Philippians 1

Pol pepa bolo dumo Pilipai una awi

No Krais Jisas boi kogoye una Pol ne Timoti pepa bolo ye Krais Jisas unakye dumo Pilipai mor ge ne, God kogoye yenj una ne, kantau ye mor una no wopake we dje aunmoll. God nono Nane ne, Iwa Kerman Jisas Krais ye wandill golo aumbellka ye ellne tukne arngan yenda moye.

Pol God wopake we dje awi

Na ye pro kune ge na wopake we dje na Godna aundo. Krais kandjiyembe wopake kindja woi ge, na una boll kandja dje awo wanillka ye na pak to awi. Ipon ye embe ye pa mor pille, na ye pille kamang yendo ge na ye wo eri pille aundo. God ye boll kogo kindja mambine bolo yei ge une kogo ye pa pundaka Krais Jisas yem wondaka, une ye boll kogo yendo ge ye pora djinda dje na kaima pro. Ye na mindalna pakna mor pille, na ye wopake pille aundo. Na kaye paro mo na Jisas kandjiyembe wopake paro mal ombine dje una awo yendo ge, God na wandill golo ye awi kogo yendo. Ye na boll aike yenj pille une ye para aundo. God kando, na ye kandja kaima djindo, Krais Jisas ye wopake kaima kando mal, na ye wopake embe kando. Na kamang ye awo embe djindo, ye wal pillpol to, pille kane yenj ge ne, una boll wopake kaninj ge, yake wo kerman punda. 10 Wal wopake uro kaima paro ge ye kanpol tane. Ye kumbene kuruwo yendaka, wambo napanda moyeke are Krais yem wonda. 11 Jisas Krais kogo yei al ge, une singare du dje paro ge ye boll puka tonda moye. Embe yeneke God kandjiye plato kaima panda.

Pol kaye pai ba kandja mambine pa wai dji

12 Agana ambana kambono, na kaye paro ge, Jisas kandjiyembe wopake golo kal punda dje napiye, man. Pa wai dji, una pille mor. 13 Kandja wopake ge pa wai dji pille, Sisa numbiye al eine kantau ye mor una ne, una porapora embe dje kani. Una na to kaye wori ge, na Krais kogo yell pille to kaye wori dje kani. 14 Alla na kaye numb pall al ge, agane kambono, Iwa Kerman wombaye merke moi ge kane kand nagoi, yembe ye God kandjiye dje una awo moi. 15 Ga pende na Krais kandjiye dje er wekle punden we dje molo na boll kumbene ke yendaka, kiyam to Krais kandjiye dje una awinj. Ba alla una pende nomane wopake paraka Krais kandjiye dje una awinj. 16 Ga ge embe kaninj, na Krais kandjiye dje wanill al ge na kaye paro. Embe kaninj pille, ga na wopake kane, Krais kandjiye dje una awinj. 17 Pende ge man. Yenekne pille pla ye, Krais kandjiye dje una awinj ge, nomane wopake boll dje nawinj. Na kaye paro ge imb pende awo pakna worbon dje pille yenj. 18 Ba ga porapora nomane ke paro mo wopake paro ge, na ke napro. Krais kandjiye dje una awinj ge wal kerman paro. Embe yenj ge na wo pro.

Pol gun molo Pilipai una amblo pille dje pa moyo dje pi

19 Na wo pille pa moyo mal. Ye na pille kamang ye awinj ge ne, Jisas Krais Murble na boll amblo pille dje aundaka, na kaye paro ge dje orko worne kiwa moyo dje pro. 20 Na embe pro. Na yage kal natano, asa yell mal embe na eri yembe ye Krais kandjiye dje una auno dje na kaima pro. Na makimb al molo yene kogoye yeno mo na molo goyo ge Krais kandjiye kerman panda dje yendo. 21 Na embe dje kando, na makimb al molo pall dal, na Krais boll wanno. Na goll dal, na wal wopake plato ino. 22 Ba alla na makimb al molo pall dal, una merke amblo pille dje awo pa moyo. Na goyo mo gun moyo ge na namba mal yeno? Na napro. 23 Kondwe soka yero ge na namba mal yeno? Kondwe ta na goll dal, Krais boll moyo ge wopake. 24 Ba alla na pro, na makimb al molo pall dal, na ye amblo pille dje auno ge kune yenda. 25 Na embe molo ye wopake ye auno dje pille pla yendo pille, na ye boll kogo ye moyaka ye pillgi dje molo arngan boll yake pla pine. 26 Na embe ye molo are ye moye al ta woll dal, ye kane wo pille Krais Jisas kandjiye amblo pla woro aune.

Pilipai una imb kaki al God yembe bolo awi

27 Wal kerman ta paro ge embe, ye wanmoye al Krais kandjiyembe wopake djindo mal, ye du dje paro mal yene. Ye embe yei dal, na wo kanno mo una djine piyo ge, ye una boll aglo gi dje moye mor dje na piyo. Una wo man djine ge, ye kand nagoye, ye nomane taimane pandaka, kogo yeneke una Jisas kandjiyembe wopake pillgi djine mal na piyo. Ye kand nagoi dal, kunda yem una embe dje kanne. Ga mor ge wo ke pine paro ba, ye mor ge God i yem worda moye dje kanne. 29 God ye ye wopake ye awi ge ye Krais boll pillgi dji. Alla une kandjiye al urup para kakne dje pille ye awi. 30 Awi al ge, asa una na boll kunda yei mal ye kani, alla ipon ye pir, una na boll kunda ye pa mor. Alla nono kunda aike yenmon pille ye imb para kakinj.

Copyright information for `GAM