Matthew 7

Jisas embe dji, ye una kandjine nabulme

Jisas embe dji, una singare ta yene ge, ye kane nadjime dji. God ye kaye taimane mal embe ye djinda. Ye una boll kandja djine mal ge, God kandja ge dje ye aunda. Una singare yeneke ye kane dji dal, God ye singare yene mal para kane djinda. Ni nalen al iko dake boll pandaka, agan nale al iko dake kembis panda ge, ni kane djimben mo? Agana, ni nalen al iko kembis paro ge na iworno we djimben ba, ni nalen al iko boll paro ge ni nakanden mo? Ni djillakin soka paro una! Asamoll ni nalen al iko boll panda ge iworben. Ni nalen wopake pandaka, are ni agan nale al wal moya ge, ni kane iworben kune yenda we dji.

God wal wopake yenda ge ye i kena moye al naworne! Bis wopake yenda ge ye i kog moye al naworne! Ye ipo wori dal, kog ne, kena kamblo kal woro, wo ye tane we dji.

Nono kamang yembon wal ge God aunda

(Luk 11.9-13)

Jisas embe dji, ye wal imbon dje piye ge, ye God moro al djineke, une ye aunda. Ye wal dulo kane imbon dje yene ge ye kane ine. Ye numb kond to guno guno dje moye ge God iapro aunda. Una ta kamang ye awo wal ino we djinda ge God aunda. Una ta wal dulo kane ino dje piya ge kane inda. Una numb kond to guno guno dje moya ge God iapro aunda. Ye warne kambono bret ta nambon we dji dal, ye ku pon ta i aune mo? 10 Pis ta nambon we dji dal, ye nomaga ke i aune mo? 11 Ye una mor ge nomane ke pai mor ba, ye wombane kambono mor al, ye wal wopake i awinj. Ye kamang yene wal ge, God ye naunda dje napiye. Une ye ye wopake ye aunda we dji. 12 Asa lo bolo awi ge ne, propet pepa bolo awi ge me taimane paro. Ge una ye ye wopake ye aune dje pir mal ge, ye una ye wopake embe ye aune.

Kod kembis yero al bon

(Luk 13.34)

13 Jisas embe dji, ye kond kembis yero al er pakna pine. Una po gor kond yero ge au kerman dje yero; kond djillake kerman yero al ge, una merkeke pinj. Ba ye kond ge napine. 14 Una po gun molo pane kond yero ge, kond djillake kembis kaima yero, kond ge kerman nayero, una taimantaiman dje kaninj we dji.

Propet kende kandja djine ge pillpol tambon

(Luk 6.43-44 ne, 13.25-27)

15 Jisas embe dji, propet kende wo kandja djine ge, ye pillpol tane. Kambono wo ye nomane to ke ye aune. Ge kena kunda yeye yenj mal embe wone. Sipsip gakle kon woro sipsip tambon dje wone. 16 Propet kende singare ke yene mal ye pille kane yene. Ka mul panda al ge, una po wain megiye nawurne. Ka kagle panda al ge, una po iko pik megiye nawurne. 17 Yendo mal embe, iko wopake moya, megiye wopake tonda alla, iko ke moya, megiye ke tonda. 18 Iko wopake moya, megiye ke natonda. Alla iko ke moya, megiye wopake natonda we dji. 19 Iko megiye wopake natoi dal, una wo simb to kal woro wamo gaye we dji. 20 Ge pille, propet kende singare yene mal, ye kano kune yene we dji.

21 Una na moro al embe djine, Iwa kerman, Iwa kerman we djine ba, God dumoye wopake yero al er pakna napine. Na nena kupill al moro ge, une kandja djinda mal pille yene una ge, God dumoye wopake er pakna pine we dji. 22 God una kot ye aunda poke ge, una merke na moro al embe djine, Iwa Kerman, iwa kerman, ni kandjin al, no wal seke pai dje pene worpin we djine. Ni kandjin al, kum ke una tukne al moi ge, i woro, ni kandjin al, no kogo dongall yepin we djine. 23 Ba na kambono moye al embe djino, ye singare ke ye wani una mor; ye na nakanill una. Ye er ellke pume! djino.

Iwa soka numbne takpill mal

(Luk 6.47-49)

24 Jisas embe dji, una na moro al wo na kandja djino mal pille yei dal, ga nomane kerman panda moye. Kambono numb takbon dje, mai amblo wopake ye, makimb yembe ku mal dongall paro al woro take pagiye. 25 Kam kerman tondaka, nu wondaka, kopo wonda ba, numb makimb ku mal dongall pai al takne ge to i er napunda. 26 Ba una na moro al wo na kandja djino mal pille nayei dal, ga nomane dall pai una mal embe moye. Ga numb takbon dje pille mai namblo, ku okup be take pagye. 27 Kam tondaka nu kerman tonda, kopo wondaka numb doll donab boll to i er punda we dji.

28 Jisas kandja embe dje kerika una merke moi ge pille aya dji. 29 God lo dje awi una kandja dje yei mal Jisas kandja embe nadji; namba pai una kandja dongall dje awinj mal une kandja embe djindo dje kani.

Copyright information for `GAM