Matthew 19

Iwa game kerda ge kune nayendo

(Mak 10.1-12 ne, Luk 16.18)

Jisas kandja embe dje kere, une distrik Galili kere er nu Jodan yemto po dumo Judia pi. Pika una merke une boll aike pumaka una ke toi moi ge une amblo i gun woro awi.

Awika Parisi una wo Jisas kandja ta djindaka, kandja kot ye aumbon dje pille embe dji, una ta yene game kerda ge, yene kiwa pro mal pille kerda mo man? Nono kandja lo paro mal ge namba we djindo ne? dji.

Djimaka Jisas embe dji, kandja Baibel al paro ge ye kere nakani paro. Baibel embe djindo, kamasa kaima God wal porapora ye beke yei kune ge une iwana ye beki. Iwa yene djell ye beke, ana yene djell ye beke embe yei. God embe djindo, me ge al pai pille iwa ge yene neme ge kere, er ana boll po moyaka, soka gaklene taimane panda mopell we dji. Jisas embe dji, asa iwa ana soka djelldjell mopill ba, alla God dji iwa ana ipon gaklene taimane panda mopell. God iwa ana i taimane wori mal ge, una i djelldjell worne ge kune nayendo we dji.

Djika Parisi kambono embe dji, Mosis no lo bolo awi ge embe dji, ye gamane to orko worne panda, ye pepa bolo gamane to orko worne we dji. Mosis embe dji pille, ni iwa ana nakerda we djinden ge, namba yei pille djinden ne? dji.

Djimaka Jisas embe dji, ye kandja to worinj una mor pille Mosis pepa bolo ana kerne ge kapla yendo we dji. Ba kamasa God wal porapora beke yei kune ge iwa game nakerda dje yei. Na kandja dje ye aundo, ana po iwa djell boll kunumb nanonda ba, woge kiwa kere ana gun inda ge kaima bolo naipill mal mopell, kunumb nambell we dji. 10 Djika kogoye una embe dji, iwa yene game boll embe molo pambell panda, iwana bolo naibell; djelldjell mopell ge kune yenda we dji.

11 Djimaka Jisas embe dji, iwana djelldjell mopell we dje ye kandja embe djinj ge una merke man dje piye. Ba God amblo pille dje aundaka, una pende ana boll bolo naine; kiwa moye. 12 Kiwa moye ge, pende mane kuya kune ge, gaklene ke yenda. Pende gaklene kelip tane; ana boll womba kuye kune nayenda. Pende God dumoye wopake kantau yendo mal kogo embe yembon dje pille, yenekne mapill ye ana bolo naine. Ana bolo naine kandja ge, una pille ine ge pille inembe dji.

Jisas, ye womba er wome dji

(Mak 10.13-16 ne, Luk 18.15-17)

13 Kune ge una womba kembis Jisas amblo kamang ye aunda dje iumaka, kogoye una kane man dji. Ye womba naiume! dji. 14 Djimaka Jisas embe dji, ye man nadjime! God dumoye wopake yero ge una womba mor mal embe ge dumene yero. Womba er na moro al wonembe dji. 15 Jisas womba ge amblo kere pagle, er pi.

Iwa komdjill ta kog mogoi merke kane noi

(Mak 10.17-31 ne, Luk 18.18-30)

16 Iwa komdjill ta Jisas moi al wo embe dji, tisa, na singare wopake namba mal ye pagle, gun molo pa moyo ne? dji. Djika Jisas embe dji, 17 Singare wopake paro mal ge, ni namba yei pille wo na moll al djinden ne? dji. God taimane ge wopake moro. Ni gun molo pano dje pin dal, Mosis lo dje awi mal embe yeye! dji. 18 Djika iwa ge embe dji, na naral lo yeno ne? dji. Jisas embe dji, una to nagolo, una djell gamane djingjang naye, kunumbkun nano, kandja kot kende dje una nawo, 19 ye nane mane kandja djine mal pille, ni nenem ye wopake yenden mal, ni agan moya al embe ye aumben we dji. 20 Djika iwa ge embe dji, na womba kembis molo woll ipon moro ge, lo porapora ni djinden ge na yell. Singare namba mal alla yeno ne? dji. 21 Jisas embe dji, ni iwa kaima du dje moyo dje pin dal, ni kogin mogoin porapora ipo ku bolo i una wal kane nanonj una moye al aumben. Ni embe yen dal, ni top kupill al yenda imben, alla ni wo na boll aike wane mopen we dji.

22 Jisas embe dji ba iwa ge wal merke kane noi pille une ke pille er pi. 23 Er pika Jisas kogoye una moi al embe dji, na kandja kaima dje ye aundo. Una wal merke kane nane ge, God dumoye wopake yero al er pakna bon dje yene ge, kogo kerman paro. 24 Na kandja alla dje ye aundo, kog kamel er wopa kond kembis yero al pakna punda kune nayenda mal embe, una wal merke kane nane ge para aike er God dumoye wopake yero al pakna napine we dji.

25 Djika kogoye una pille gok dje aya dje pille embe dji, ku kane nane una er pakna napine panda, una ne mal er pakna pine? Man, God nono i yem naworda mal paro we dji. 26 Jisas embe dji, una er pakna bon dje yene ge kune nayenda. Ba God yenda kune yendo. Une wal porapora yenda kune yendo we dji. 27 Pita embe dji, no wal porapora kere, ni boll aike wopin mormon, no wal naral wal imbon ne? dji. 28 Djika Jisas kogoye una moi al embe dji, na kandja kaima dje ye aundo, are wal porapora gun yenda kune ge, Una Wombe sia king yenda al po ami dje moyaka, yene kandjiye kerman pandaka, ye na boll aike wane moye una ge sia king 12-pela yenda al po ami dje molo, Israel una epil 12-pela mor ge ye kantau yene. 29 Una no Jisas kogoye yembon we dje pille, yenekne dumo makimb kere, numbne kere, agane abane ne, nane mane ne, wombane ta keri dal, God ye wal 100 plato aunda. Are ye gun molo pane. 30 Ba alla una wekle mor una wor are pineke, are mor una wor wekle pineke embe yene we dji.

Copyright information for `GAM