Matthew 9

Una ta kake agle golo ke yei ge Jisas wo i gun woro awi

(Mak 2.1-12 ne, Luk 5.17-26)

Jisas kanu al pakna po, er nu erim yemto, yene dumoye kaima yei al wo pillau dji. Djika iwa ta kake agle goi una ta moi. Una palbam ye tublo i Jisas moi al womaka, Jisas kani kambono pillgi paika, kake agle goi una moi al embe dji, womba ni wo pille! dji. Ni singare ke ye wanin ge na kere aundo we dji. Dji ba God lo dje awi una ellne kumbso, yenekne kandja dje embe dji, una ge God kandjiye abro, God moyo dje pille yendo we dji. Jisas pi kambono nomane al embe paika embe dji, ye namba yei pille kandja ke ye nomane al paro ne? dji. Iwa singare ke ye wani na kerdo mal ge, ye kanne naparo ba, alla na djino une agle kond er punda ge ye kanne kune yendo. Na embe yeno ge ye kanne, na namba paraka, una singare ke ye wanne mal na kere auno ge kune yendo we dji. Jisas kandja embe dje pagle, une kandja dje kake agle goi una moi al embe dji, ni agle palbam amblo i er numbin al piye! dji. Djika une agle palbam amblo i er yene numbiye al pi. Pika una merke moi ge kane kand golo, Jisas una kiwa mal embe moro ba, God namba kerman awi we dje God kandjiye amblo pla wori.

Jisas djika iwa Matyu boll er pupill

(Mak 2.13-17 ne, Luk 5.27-32)

Jisas dumo ge kere po kani iwa Matyu we dji ge une takis inj numb numog moi. Jisas po embe dji, ni na boll we! dji. Matyu agle er woika, Jisas boll aike er pupill.

10 Po Matyu numbiye al mopillka, ku takis i una ne, singare ke yei una ne, una merke womaka, Jisas kogoye una boll kwa aike no moi. 11 No molmaka Parisi una kane Jisas kogoye una moi al po Jisas kandjiye amblo embe dji, ye tisane moro ge une namba yei pille ku takis inj una ne, singare ke ye waninj una boll kwa aike no moro ne? dji. 12 Djimaka Jisas pille embe dji, man, una kiwa moye ge dokta moro al napine; una ke tonda una ge dokta moro al pine we dji. 13 Kandja ta Baibel al paro ge ye pille i nomane al worne. Baibel embe djindo, ye wandill golo una awi dal, na wo piyo ba, ye opa kiwa gale na aune ge na ke kanno we dji. Jisas embe dji, una wopake mor ge yenekne nomane ake tane dje na nawoll. Na singare ke yenj una nomane ake tane dje pille woll we dji.

Una God boll kor molo kwa mokna mapill yene

(Mak 2.18-22 ne, Luk 5.33-39)

14 Kune ge Jon kogoye una Jisas moi al wo embe dji, no Parisi una boll kamang ye, God pille kwa mokna mapill kune merke yenmon ba, ni kogen una kwa mapill nayenj. Namba yei pille kwa mapill nayenj ne? dji.

15 Jisas kandja buko dje yem woro embe dji, iwa ta ana ino dje yenda ge una merke wo kwa kerman aike nambon we djinda alla, una wone ge wo kimb ye, kwa mapill yene mo? Ge man, wo nayene. Ba alla, are una wo iwa ge to i er pine kune ge kambono kimb ye, kwa nanane we dji.

16 Jisas kandja buko ta dje awo embe dji, kon pakna gole ta yenda, tudo yenda al una allap kindja i taimane woro to boye ge kune nayendo. To boye ge, kon pakna nu al was yeneke, koula djindaka, allap kindja er kembis pundaka, kon pakna tudo yenda al billa dje wor kerman punda we dji. 17 Una wain megiye nuye kindja i kog meme gakle kon gole segiye ge kune nayendo. Kon gole segiye ge, wain nuye yake kerman pundaka, kon billa djinda. Wain nuye er kal makimb al pundaka, kon ke yendaka yembell. Una embe nayenj. Kon kindja i wain nuye kindja segiye ge kune yendo. Embe yene ge wain nuye wopake moyaka kon wopake yendaka yembell we dji.

Ambo ta golo pai Jisas i gun woro, ana ta Jisas konkunom abi ge ke toi kiwa yei

(Mak 5.22-43 ne, Luk 8.41-56)

18 Jisas Jon kogoye una boll kandja dje pa molmaka, iwa kerman ta wo gopiye boglo Jisas moi al embe dji, na abona ipon goi, ni wo abpenka une agle wor gun punda we dji. 19 Jisas agle iwa ge boll aike pupillka, yene kogoye una boll aike er pi.

20 Po kondwe tambiye pumaka, ana ta Jisas mopiye al wo kon momo woro pagi al ulle al une wo abi. Ana ke toi ge, meyam eri to paika, kognumb 12-pela er wo pi. 21 Une wo abi ge yene nomane embe pai, na une konkunom wori ker ta abyo ge, na keina pora djinda dje pi. 22 Une wo abika, Jisas kane ake to ana ge kane embe dji, abona, ni pillgi djin pille, ni kein pai pora djindo. Ni ellin tukin arngan yenda wane mole dji. Djika ke pai ge kune taimane pora dji.

23 Jisas iwa kerman numbiye al wo kani una pupnume to, kimb kallgane ye, olup kerman ye molmaka, 24 Jisas po embe dji, ye er pume! dji. Womba nagoro, kiwa ou pa moro we dji. Ba una po ye Jisas awi. 25 Una merke moi ge Jisas dje bekle woro kere, une numog po womba agle amblo i pla worika, womba alla wor gun pi. 26 Pika una po embe dji, Jisas embe yei we dje kandjambe tomaka, una dumo yemyem moi ge pille pora dji.

Iwa soka nalene emill yei ne, iwa dall ta moi Jisas i gun woro awi

27 Jisas dumo ge kere er pika, nale emill yei una soka are wo yau to embe djipill, Depit wariye wonden ge, ni no wandill golo awe! djipill. 28 Jisas er numog po moika, soka wopillka Jisas embe dji, ye nalene amblo au dje auno kune yenda dje pirmell mo? dji. Soka embe djipill, Iwa Kerman, ni yemben kune yenda we djipill. 29 Djipillka Jisas soka nalene amblo embe dji, ye pillgi djipill pille, ye nalene au djinda we dji. 30 Djika soka nalene kiwa yeika, Jisas kandja dongall dje awo embe dji, na embe yell we nadjise! dji. 31 Ba soka dumo yei al po kandja embe djipill, Jisas embe yei we dje wai djipill.

32 Kod er pumaka, iwa ta kandja naje naje yei iwa ta moika, kum ke une tukiye al moi. Una une ge iumaka, 33 Jisas kane kum ge i worika iwa ge alla kandja dji. Una merke kane aya dje pille embe dji, asa una ta dumo Israel molo embe yei ge no nakanpin we dji. 34 Ba Parisi una Jisas bakalo awo embe dji, kum mor ngambalne pai iwa moro ge une Jisas boll moi pille, une kum ke i wordo we dji.

Jisas una wandill golo awi

35 Jisas dumo kembis kerman aike wane, lotu numb numog po God dumoye wopake kantau yendo mal kandjiyembe wopake ge dje una awo, gaklene ke yei una moi ne, ke toi moi una ge une i gun woro awi. 36 Una merke moi ge wandill mal molo, aulaul ye wani. Sipsip kantau yendo una namoro mal embe molmaka, Jisas kane wandill golo awo, 37 kogoye una moi al embe dji, kwa bolo wopake yei pora dji, wallke nambon kune yendo ba, wallkne una merke namor we dji. 38 Namor pille, ye mau ne moro al kamang yene. Une kogoye una dje wordaka, yene mauye al pakna po kwa wallke aune we dji.

Copyright information for `GAM