Matthew 10

Jisas iwa Aposel 12-pela dje i

(Mak 3.13-19 ne, Luk 6.12-16)

Jisas djika kogoye una 12-pela womaka, Jisas yene yembe dongall awi. Kambono ipo una kum tukne al moye ge i woro, una ke kayekaye tonda i gun worne dje une yembe dongall awi. Una 12-pela dje i ge yenekne kandjine ge embe paro. Asamoll iwa Saimon moi ge yene kandjiye gun ta yei Pita we dji. Ta Pita age Andru, ta iwa Sebedi wariye Jems, ta Jems age Jon, ta Pilip, ta Bartolomyu, ta Tomas, ta Matyu ku takis ido una moi, ta Alpias wariye Jems, ta Tadius, ta Saimon epil Selot
Selot una ge Juda kunda yenj una. Dumo Rom wo Juda kamblo kal woro kantau ye moi ge Selot una man dji; to worbon we dji. Dji una ge Saimon Selot ge pakna moi una.
moi una, ta Judas Iskariot Jisas i kunda yem una awi iwa.

Jisas una 12-pela dje woro, ye po kogo yeme! dji

(Mak 6.7-13 ne, Luk 9.1-5)

Jisas kogoye una 12-pela dje woro embe dji, epil djell una moye al ye napume! dji. Una Samaria dumene al ye napume! dji. Ye Israel una mor al pine. Ga kog sipsip er take dje pinj mal embe mor. Ye po embe djine, God dumoye wopake kantau yenda we dji ge ipon yero we djine. Una ke tondo ge ye po i gun woro, una gor ge, ye amblo i gun woro, kenj tondo una mor ge ye ye wopake ye awo, una kum tukne al moye ge ye i worne. Na yembena dongall pai ge na ye kiwa aundo, ye ku awo nainj. Ye po una wopake ye aune ge, kiwa ye aune, ku naine we dji.

Ye ku gol ne, silpa ne, peni bage i anpaus to i er napume! dji. 10 Ye kondwe pine ge kon tamgo naipine, kon pakna soka ne, kakene su ne, bulo tulba pora i nawanne. Kogo una ta kogo yenda mal ge una embe aune nonda we dji.

11 Ye tambiye ta pine mo dumo ta pine ge, una moye al ye po dje piye. Una wopake ta moya ge ye une numbiye al po moye. Ye er pine panda, numbiye ge kere er pine we dji. 12 Una ta ye dje i numog worne ge, ye embe djine, ye arngan ye wopake molme! djine. 13 Kiye dje moya una ta moi dal, ye wopake we djine ge kaima wopake moye. Ba alla, kiye dje moya una ta namoi dal, ye wopake we dje aune ge i yem worne we dji. 14 Ye po kandja djineke, una ye mop awo, dje i numog nawori dal, ye numb mo dumo ge kere, yenekne kakene toll makimb kill gulo woro er pine we dji. 15 Na kandja kaima dje ye aundo, are God kot djinda ege kerman yenda ge dumo Sodom ne, Gomora una singare ke yei mal God tonda ba, ye kandja djine mop aune una ge, God to djerpal ye kerda we dji.

Jisas, are imb merke wonda we dji

16 Jisas embe dji, ye pillme! dji. Na ye dje wornaka ye kog sipsip mal embe molo er kena simbill mor al pakna pine. Ye pine ge ye nomaga ne, ka pulma mal embe pine. Nomaga kanpol tonjka, ka pulma kiye dje wanijka yenj mal, ye embe ye pine we dji. 17 Na kandja djindo ge ye pillgi djine. Una wo ye to, kot kerman ye awo, lotu numb yenda al ka pirangill tane. 18 Ye Jisas wombaye mor we dje, kambono wo ye ipo iwa kerman ne, king kambono moye al worne. Worne ge ye na kandjinambe wopake dje pene worneke, kambono piyeke, epil djell una mor ge boll aike piye we dji. 19 Kambono ye embe dje i pineke, iwa kerman moye al ye po, kandja namba we djimbon ne dje, ye nomane to napillme! dji. Kune ge God ye kandja djine mal ge, dje aundaka djine we dji. 20 Ba ye yenekne kandjine nadjine; ye Nane Murble ye boll moro iwa ge une kandja djindaka ye djillakne al er orko wonda we dji.

21 Age ye molo age ta gapman boll kot ye awo, to gopon we djinda. Ne ye molo wombaye ta gapman boll kot ye awo embe yenda. Womba ta singare ke ye molo ne me gapman boll kot ye awo, to gopon we djinda. 22 Ye na kandjina pille we yene mal, una porapora pille ellne kumbso aune. Ba ye pillgi dje pa moi dal, ege pora djinda kune ge, God ye i yem worda we dji. 23 Ye dumo ta yenda al moyeke una wo ye ye ke ye awi dal, ye dumo ta yenda al seke er pine. Na kandja kaima dje ye aundo, ye Israel dumo yemyem yero al kogo kindja yembon dje yene ge, Una Wombe wonda we dji.

24 Skul womba ye molo tisa kamblo naune, tisa mor mal embe moye. Boine una ye molo iwa kerman kambono kamblo naune, iwa kerman mor mal embe moye. Una wo numb ne moya al kandja embe djine, ni Belsebul moren we dji dal, yene numb taimane mor una moye al ge, wo kandja kerawa dje aune we dji.

God taimane kand goye

(Luk 12.2-7)

26 Una wo ye ye ke ye aune ba, ye kand nagolme! dji. Wal porapora seke pa moro ge are er pene wondaka, wal porapora bi dje paro ge are er pene wondaka, una kanne we dji. 27 Na emill pai al kandja dje ye aundo ge, ye au djindaka po una dje aune. Una wo ye kamallne al kandja waye ye aune ge, ye bekle po numb be molo yau taneke una piye we dji. 28 Una wo ye to gopon dje yene ge ye kand nagoye. Kambono wo ye gaklene be to goye, ye nomane boll aike to nagoye. Ba alla, God wo ye nomane gaklene boll aike to golo wamo al worda ge kune yendo. Ye God pille kand kerman goye!

29 Ka kembis 5-pela ku peni bage soka boro, una wal kiwa dje kaninj ba, ta golo yage makimb al tonda ge God djinda mal pille yage tonda. 30 God ye ngambalne ene merke moro ge taimantaiman dje kere kane kune yei pora dji. 31 Une embe yendo ge ye pille kand nagoye. Ka kembis wal kiwa dal moro ba, ye una mor ge God pille we kaima yendo we dji.

Jisas wombaye ngandjill nagoye

(Luk 12.8-9)

32 Jisas embe dji, una no Jisas wombaye mormon we dje pene wori dal, na Nena kupill al moro ge, na po embe djino, ge na wombana mor we djino. 33 Ba alla una, no Jisas wombaye namormon we dje pene wori dal, na Nena kupill al moro ge, na po embe djino, ge na wombana namor we djino.

Una Jisas pille asamoll yene

(Luk 12.51-53 ne, Luk 14.26-27)

34 Jisas embe dji, na makimb al woll ge una kiwa moye dje pille na nawoll. Na bainat iwo, una na we dje pille kunda nonga yene dje woll we dji. 35 Na woll ge ne wariye boll kunda bopell. Me abore boll nonga djimbell. Auye auye soka nonga djimbell. 36 Una numb taimane pane una ge i yemyem dje kunda boye we dji.

37 Una yenekne nane mane wopake kanne ba, na asamoll wopake nakani dal, na wombana namoye. Una yenekne warne abone mor ge wopake kanne ba, na asamoll wopake nakani dal, na wombana namoye we dji. 38 Una yenekne iko pera kake i na boll nawone ge, na wombana namoye we dji. 39 Una yenekne gaklene amblo wopake ye moye ge goye. Ba, una na we dje pille we ye wane molo po goi dal, gun molo pa moye we dji.

God top aunda

(Mak 9.41)

40 Una ye i numbne al woro, wopake ye awinj ge, na we dje pille i numbne al woro wopake ye awinj. Una na i numbne al woro wopake ye awinj ge, God na dje wori woll iwa ge, i numbne al worinj we dji. 41 Una embe dje piye, no propet ta pak to aumbon dje, po i numbne al woro wopake ye awi dal, propet top ine mal ge God embe aunda nane. Una embe dje piye, singare wopake yene una mor al ge no po pak to aumbon dje, po i numbne al woro wopake ye awi dal, singare wopake yene una top ine mal ge God embe aunda nane we dji. 42 Una kandjine napai una ta na boll wane moye ge, una kane embe dje piye, no Jisas wombaye pak to aumbon we dje, nu gun kolo iwo awi dal, na kandja kaima dje ye aundo, ga top kaima ine, er take dje napunda we dji.

Copyright information for `GAM