Matthew 15

Juda una gollne God kandjiye dji ge kune nadji

(Mak 7.1-13)

Parisi una ne, God lo dje awi una Jerusalem kere er Jisas moi al wo embe dji, nono gollne kandja dje nono awi mal ge, namba yei pille ni kogen una mop awinj? Kwa nambon dje yenj ge asamoll aglene nu naworinj we dji. Jisas embe dji, namba yei pille God lo dje awi ge ye mop awij, ba ye gollne lone dje molo woi mal ge ye amblo gi dje mor? God embe dji, ye nane mane kandja djine mal ge ye pille kane yeme! dji. Une kandja ta embe dji, una nane mane moye al kandja ke dje awi dal, una ge to golme! dji. God embe dji ba, ye napille yenj, ye embe djinj, una ku ta yenda neme pak to aunda kune yenda ba, une ge embe djinda, ku paro ge na opa ye God auno, nena mana nauno we dji dal, ye kapla we djinj. Ba, kandja embe mal ge ye nadjine mal paro. Une neme ku naunda ge kune nayendo. God lo dje awi ge, ye mop awij, ye gollne lone dje molo woi mal ge pille pla yenj. Ye djillakne soka paro una mor! Ye singare embe yenj ge asa propet Aisaia pepa boi mal ge kune boi. Une pepa embe boi, Una na kandjina amblo pla worinj, ba, djillakene al djinj, yenekne kubene ne, nomane ge ellke kaima yero we dji. God loye djinmon we djinj ba makimb una yenekne lone dje orko worinj. Na loina djill mal ge kerinj. Na kandjina amblo pla worinj ge kende kulo djinj, kiwa mal embe amblo pla woro mor we dje Aisaia embe dji.

God nale al una kune namor

(Mak 7.14-23)

10 Jisas kandja djika una alla womaka une embe dji, na kandja djindo ge ye pille i nomane al worme! dji. 11 Una kwa mokna i djillakene al nane ge God kando djengimb naparo. Ba alla, kambono kandja nomane al paraka, djillakene al dje orko worinj ge God kando djengimb paro we dji.

12 Jisas kogoye una wo embe dji, ni nakanden mo? Ni kandja djin ge Parisi una ke pi we dji. 13 Jisas embe dji, na nena kupill al moro ge mauye paro. Une wal nayai moro ge une pul ye iwordo. 14 Ye kere er wone; Parisi una yenekne moye. Una soka nalene emill yendaka ta ye molo ta kond ombine dje aundaka, soka aike po kulnab yage tupa tambell. Tambell mal ge Parisi una embe mor we dji. 15 Djika Pita pille embe dji, ni kandja buko djinden ge me no dje awe! dji. 16 Djika Jisas embe dji, ye porapora mor ge para napir mo? 17 Ye kwa nane ge ye nomane al napunda. Kwa ge er ellne al po er ell mur numb pundaka, God kanda djengimb napanda. Ye napir mo? 18 Kandja una nomane al molo er djillakene al orko wonda ge God kanda djengimb panda. 19 Kandja una nomane al pa er orko wonda ge embe mal paro. Nomane ke pa, una to golo, iwana kunumb no, singare ke ye, wal kunumb no, kandja kende dje, una kandjine amblo 20 yene ge God kanda djengimb panda. Ba, una aglene nu naworo, kwa nane ge God kanda djengimb napanda we dji.

Dumo Kenan ana ta Jisas kandjiye pillgi dji

(Mak 7.24-30)

21 Jisas dumo moi al kere er dumo Taia ne, Saidon pi. 22 Po moika, dumo yei al ge Kenan ana ta Jisas moi al wo yau to embe dji, Iwa Kerman, ni Depit wariye moren, ni na wandill golo aumben. Na abona kum ke tukiye al moraka une ke mal moro we dji. 23 Djika Jisas kandja dje yem nawori. Kogoye una Jisas moi al wo embe dji, ana are wo yau tondo ge ni dje worben we dji. 24 Jisas embe dji, nena na dje wori woll ge Israel una kog sipsip mal embe er take dje po djine dje pille woll. Epil djell una mor al une na dje wori nawoll we dji. 25 Ana ge manda wo gopiye boglo embe dji, Iwa Kerman! Ni na ye wopake ye awe! dji. 26 Ba Jisas man dji, womba kwaine moknane i kena aumbon ge, kune nayendo we dji. 27 Ana ge embe dji, Iwa Kerman, ni kandja kaima djinden ba, kena nane mor ge, ga kwa nane tulpene yage kal tonda ge kena bo mename molo i nane we dji. 28 Djika Jisas pille embe dji, ana, ni pillgi kerman kaima pai. Ni kamang yen mal ge, ni abon kiwa moya we dji. Kune taimane ana ge abore ke toi pai ge alla kiwa yei.

Una merke ke toi moi ge Jisas wo i gun woro awi

29 Jisas dumo ge kere er nu erim Galili djeke yei al po er kam mekbe al po ami dje moi. 30 Una merke Jisas moi al pumaka, kakene ke yei una ne, nalene emill yei una ne, gaklene ke yei una, iwana dall moi una ne, una merke ke toi moi una ge una iwo Jisas kake al wormaka, Jisas i gun woro awi. 31 Worika kandja nandji una ge alla kandja djimaka, kakene ke yei una kond kamblo er pumaka, gaklene ke yei una kiwa molmaka, nalene emill yei una alla kanmaka, una kane aya dji, Israel una Godne moro iwa ge pille pla woro awi.

Jisas una 4,000 kwa mokna awi no kune kaima yei

(Mak 8.1-10)

32 Jisas djika kogoye una womaka une embe dji, una manda mor ge ege sokara nono boll mor ba, kwa nane nayero. Koll golo moye ge, na dje worno kune nayendo. Na wandill goro. Kambono po kondwe tambiye pineke kam koll tondaka, nalene wandaka yage tane we dji. 33 Kogoye una embe dji, una merkeke mor. Una numbne gullne manda ta nayero. Nono nam kond po kwa iwo aumbon nane ne? dji. 34 Djimaka Jisas embe dji, ye bret namba namba yero ne? dji. Kogoye una embe dji, no bret 7-pela yeraka, pis kembis sokarita yero we dji. 35 Djimaka Jisas una merke moi al djika kambono ami dji. 36 Jisas bret ne, pis amblo i ne kerman wopake we dje awi. Une bret ne, pis tuklo i kogoye una awika, ga omuk to una awi. 37 Una ge no kubo ye kermaka, kwa pende moi ge, ngado djengill kon 7-pela to puka toi. 38 Una noi ge iwa po tausan (4,000) moi. Ana womba kwa noi ge nambane kere nakani. 39 Jisas dje worika una er po kermaka, une er kanu al pakna po er dumo Magadan pi.

Copyright information for `GAM