Philippians 2

Krais molo kal worika God amblo pla wori

Ge pille ye Krais boll mor ge ye arngan ye mor. Une kandja wopake dje ye aundo pir. Yene Murble ye boll moraka ye kiye dje molo wandill golo una awinj. Krais ye embe ye awi pille, ye una taimane mal moye, ye una kane wopake kanne, ye nomane taimane panda kogo taimane yene. Ye embe yei dal, na wo mabinta piyo. Ye yenekne kandjine amblo pla naworne. Ye una ta i pla woro, ye molo kal woro, yenekne we dje napiye. Nenem kogen asamoll yeno dje napupen. Una djell ta kogone panda ge, ni para amblo pille dje aumben. Krais Jisas nomane pai mal ge ye nomane embe panda moye. Une nomane embe pai. Yene God kaima moi, ba yene God moro mal ge na kerman embe moyo dje napi, man. Une pla embe moi ge kere, una mal embe molo nu kogo yei. Una kani ge una wombane mal embe moi, yene amblo kal woro, God dji mal embe ye molo po goi, kaima, iko pera al goi. Une embe yei pille, God i pla kaima woro kandjiye kerman pagle awi, makimb al una kandjine embe ta naparo. 10 Jisas kandjiye al ge una porapora gopne boglo aune. Kupill al morka, makimb al morka, makimb kalto morka yenj ge gopne boglo embe djine, 11 Jisas Krais ge Iwa Kerman moro we djine. Ge nono Nane kandjiye kerman panda moya.

Kam kandjip talang yendo mal moye

12 Unakna wopake kambono ye mor ge, asa na ye boll molo kandja djill mal ye pille yei. Alla ipon na ye boll namoro ge ye embe ye pa molme! God ye i yem wori ge, ye pille kane ye yake pla po moye. 13 Ge God ye boll ye wordaka, une pro mal ye nomane al pandaka, alla une singare wopake kando mal yene.

14 Ye wal porapora yene ge, ye tawa dje, nonga nadjine. 15 Ye embe yei dal, ye God wombaye moye, ye ale napanda, wambo napanda, djengimb napanda. Una ipon mor ge akemake ye, tagemage yenj ba ye kambono boll aike molo kam kandjip mal embe talang yenda moye. 16 Ye embe molo una gun moye dje pille God kandjiye dje aune. Ye embe yei dal, Krais yem wo kot ye aunda kune, na ye pille pla ye awo, na ye boll kogo yell ge kiwa napi we dje piyo. 17 Ye pillgi djinj ge pille, ye opa dal embe mor, alla ye mor mal una na meyamna aike opa dal tulu dje worne panda na ye boll wo piyo. 18 Ge pille, ye wo piye, ye na boll aike wo kaima pupon.

Pol Timoti dje Pilipai una moi al worno dje yei

19 Iwa Kerman Jisas kapla we dji dal, na Timoti ola dje, dje wornaka ye mor al wonda. Une wane er yem wo ye mor mal kandjambe to aundaka na wopake piyo. 20 Una na boll mor ge une moro mal embe ta namor. Une ye wopake moye dje nomane embe paro. 21 Una porapora yenekne kogone yembon dje pir. Jisas Krais kogoye ge man. 22 Ba no newombe mal embe molo Jisas kandjiyembe wopake dje una awo wanpill pille, Timoti kogo wopake yendo ge ye pille kane yenj. 23 Una na boll namba mal yene? Ta yene mal kane pagle na Timoti ye mor al dje worna wonda. 24 Alla Iwa Kerman na kond to awi dal, na para ye mor al ola dje wono dje pillgi djindo.

Pol iwa Epaproditus Pilipai una mor al dje worno dje yei

25 Epaproditus ye mor al dje worno dje pro. Une ge nono agane moro. Nono kunda yenmon al ge no soka kogo aike yepill. Une ge, ye na amblo pille djinda dje pille, na moll al dje wori woi na boll moro. 26 Une ye wo pille kanno dje pro, ba ye une ke toi we dji pi mal ge, une para ye pille nomane toi. 27 Ge kaima, une ke kerman toi, goya pai ba God wandill golo awi nagoi. Nagoi al ge, God une taimane pille wandill golo nawi, une na para duwe bolo djimben dje pille wandill golo awi.

28 Ge pille, na dje wornaka une ye mor al wonda dje pille we yendo. Une wondaka ye kane arngan yei dal, na para nomana merke napanda. 29 Une Krais kogo yei al ke kerman toi, goya pai. Ye na pak to aune napai ba une ye dumone i na pak to awi. Yene gakle al ke to pa moi ge napi, une kogo ye pa moi. Ge pille, une ye boll woi dal, ye wo pille djembon to awo, Iwa Kerman kandjiye al i numog worne. Epaproditus moro mal, una ta embe wone ge, ye pille pla ye aune.

Copyright information for `GAM