Matthew 14

Jon nu pagle awi una goi

(Mak 6.14-29 ne, Luk 3.19-20 ne, 9.7-9)

Kune ge Jisas kogo ye moi mal una kandjambe to wai djimaka king Erot pi. Une pille boiye una moi al embe dji, iwa wo kogo dongall yendo ge Jon nu pagle awi una moro. Asa une goi ba, ipon une agle er wo gun po kogo embe yendo we dji.

Erot kandja embe dji ge, asa yene age Pilip game Erodias moi ge, Erot po kunumb i. I ge Jon embe dji, ni ana iden ge kune nayendo we dji. Erot pille, elle kumbsika wo Jon i kaye wori. Une to goyo dje pi ba, una merke Jon propet kaima moro dje kanmaka, Erot kambono wo na tane dje pille kand golo natoi.

Are Erot me kwi ege pillau djika, una kwa kerman noi. Una kwa noi al ge Erodias abore wo kogoll yei. Yeika Erot wopake kane wo pille ambo moi al kandja dongall dje awo embe dji, ni wal ino we djimben mal, na kaima auno we dji. Djika ambo yene megama kandja dji mal pille embe dji, ni Jon nu pagle awi una ge to gopen, yene ngambale kelip to plet al woro, iwo na aumben we dji.

Ambo ge kandja embe djika Erot pille urup dji ba, asa yene kandja dji pille, una kwa kerman noi una ke pille awo djine dje pille, une man we nadji. 10 Une yene ami una djika Jon kaye pai al po numbke kelip toika goi. 11 Jon goi ge yene ngambale i plet al woro, iwo ambo ge aumaka, ambo ipo megama awi. 12 Jon goi we djimaka, Jon kogoye una pille, wo Jon to golo pagi ge, ipo gull toi. To kere er Jisas moi al po dje awi.

Jisas una 5,000 kwa mokna awi no kune yei

(Mak 6.31-44 ne, Luk 9.10-17 ne, Jon 6.1-13)

13 Jon goi we djimaka, Jisas kogoye una boll dumo ge kere, yenekne moye dje pille kanu ta pai al pakna po dumo wapra yei al er pi. Er pumaka una merke kane dumo yemyem kere nu erim djeke yei al po Jisas kanu iwo pillau djinda al kambono asamoll wo moi. 14 Molmaka, Jisas wo una merke moi ge kane wandill golo awo, una ke to pai ge une i gun woro awi.

15 Taman pika kogoye una wo Jisas moi al embe dji, ege pai pora dji, dumo nono mormon al una ta namor, kwa naparo. Ni dje worbenka, una ge er dumo manda yemyem po kwa mokna top to iwo no pane we dji. 16 Djimaka Jisas embe dji, una er napine, ye kwa auneke nane we dji. 17 Kogoye una embe dji, no kwa merke nayero, bret 5-pela ne, pis soka yero. 18 Djimaka Jisas embe dji, ye iwo na aume! dji. 19 Una merke moi al Jisas, ye ami dje molme! dji. Bret 5-pela ge ne, pis soka ge Jisas i kupill al kane pla woro k amang ye embe dji, ni wopake ye no kwa aunden we dji. Dje awo, une bret tuklo, pis boll awika, kogoye una i omuk to una merke moi ge awi. 20 Aumaka una porapora noi ke yei. Wal tuge moi ge una po ngado djengill kon 12-pela to puka toi. 21 Iwa nambane kere kani ge paip tausan (5,000) moi. Ana womba moi ge kere nakani.

Jisas nu erim be to kamblo kond pi

(Mak 6.45-52 ne, Jon 6.16-21)

22 Jisas kogoye una moi al embe dji, ye asamoll kanu pakna po nu erim yemto dumo Betsainda pineke, na are wono we dji. 23 Una merke moi al Jisas dje worika, kambono er po kermaka, yene kamang yeno dje pille er makimb komge al pi. Emill paika Jisas yene moi. 24 Moika kogoye una kanu i ellke pumaka, kam kopo kerman woika, nu olup kerman ye po wo yeika, kiye kiye dje pi. 25 Tagno tagno dje yeika, kambono pi al Jisas are nu erim yeke be kamblo kond woika 26 kogoye una kane kand kerman golo, goll kagoi ta wondo dje kane yau kerman toi.

27 Jisas ola dje wo embe dji, ye molo gi dje molme! Ge na wondo, ye kand nagolme! dji. 28 Djika Pita embe dji, Iwa Kerman, ge ni kaima won dal, ni djimbenka na ni moren al nu yeke be al er wono we dji. 29 Jisas er we! dji. Pita kanu kere Jisas moi al ge nu yeke be kamblo er pi. 30 Ba kopo kerman woika, une kane er nu guloto puno dje kand golo, yau to embe dji, Iwa Kerman, ni na amblo pille dje awe! dji.

31 Jisas ola dje agle woro Pita amblo embe dji, ni pillgi kembis pai paro. Namba yei pille ni nomanin soka pai ne? dji. 32 Soka kanu al pakna pupillka, kopo wo pai ge pora dji. 33 Una kanu al moi ge gopne boglo, Jisas pille pla woro embe dji, ni God wariye kaima moren! we dji.

Jisas dumo Genesaret po una i gun woro awi

(Mak 6.53-56)

34 Jisas kogoye una boll kanu al molo, nu erim to pruk dje er yemto dumo Genesaret pi. 35 Po pillau djimaka Jisas wo moika una kane, dumo yemyem yei al po, Jisas woi moro we djimaka, una pille ke toi moi una ge i Jisas moi al woi. 36 Wo embe dji, Jisas, una ke toi mor ge ni konkunom worden al ge ulle al kambono abiye ge kiwa yenda we dji. Embe djimaka, ke toi moi una manda po Jisas koniye kunomiye al abi ge yenekne keine ge kaima pora dji.

Copyright information for `GAM