panda ge i worbenka, nalen wopake panda. Alla are agan kane djimben ge kune yenda we dji.

Iko moro mal megye tondo

(Matyu 7.16-20 ne, 12.33-35)

43 Yendo mal embe iko ke moya megye wopake natonda. Iko wopake moya megye ke natonda. 44 Iko ge yene megye paro mal tondo. Ka kagle paro al una po iko pik megye naworne. Alla ka mul paro al una po wain megye naworne. 45 Una wopake mor ge, yenekne nomane wopake paro mal pille, singare wopake yenj. Una ke mal mor ge, yenekne nomane ke paro mal, singare ke yenj. Yenj mal embe, una kandja dje orko worinj mal ge, yenekne nomane pakna moro mal pille kandja dje orko worinj we dji.

Iwa soka numb takpill

(Matyu 7.24-27)

46 Ye na moro al embe djinj, ni iwa kerman moren we djinj ba, ye namba yei pille na kandja djindo mal pille nayenj ne? 47 Una ta na moro al wo, na kandja djindo mal pille kane yei dal, iwa ge embe mal moya. 48 Une numb takno dje pille wallke kal po, makimb yembe ku mal dongall paro al woro take pagya. Kam kerman tondaka, nu tonda ba, numb ge take dongall ye pagya pille, nu to i er napunda.

49 Alla una ta na moro al wo na kandja djindo mal pille kane nayei dal, iwa ge embe mal moya. Une numb takno dje pille mai nabiya, kiwa take pagya. Kam kerman tondaka nu kerman to numb doll donab boll to sellke i er punda we dji.

Copyright information for `GAM