Matthew 17

Jisas gakle ta mal pai

(Mak 9.2-13 ne, Luk 9.28-36)

Ege 6-pela er wo pika, Jisas ye molo Pita, Jems, Jems age Jon boll dje i er pla mekbe al pika, yenekne moi. Molmaka kambono kani Jisas gakle ta mal pai. Gume djillake olpa do au djindo mal embe yeika, yene kon allap yai kurwo boll ye poll dji. Pita, Jems ne Jon kuntaimane kane molmaka, una soka asa gopill iwa Ilaija ne, Mosis wo mopillka, Jisas boll kandja dji. Djimaka Pita Jisas moi al embe dji, Iwa Kerman, nono ba mormon ge abro. Ni kune we djimbenka na numb asinga sokara takno. Ni ta imbenka, Ilaija ta indaka, ta Mosis indaka embe yeno we dji. Pita kandja i pla woro djika, kam kupa ta wo talang ye, kambono i pakna wori. God kupa paknato molo embe dji, ge na warna, na wopake kane wo pille aundo. Une kandja djinda mal ye pillme! dji.

Djika kogoye una pille gopne boglo, taimagaus pa molo kand kerman goi. Jisas wo amblo embe dji, ye agle molme! Ye kand nagolme! dji. Djika kogoye una kane pla woro kani una ta namoi, Jisas taimane moi.

Mekbe al kal wo molmaka, Jisas iwa sokara moi al kandja dongall dje awo embe dji, ye mekbe al wal pille kane yei mal ge, nadjine. Asamoll Una Wombe golo agle er wo gun pundaka, are ye kandja djine we dji.

10 Djika kogoye una embe dji, God lo dje awinj una embe djinj, iwa Ilaija goi ge asamoll agle yem wondaka, Krais are wonda we djinj ge namba yei pille djinj ne? dji.

11 Djimaka Jisas embe dji, kambono kandja djinj ge pai mal djinj, Ilaija asamoll wo wal porapora amblokun yenda. 12 Na kandja dje ye aundo, Ilaija woi pora dji ba una kanpol natoi. Ga nomane pai mal pille wo une ye ke ye awi. Yei mal embe, kambono wo Una Wombe moya al ye ke ye aune we dji. 13 Jisas kandja embe djika, kogoye una kani une kandja dji ge Jon nu pagle awi una pille dji.

Womba ta kum ke tukiye al moi Jisas wo iwori

(Mak 9.14-29 ne, Luk 9.37-42)

14 Jisas kogoye una sokara boll makimb mekbe al er kal wo kani, una merke molmaka, iwa ta Jisas moi al wo yene gopiye boglo 15 embe dji, Iwa Kerman, na warna moro ge, wandill golo awe! Une kiku to er kerman pundo. Ege merke une yage nu al pa, wamo al to embe yendo. 16 Na ni kogen una djill ba, i gun worbon dje yei man pai we dji.

17 Djimaka Jisas embe dji, ye una ipon mor ge nomane ke pai mor, ye pillgi nandji una mor. Na ye boll ege momo moll pora dji. Ege namba namba wor pundaka, na ye boll imb kake moyo? Ni po womba ge dje iwe! dji. 18 Djika una po womba dje iumaka, womba kum ke tukiye al moi ge Jisas, ni er piye! dje iwori. Kuntaimane womba alla kiwa moi.

19 Are yenekne molmaka, kogoye una Jisas moi al wo embe dji, namba yei pille kum ke womba tukiye al moi no iworbon kune nayei ne? dji.

20 Jisas embe dji, ye pillgi kembis pai pille kune nayei. Na kandja kaima dje ye aundo. Mastet megiye kembis ke moro, ye pillgi kembis embe mal pandaka, ye makimb mekbe paro ge, er kola piye! djine ge, kaima po er kola punda. Ye pillgi kembis embe pai dal, wal porapora yene ge yene kune yenda we dji.

Jisas Nanam golo agiyo we dji ge alla dji

(Mak 9.30-31 ne, Luk 9.43-45)

22 Jisas kogoye una boll distrik Galili makai to molmaka une embe dji, una wo Una Wombe dje ipo kunda yem una aune ege ge manda yei pora djindo. 23 To golo pagyeke, ege sokara er wo pundaka, une alla agle er wo gun punda we dji. Djika kogoye una kubene ke yei.

Lotu numb kerman takis pai mal Jisas iwo awi

24 Jisas kogoye una boll er dumo Kaperneam yei al po molmaka, lotu numb kerman takis i una kambono Pita moi al wo embe dji, lotu numb kerman takis paro mal ye tisane aundo mo naundo ne? dji. 25 Djimaka Pita embe dji, aundo we dji.

Pita er numb al pika, Jisas asamoll kandja dje awo embe dji, Saimon, ni namba we dje pren? Makimb una king mor ge una ne moye al po ku takis inj? Yenekne unakiye mor al inj mo, una djell mor al po inj ne? dji.
26 Djika Pita embe dji, ga una djell mor al po takis inj we dji. Jisas embe dji, embe djinden ge, king yene wombaye boll takis naune, kiwa moye. 27 Nono kiwa mopon, ba ga nono ke pille dje djine, ku takis aumbon. Ni nu erim al po pis uk worbenka, pis ta asamoll tamben ge ni pis djillake yapro, ku megiye ta pakna panda kane imben. Nono soka takis tamboll mal ni ku ge iwo aumben we dji.

Copyright information for `GAM