Matthew 6

Nono una ye wopake ye aumbon

Jisas embe dji, ye kanpol to molme! Ye singare wopake yenj ge, una kanne dje nayene. Ye una kanne dje yei dal, ye Nane kupill al moro ge top naunda we dji. Ye una wal kane nanonj una amblo pille dje awi dal, una djillakne soka paro yenj mal ye embe nayene! Kambono kandja kende dje, lotu numb ne, kondwe poke poke po, wisel to, yau to, na una wopake ye aundo; ye wo kanme djinj. No kogo wopake yenmon God no top aunda dje pir ba, na kandja kaima dje ye aundo, una kanne dje yenj al ge, yenekne top inj pora djindo, God ta naunda. Yenj ge ye embe nayene. Ye una wal kane nanonj una wal aumbon dje yei dal, ye aglene woto aune ge aglene darto nakanne. Ye una wal wopake ye aune ge, guloto aune. Awi dal, ye Nane wal gulo paro kando iwa ge, une ye kane top aunda we dji.

Kamang yembon mal

(Luk 11.2-4)

Jisas embe dji, ye God kamang ye aune ge una djillakne soka paro una kamang ye awinj mal embe ye nayeme! dji. Ga lotu numb po, kondwe kerman poke poke yero al po agle molo, una kanne dje pille kamang yenj. Una yenj ge, God no top aunda we dje pir ba, na kandja kaima dje ye aundo, una kanne dje yenj ge yenekne top i pora dji, God ta naunda. Ye kamang yene ge ye numog po kond tugo, ye Nane seke moro iwa ge, kamang ye aune. Auneke, ye Nane wal seke moro pille kane yendo iwa ge, ye top aunda we dji.

Ye wal nayero mal ge, God ye Nane moro ge kani pora dji. Ye kamang nayei poke ge, une ye kani pora dji. Ye kamang yene poke, kandja aulaul nadjine, ye pillpol to kamang yene. Una epil orko mor ge God piya dje pille kandja merke djinj ba, kambono yenj mal ge, ye embe nayene.

Une ye kando pille ye kamang embe yene. Nane kupill al moren ge, una ni kandjin pille pla ye aunembe. 10 Ni dumen kantau yemben ge, kantau yeye. Kupill al mor una ni nomanin paro mal yenj. Yenj mal embe, makimb al una ye kune yenembe. 11 No kwa ege ege nambon mal ge ni ipon awe! 12 Una no ye ke ye awi kere aumon mal embe, ni no ke yenmon ge kere aumben. 13 Wal ke no boll wo djinda, ni to worben. Iwa ke no boll to djinda; ni to pille dje ellke worben we djine we dji.

14 Una wo ye mor al ye ke ye auneke, ye kere awi dal, ye Nane kupill al moro ge ye singare ke yenj ge kere aunda. 15 Ba, una wo ye mor al ye ke ye aune, alla ye kere nawi dal, ye Nane kupill al moro ge ye ke yenj ge alla nakerda we dji.

God pille kwa mapill yembon

16 Jisas embe dji, ye God pille kwa nanane ge, una djillakne soka paro una yenj mal ye embe nayene. Kambono kwa mapill yenj ge yenekne gumane djillakene ke ye, nu was naye, una kanne dje yenj. Kambono embe dje pir, God kogoye yenmon ge une no top aunda dje pir ba, na kandja kaima dje ye aundo, una kanne dje yenj ge yenekne top i pora dji, God ta naunda. 17 Ye God pille kwa nanane ge, ye ngambalne al kopong ye, gumane djillakene nu was ye worne. 18 Kwa nano yene ge ye Nane seke moro ge kanda; una nakanne. Ye Nane seke moro ge kane ye top aunda we dji.

Wal pille we yenmon mal

(Luk 12.33-34)

19 Jisas embe dji, ye makimb wal bonato mogi dal, korngun wo nondaka, killen kabiyaka, una numb to billa dje ine. 20 Ba ye kupill al wal pille we ye worne yenda ge, korngun nanonda, killen nakabiya, una numb to billa dje naine. 21 Ye wal nomane to pille worne yenda al ge, ye nomane boll aike yenda we dji.

Nono nalene wamo lambo dal embe paro

(Luk 11.34-36)

22 Jisas embe dji, ye nalene ge wamo lambo mal embe paro. Ye nalene wopake pai dal, ye gaklene paknato au djinda ba, 23 ye nalene ke yei dal, ye gaklene paknato emill ye panda. Ye gaklene paknato au djindo dje pir ba, emill yei dal, emill ge ye kerman yenda we dji.

Iwa kerman soka mopellka boi iwa taimanta moya kune nayendo

(Luk 16.13)

24 Boi iwa taimanta iwa kerman soka kogone yenda kune nayendo. Iwa taimane ge, iwa kerman ta ke kane, ta wopake kanda. Iwa Kerman ta kandja djinda mal boi ge pille kune yenda, ba ta ge mop aunda mal paro. Ye God ne, ku boiye soka aike moye kune nayenda we dji.

Wal kayekaye nomane to namoye

25 Kune nayenda we djindo ge, ye wopake mopon dje nomane to napiye dje pille djindo. Kwa mokna ta yenda nambon dje napiye. Kon konom ta yenda worbon dje napiye. Ye nomane pakna paro ge wal kerman paro, ye kwa nambon dje yene ge wal kerman, man. Ye gaklene paro ge, wal kerman paro, ye konkunom worbon dje pir ge wal kerman, man.

26 Ka pir dje waninj ge ye kaninj. Ka wal kiwa, kogo naye, kwa mokna to ipo numb al gale nanonj, koll goye paro ba, ye Nane kupill al moro ge kwa aundo nonj. Ka mor ge ye Nane wal kerman dje nakando, ba, ye una mor ge wal kerman dje kando. 27 Ye egene yenda mal goye ba, ye nomane to pille kanan mopon dje yene ge, ye kanan moye mo? Ge man, ye egene yenda mal goye.

28 Ye konkunom ta yenda dje nomane to napiye. Plaua kupiye wopake tondo mal ge ye kaninj. Plaua kupiye to er pla wondo ge konkunom to nabolo, kogo naye, kiwa bolo er pla pundo. 29 Na kandja dje ye aundo, asa king Solomon konkunom wopake uro kaima wori ba, God plaua kupiye yei tondo mal ge, to Solomon kamblo aundo. 30 Plaua kupiye ipon to paro ge, kumaike una wo kiwa dje to wamo al worne ba, kupiye wopake to paro ge God yei kupiye to paro, une nakerda. Alla, une ye pille naunda mo? Ge man. God ye kantau yenda ba, ye pillgi kembis paro.

31 Ye kwa mokna ta yenda nambon dje pille, konkunom ta yenda worbon dje pille nomane to napillme! 32 Epil orko una wal yenda nambon dje nomane to pille we yenj ba, ye Nane kupill al moro ge, ye wal nane ge une pille kane yendo. 33 Ye wal pille pla yene ge embe yene. Ye djineke God ye Kingne kaima moyaka, ye kantau yenda. Alla, God singare du dje yendo mal, ye pille pla yene. Singare embe yei dal, God ye wal ine mal ge, aunda. 34 Ge pille, kumaike wal yenda mo nayenda ge ye napiye. Ipon imb paro ge pora paro, kumaike wal yenda mo nayenda ge ye napiye we dji.

Copyright information for `GAM