a(Wok Pris 18.5)
b(Lo 30.12-14)
c(Aisaia 28.16)
d(Aisaia 52.7)
e(Aisaia 53.1)
f(Song 19.4)
g(Lo 32.21)
h(Aisaia 65.1)
i(Aisaia 65.2)

Romans 10

God singare yei mal Israel una pille kane nayei

Agana kambono, Israel una er take dje po djine dje pille, na nomana kerman paro, kamang eri ye God aundo. Israel una yenj mal ge na kando. Kambono God nomane paro mal yembon dje yembe yenj ba, kanpol natonj. God nale al una wambo napanda kiwa moye dje yendo mal ge, kambono kanpol natonj. Yenekne nomane paro mal pille yenj, lo ye kune yembona God nale al kiwa mopon we dji ge embe yenj. Una God nale al kiwa moye we dje God embe dji mal ge, ga to worinj. Alla Mosis loye ye kune yembona God nale al kiwa mopon we dje pagi ge, Krais kogo yei al lo ge to pora dji. Embe pille, una yene boll pillgi djine ge, God nale al wambo napanda, kiwa moye.

Una lo karkar ye pagle, God nale al wambo napanda, kiwa moye dje pille iwa Mosis pepa bolo embe dji,

Una lo porapora bolo wori paro ge, ye kune yei dal, gun moye we dji. a 
Mosis pepa bolo embe dji ba, God nale al kiwa molo Jisas boll pillgi dji una ge, nomane embe mal naparo, Krais wo kogo yei pora dji. Nono kogo sipje ye kupill al po Krais dje i kal makimb al worbona une nono God nale al wopake ye worda ge kune nayendo. Alla una gor dumo yero al nono kogo sipje ye kal po Krais dje i pla worbona une nono God nale al wopake ye worda ge man we dji. Baibel kandja embe djindo,

Kandja ge ni boll manda kaima yero, ellke nayero. Ni ellin tukin al ye, djillaken al ye, embe yendo we dji. b 
Kandja pillgi pai kandja ge no ye dje aunmon.

Ge ni djillakin al kandja embe djimben, Iwa Kerman moro ge Jisas wale moro we djimben. Alla, ni ellin tukin al kandja embe djimben, God Jisas dje i pla worika, une er wo gun pi we djimben. Ni kandja ge embe dje pene worin dal, ni er take dje namben, God ni i yem worda. 10 Una ellne tukne al God Jisas i pla wori mal pillgi dji dal, God nale al wambo napanda, kiwa moye. Alla, una djillakene al Iwa Kerman moro ge Jisas wale moro we dje pene wori dal, er take dje napine, God i yem worda. 11 Worda ge Baibel kandja ta bolo wori pai ge embe djindo,

Una ye molo une boll pillgi dji dal, ngandjill nagoye, megye kaima tonda we dji. c 
12 Dji mal ge Juda una ne, epil djell una mor ge kune kune mal embe mor. Ga Iwa Kerman ge taimane moro. Alla una ye molo une moya al pak to aunda dje yau tane ge, une ga porapora ye wopake kaima ye aunda. 13 Ge una er take dje po djine dje pille, Iwa Kerman kandjiye al yau tane ge, ga porapora i yem worda.

14 God i yem worda ba, Jisas kandjiye al pillgi nandji dal, naral pille une we dje yau tane? Ge man. Alla, una Jisas boll pillgi djine ba, una po kandja dje pene nawori dal, ga pillgi napanda. Alla, una Jisas kandjiye djine piye ba, una po nandji dal, ga napiye. 15 Alla una po djine ba, una dje naworne ge, ga po nadjine mal pai. Ge Baibel kandja ta bolo wori pai ge embe djindo,

Una kandja wopake djimbon dje wone ge, una kane wo kerman piye we dji. d 

Kandja wopake ge Israel una to wori

16 Dji ba, kandja wopake pai ge una porapora pille wopake napi. Ge propet Aisaia pepa bolo embe dji,

Iwa Kerman! No kandja dje aupin ba, una pillgi nandji paro we dji. e 
17 Ge pille, embe dje kanmon, una kandja dje auneke, una pillgi djine ge kune yendo. Alla, kandja piye ge Krais kandjiye ge piye. 18 Ba, kandja ge Juda una dji napi mo? Ge man, kambono dji pi. Nono kanmon,

Una dumo yemyem mor ge kandja ge pi. Una dumo yem yem yei al po djimaka una pi. f 
19 Na kandja alla djino, Israel una kandja ge dji napi mo? Ge man, ga dji pi ba alla to wori. Ge Mosis pepa boi al God embe dji,

Juda una ye kumbene ke yenda dje, na epil kiwa mor al aunaka, ye kane minj ine.
Alla na una kandjine napai una mor al ge aunaka, ye kane ellne kumbso aune we dji. g 
20 Mosis pepa boi mal embe iwa Aisaia yembe ye dje kandja embe dji,

Una na pille dulo po nakani ge alla ipon na kane i. Una moi al po na we dje kro napi una ge na er pene woll kani we dji. h 
21 Alla Israel una moi al Aisaia pepa bolo embe dji,

Ege ege na aglena as ye, er yem na moro al wome! djill ba ye na kandja djill ge napi, mop awi we dji. i 
Copyright information for `GAM