a(Aisaia 53:4)

Matthew 8

Iwa ta kenj toi Jisas wo i gun wori

(Mak 1.40-44 ne, Luk 5.12-14)

Jisas makimb komge al molo er kal pika, una merke boll aike pi. Iwa ta gakle al kenj toi moi ge Jisas moi al wo gopiye boglo embe dji, Iwa Kerman, ni kapla we djimbenka, na gaklena al djengimb moro ge pora djindaka, God nale al na kiwa moyo we dji. Djika Jisas iwa gakle al amblo embe dji, na kune we djindo. Ni gaklen al djengimb moro ge pora djinda we dji. Djika iwa kenj toi ge kun taimane pora dji, kiwa moi. Jisas kandja dongall dje awo embe dji, na embe yell we nadjiye! dji. Ipon ni gaklen kiwa yero ge ni po ombine dje aumbenka, opa gale ye awinj una kanne we dji. Asa una ke embe toi er gun pi ge, Mosis opa ta yene we dji. Dji mal ge, ni po opa embe yemben we dji. Ni po embe yen dal, ni ke toi pora dji ge opa gale awi una kanne we dji.

Rom Gapman iwa kerman boiye ta ke toi Jisas i gun woro awi

(Luk 7.1-10)

Jisas er dumo Kaperneam pi. Rom ami iwa kerman ta moi ge une ami wan andret (100) kantau ye moi. Une Jisas moi al wo kandja embe dji, Iwa Kerman, na boina ge ke kerman tondo. Une bo al pa moraka, kake agle golo keri, ngembill kerman goro we dji. Djika Jisas embe dji, na wo i gun worno we dji. Ami iwa ge embe dji, Iwa Kerman, na una wopake namoro, ni na numbna al womben ge kune nayendo. Ni kandja kiwa djimbenka na boina ke to paro ge pora djinda we dji. Ni yenden mal na embe yendo. Na ami iwa kerman moro ge une kandja djindo mal na pille yendo. Na ami merke kantau yendo mor ge, na kandja djindo mal kambono pille yenj. Ta moya al, ni er piye! djino mal une pille er punda. Ta moya al, ni er we! djino mal une er wonda. Na boina moya al, ni kogo embe yeye djino mal une yenda we dji. 10 Jisas pille aya dje, kane ake to una merke aike pi una moi al embe dji, na kandja dje ye aundo, une pillgi kerman paro mal ge, Israel una mor al embe naparo dje na kando we dji.

11 Na kandja dje ye aundo, una iwana merke dumo yemyem moye al kere er God dumoye wopake yero al wo iwa Abram, Aisak ne, Jekop boll aike kwa nane. 12 Ba God asa dje i una mor ge wo namoye. God dumoye wopake yero al mop aune ge, God to seke worda. Kambono po emill yenda al molo, yenekne kasmane koglo, kimb kallgane yene we dji.

13 Ami iwa kerman moi al Jisas, ni er piye! dji. Ni pillgi djin pille ni boin iwa ge kiwa moya we dji. Jisas kandja embe dji poke ge, boi iwa ge kun taimane kiwa moi.

Pita game gama ana kope ke toi Jisas wo i gun woro awi

(Mak 1.29-31 ne, Luk 4.38-39)

14 Jisas Pita numbiye al po kani, Pita game ana kope ke toi, gakle ninga dji. 15 Jisas po anagama agle abika, une gakle alla kiwa yei. Anagama agle po kwa mokna gale iwo Jisas awi.

Una merke ke toi moi Jisas wo i gun woro awi

(Mak 1.32-34 ne, Luk 4.40-41)

16 Taman pika olpa er kal puno dje yeika, una merke kum ke tukne al moi ge Jisas moi al iumaka, Jisas kandja dje awika kum pakna moi ge er orko pi. Una porapora ke toi moi ge Jisas i gun wori; kiwa moi. 17 Une embe yei ge, propet Aisaia asa pepa bolo pagi mal megiye toi. Une pepa bolo embe dji, nono ke kayekaye pai mopin ge, une wo i gun woro awi, kiwa mormon we dji. a 

Jisas boll kondwe wanbon mal

(Luk 9.57-60)

18 Una merke Jisas gull bolo i pakna wormaka, une kane kogoye una moi al embe dji, nu erim kerman moro al ge nono er konato bon we dji. 19 Djika God lo dje awi iwa ta wo embe dji, Jisas ni dumo porapora ben al ge, nono aike er boll we dji. 20 Djika Jisas embe dji, dowa ka mor ge yenekne numbne yero ba, Una Wombe panda ge numbiye nayero we dji. 21 Djika Jisas kogoye iwa ta embe dji, Iwa Kerman, nono aike boll ba, asamoll na nena gull to pagle are wono we dji. 22 Ba Jisas embe dji, una goi una mor ge yenekne wo ipo gull tane; ni na boll er we! dji.

Kam kopo kerman woi ge Jisas djika alla nawoi

(Mak 4.36-41 ne, Luk 8.22-25)

23 Jisas kanu al er pakna pika, kogoye una aike po 24 nu erim moi al pakna pi. Pumaka, kam kopo kerman woika, nu er kanu al pakna wo, puka to moi ba, Jisas ou pa moi. 25 Kogoye una wo une to mage embe dji, Iwa Kerman, nono gopon manda yendo, ni no amblo pille dje aumben we dji. 26 Jisas embe dji, ye pillgi kembis pai paro, ye namba yei pille kand gor ne? dji. Une agle kam kopo ne, nu boll aike kandja awo embe dji, ye yepill pora djindo, alla nayese! dji. Une kandja embe djika kopo ne, nu olup kaima ta nayepill. 27 Kogoye una kand golo, yenekne kandja dje pille embe dji, une ge namba mal molo, kam kopo ne, nu kandja djindo mal pirmell ne? dji.

Jisas iwa soka kum ke tukne al mopill i wori

(Mak 5.1-17 ne, Luk 8.26-37)

28 Kambono nu erim djeke yemto una Gadara makimbne al po pillau dji. Djimaka, iwa soka ku gona al una gull to to yei al kere, er Jisas moi al wopill. Soka una toto yepill una mopill pille, una kand golo kondwe ge nawani. 29 Soka yau to embe djipill, God wariye wonden ge, ni no namba ye auno dje pille wonden? Ege ta nayero ba, ni no ye ke ye auno dje wonden mo? djipill. 30 Kambono kandja dje moi al ge, kog merke ellke molo em no moi. 31 kum ke yembe ye dje embe dji, ni no dje worben pandaka, ni no dje kog tukne al worben we dji. 32 Jisas, kapla, ye er pume! dji. Djika, kum ke iwa ge kere er kog tukne al pakna pumaka, kog muk dje tabale er kal po nu erim moi al nu no golo keri.

33 Golo kermaka kog tau moi una muk dje seke po er dumo kerman pakna po Jisas yei mal ne, iwa soka kum papill yepill mal dje una awi. 34 Aumaka una porapora dumo kerman pakna moi ge kere Jisas kanbon dje woi. Wo Jisas kane embe dji, ni er piye! dji. No dumene kere er dumo tambiye ta ben we dji.

Copyright information for `GAM