Matthew 13

Iwa ta mau al po wal megiye pup to wori

(Mak 4.1-9 ne, Luk 8.4-8)

Armina pika Jisas bekle po nu erim djeke ami dje moi. Una merke Jisas moi al wo molmaka Jisas kanu ta pai al pakna po ami dje moi. Una merke nu erim djeke yei al molmaka, Jisas kandja buko merke dje awo embe dji, iwa ta er mau al po wal megiye pup to wori.

Pi al kondwe ge pende yagi. Una wo kamblo kal wormaka, ka wo no keri. Pende yage makimb ku be al toi. Makimb merke namoi pille, ola dje gup ye pla woi ba, djimbe bolo er kal napi. Olpa pla woika do sege yei golo er kal pi. Megiye pende yage ka kagle moi al pakna pi. Gup ye pla woi ba, ka kagle tublo i gulo wori. Ba megiye pende yage makimb wopake yei al toi. Gup yeika megiye toika, pende wan andret (100) toika, pende 6-pela ten (60) toika, pende 3-pela ten (30) toika yei. Ye kamallne paro una
Ye kamallne paro una, kandja ge pillme! dji ge me embe mal pai. Ye nomane pandaka kandja okub to kanme! dje pille dji.
, kandja ge pillme! dji.

Jisas nomane pai mal pille kandja buko dji

(Mak 4.10-12 ne, Luk 8.9-10)

10 Jisas kogoye una wo une moi al embe dji, namba yei pille ni una mor al kandja buko dje aunden ne? dji. 11 Djimaka Jisas embe dji, God dumoye wopake kantau yendo kandja seke paro ge, God ye ombine dje aundo. Ba una mor ge une embe dje naundo. 12 Una kandja pille imbon dje yei dal, God ye wordaka wal merke piye. Ba, una kandja pille imbon dje nayei dal, kandja kembis ta piye ge God iworda. 13 Na kandja buko dje aundo ge, una kanne ba kanpol natane, piye ba pillpol natane dje na kandja buko dje aundo. 14 Una embe yenj ge Aisaia asa pepa bolo pagi mal megiye toi. Une embe dji, kambono nalene al kanne ba, kanpol natane. Kamallne al piye ba, pillpol natane. 15 Nomane al au nadji, kamalne al kandja napi, nalene kupille moi. Ga nalene al kane, kamalne al kandja pille, nomane al pille imaka, na moll al womaka, na amblo wopake ye awillka. Ba kambono embe nayei pille, na amblo wopake nayell we dje Aisaia pepa embe boi we dji.

16 Na kandja kaima dje ye aundo, ye wal kaninj mal embe ge propet kambono ne, singare wopake yei una asa moi ge, kanbon dje yei ba nakani. Ye wal pille mor ge, kambono pupon dje yei ba napi. Ba ye una mor ge God ye ye wopake ye awi una mor. Ge ye nalene al kane mor, ye kamalne al pille mor we dji.

Iwa ta wal megiye pup to wori ge me embe paro

18 Jisas kandja embe dji, ye pillme! dji. Iwa ta wal megiye pup to wori mal kandja buko me ge embe mal paro. 19 Wal megiye yage kondwe toi ge embe mal paro. Una God dumoye wopake pille kandja dje una aune ba ga pillpol natoi dal, Satan kane wo iwordaka, kambono pille imbon dje yene, man panda. 20 Wal megiye yage ku pai al toi ge embe mal paro. Una God kandjiye wopake pille ola dje inj ba, 21 kandja ge djimbe naworda. Yepall ke ta molo are una wo kandja ge pille dje ke ye awo, imb awo, ye ye ke ye auneke kambono ola dje kerne. 22 Wal megiye yage ka kagle moi al toi ge embe mal paro. Una God kandjiye piye ba, makimb wale nomane merke pandaka, dje mogoi pille we yeneke nomane ke yenda. God kandjiye yaye ba to bi dje kerda, megiye natonda. 23 Wal megiye yage makimb wopake yei al toi ge embe mal paro. Una nomane wopake pandaka, God kandjiye pillgi dje molo, God kandjiye yayeke megiye tonda. Pende wan andret (100) tondaka, pende 6-pela ten (60) tondaka, pende 3-pela ten (30) tondaka embe yenda we dji.

Kull bobal kandja buko djindo

24 Jisas kandja buko ta dje awo embe dji, God dumoye wopake kantau yendo ge embe yendo. Iwa ta yene mau al po wal megiye wopake yai. 25 Ba imina pai al una ou pamaka, une wit megiye yai al kunda yem una ta wo kull bobal megiye ipo pakna pakna yale pagle er pi. 26 Are wit gup wor pla woika, kull bobal gup wor pla woika, aike aike woi. 27 Woika mau ne boiye kambono kane wo embe dji, Iwa Kerman, ni mauin al po wit megiye wopake yan ba, me namba mal pai pille kull bobal boll aike bolo yendo ne? dji. 28 Iwa Kerman embe dji, kunda yem una ta wo yei paro we dji. Djika kogoye una embe dji, no po kull bobal pul yembon mo? 29 Iwa Kerman man we dji. Ye po pul yene ba kull bobal djimbe ne, wit djibe er taimane pi pora dji. Wit ye ke ye aune paro. 30 Soka aike pandambe dji. Are una wo wallkne kune ge, na kogo una moye al embe djino, ye asamoll kull bobal gapon dje pille, duglo bill to pagye. Are ye po wit duglo i bill to, na kwa numb yero al numog worne we djino we dji.

Iko mastet yei mal Jisas kandja buko dji

(Mak 4.30-32 ne, Luk 13.18-19)

31 Jisas kandja buko ta dje awo embe dji, God dumoye wopake kantau yendo ge embe yendo. Iwa ta iko mastet megiye ta ipo mau al yaya. 32 Wal megiye porapora moro ge iko mastet megiye ge kembis ke kaima moro. Ba boya kune ge kwa porapora mau al moro ge mastet ge kamblo awo, bolo wo kerman ke punda. Ka wo ole al numbne take moye we dji.

Yis kandja buko dji

(Luk 13.20-21)

33 Kandja buko ta embe dji, God dumoye wopake kantau yendo ge yis paro mal embe yendo. Ana ta yis tulu dje daram kerman al woro, palawa boll aike to kull wordaka, yake wor kerman punda we dji.

Jisas kandja buko eri dje awi

(Mak 4.33-34)

34 Una merke moi al Jisas kandja porapora dje awi ge, kandja buko eri dje moi. Une kandja kiwa ta dje nawi. 35 Une kandja embe dje awi ge asa propet ta pepa boi mal megiye toi. Pepa embe boi, na djillakna yapro kandja buko dje orko worno. God kupill makimb beki kune ge ye pa pika ipon mormon ge wal seke pai ge na dje pene worno we dje pepa embe boi.

Kull bobal kandja buko dji ge me embe mal paro

36 Jisas una merke moi al ge kere er numb al pi. Yene kogoye una wo embe dji, kull bobal mau al boi, kandja buko djin ge me dje awe dji.

37 Djimaka Jisas embe dji, megiye wopake yai ge Una Wombe wo yai. 38 Mau yai ge makimb mormon al ge yai. Megiye wopake yai ge God kantau yendo una mor. Kull bobal boi ge Satan kantau yendo una mor. 39 Kunda yem una ta wo kull bobal yai ge Satan iwo yai. Wit wurne ge kupill makimb pora djinda kune wurne. Wit wurne una ge tau agelo mor.

40 Kull bobal pul ye i bill to wamo gaye ge, kupill makimb pora djinda kune ge yene. 41 Una Wombe tau agelo dje wordaka, God dumoye wopake yero al po wal ke to worne. Pillgi me ye ke ye awinj una ne, singare ke yenj una ge tau agelo po ine. 42 I orko wamo al worneke, yenekne kasmane koglo, kimb kallgane yene. 43 Are singare wopake yei una yenekne nane dumoye wopake yero al po molo, olpa do au djindo mal embe moyeke, talang yenda. Ye kamallne paro una, na kandja djindo ge pillme! dji.

Dje mogoi makimb al seke pai ge Jisas kandja buko dji

44 Jisas kandja dje pa molo embe dji, God dumoye wopake kantau yendo ge embe mal paro. Dje mogoi kerman ta mau al seke pai. Paika iwa ta wo kane pagle, une mau ge al ipo tambiye ta seke pagi. Pagle, une wo pille, yene wal porapora kane nonda ge ku bolo ipo, mau ge top tonda we dji.

Bis wopake moye ge Jisas kandja buko dji

45 Jisas kandja dje pa molo embe dji, God dumoye wopake kantau yendo ge embe mal paro. Bisnisman bis wopake moye dulo kane ino dje yenda. 46 Une po bis wopake uro kaima ta kani dal, une po wal porapora kane nonda ge ipo ku bolo, bis wopake panda ge po top to inda we dji.

Pis kon kandja buko dji

47 Jisas kandja dje pa molo embe dji, God dumoye wopake kantau yendo ge embe mal paro. Una pis kon i nu al woro, pis kayekaye i pla worne. 48 Pis kon ge puka tondaka una i nu djeke al woro, ami dje molo pis wopake moya ge, i dis al woro, pis ke moya ge i seke worne. 49 Kupill makimb pora djinda poke ge embe mal yenda, tau agelo wo una nomane ke pai mor ge i djell woro, una nomane wopake pai mor ge i djell woro embe yene. 50 Una nomane ke pai mor ge i wamo al worneke, kasmane koglo, kimb kallgane yene we dji.

51 Jisas kogoye una moi al embe dji, na kandja djindo ge ye pille kune yenj mo? dji. Kambono owo, no pirmon we dji. 52 Yendo mal embe ge, God lo dje awi una God dumoye wopake yero mal pille kune yei dal, ga embe mal yene, numb ne ye molo yene wal wopake mogi al une po wal asa yei ge i pene woro, wal ipon yei ge i pene woro embe yenda we dji.

Jisas kandja dji ge Nasaret una napille, mop awi

(Mak 6.1-6 ne, Luk 4.16-30)

53 Jisas kandja embe dje kere, dumo ge kere er pi. 54 Une asa molo yaki dumo yei al er lotu numb numog po kandja dje awi. Una pille aya dje embe dji, iwa ge nam kond po nomane dongall i, kogo kerman yendo? 55 Iwa ge kapenda wariye moro. Megama Maria moro, yene age kambono mor. Jems ne, Josep ne, Saimon ne, Judas mor, 56 yene ambe kambono ge nono boll mor ba, iwa ge namba ye pille wal yendo ge ye kune yendo ne? dji. 57 Dje pagle, ga Jisas pill ke pille awi. Jisas embe dji, Propet ta dumo yemyem wanda al ge una nomane aune. Ba, yene numbiye epiliye taimane mor una nomane naune we dji. 58 Jisas kani una pillgi napai pille, une kogo dongall merke nayei.

Copyright information for `GAM