Philippians 4

Nono wo pille nomane taimane panda mopon

Ge pille, agana ambana kambono, God na prais aunda mal ge ye mor. Na ye wopake kane, wo pille, kanno dje yendo. Na kandja ipon djill ge, ye Iwa Kerman boll aglo gi djine.

Yuodia ne, Sintike mormell ge na ye pille djindo. Ye Iwa Kerman kandjiye al mormell, ye nomane taimane panda mopell. Alla na kogo taimane yenden iwa ni moren ge, ni ana soka ge amblo pille dje aumben. Na Jisas kandjiyembe wopake dje imb kakill mal ge, soka na boll aglo gi dje molo kogo ye wanpill al, iwa Klemen ne, una pende kogo aike ye wani. Ga porapora mor ge, una gun molo pane buk yero ge kandjine pakna paro.

Ye ege ege Iwa Kerman boll wo piye. Na kandja alla djino. Ye wo pille molme. Ye una boll kiye dje molo yene mal ge una kanne. Iwa Kerman yem wonda ege manda yendo. Imb porapora paro ge ye nomane to napiye. Ye wopake we dje awo, i God awo kamang yene. Awi dal, ye Krais boll mor pille, God arngan wopake ta mal ye aunda, nono pille kane yembon kune nayenda ba, ye ellne tukne ne, nomane ge kantau yenda moye.

Agana ambana kambono, na kandja ulle al ta djino. Wal kaima paro ge ne, wal pai mal paro, du dje paro, kuruwo paro, wopake paro, una wopake kaninj wal ne, wal wopake ta mal pandaka una dje i pla worne wal paro ge, ye wal porapora ge pille moye. Na kandja dje awill ye pille i mal ne, kandja djill pi ne, na singare yell kani mal, ye ege ege singare embe yene. Yei dal, God arngan ye aundo una moro ge, une ye boll moya.

Pilipai una wal i Pol awi ge, Pol i wo pi.

10 Ye na alla amblo pille dje aumbon dje ye nomane embe paro ge, na Iwa Kerman boll wo kerman pro. Ye embe yembon we dje pi ba ye kondwe ta nayei. 11 Na kandja embe djindo ge, wal nayei pille nadjindo, God na ombine dje awi, wal yero mo nayero ge na kapla moro. 12 Wal nayero ge, na pille kane yendo. Wal merke yero ge, na pille kane yendo. Koll tondo mo natondo, wal yero mo nayero ge, God na ombine dje awi pro, wal na boll yenda nayenda ge na kapla moyo. 13 Wal porapora na boll wonda ge, Krais yembe dongall aundaka, na une boll yeno kune yendo.

14 Ba na imb kake moll kune, ye amblo pille dje awi ge na wopake we dje aundo. 15 Ye Pilipai una mor ge kaninj, asa na kindja wo Jisas kandjiyembe wopake dje una awill poke, na propins Masadonia kere er pillka sios ta wo na wal ta pak to nawi, ye taimane pak to awi. 16 Alla na dumo Tesalonaika moll kune ge na wal nayei ba ye na pakto awo awo yei. 17 Ye na alla aune dje pille nadjindo. Ye na wopake ye awi al, God ye awo yem woro aunda dje pille djindo. 18 Ye na aumbon dje yei ge ye Epaproditus dje wormaka, une iwo na awi. Ye na plato awi, na kapla moro. Opa mirang wopake yei, God wopake pro mal embe ye i na awi. 19 Alla ye Krais Jisas boll mor pille, ye wal nayenda ge, na Godna wal merke moro ge, une i ye aunda ine. 20 God nono Nane moro ge, une kandjiye kerman ege ege pandambe. Kaima.

Pol Pilipai una wopake we dje awi

21 God unakye Krais Jisas boll porapora mor ge, ye ga wopake we dje aune. Nono agane kambono na boll mor ge ye wopake we dje awinj. 22 God unakye porapora mor ge ye wopake we dje awinj. Alla, God unakye Sisa numbiye al kogo yenj ge, ye wopake kaima we dje awinj. 23 Iwa Kerman Jisas Krais wandill goro ge ye nomane al panda moye. Kaima.

Copyright information for `GAM