a(1 King 19.10, 14)
b(1 King 19.18)
c(Lo 29.4, Aisaia 29.10)
d(Song 69.22-23)
e(Aisaia 59.20-21)
f(Aisaia 40.13, Job 41.11)

Romans 11

God Israel una pende wandill golo awi

Embe yei pille, na kandja embe djino, God yene unakye mop awo keri mo? Ge man! Nanam Juda una moro. Abraam wombaye ge na moro, alla Juda una epilye Benjamin ge na moro. God na nakerdo. Kamasa ke God yene unakye dje i ge, nakeri. Baibel al iwa Elaija ge pille kandja bolo wori pai mal ge, ye nakani mo? God Israel una tonda dje pille, Elaija kamang embe yei, Iwa Kerman! Una wo ni alta pende to tulu dje kal woro, ni propet porapora to golo keri, na taimane moro ba ga na to gopon dje pille yenj we dji. a 

Dji ba God kandja dje yem woro embe dji,

Ge man, ni taimane namoren. Na unakna sepen tausen (7,000) mor. God kende Bal ge, ga gopene boglo nawinj we dji. b 
Iwa Elaija taimane namoi mal embe ge, ipon Juda una porapora God pille mop nawi, pende mor. Alla mor ge God wandill golo, yene unakye moye dje pille dje i. Dje i ge ga kogo ta yei pille wandill golo nawi, man. Kiwa wandill golo dje i. Ga kogo ta yei pille wandill golo dje i we dje kandja kaima paika, wandill golo awi ge wo kiwa pika.

Embe yei pille kandja namba we djimbon? Kandja embe djimbon. Juda una God nale al kiwa mopon dje yembe yei ge yei kune nayei. Yenekne wambo pai moi. Ba Juda una God dje i moi ge, God nale al kiwa moi. Ba Juda una pende man, ga kumbene ku dal pai. Ge Baibel kandja bolo wori pai ge embe djindo,

God yeika, kambono ou dall pai. Yenekne nalene kupille molo, wal nakani. Kamalne pel dje paika, wal pille nai. Asa embe ye pa molo pi ipon ye pa mor we dji. c 
Iwa Depit kandja taimane ge pepa bolo embe dji,

Kwa wopake nane poke ge wal ke kambono boll wonda. Una dowa ka kuwo korka po tonj mal embe to pane. Ku mul ta panda ge, ga wo kulnab yage bolo embe yene.
10 Ni tambenaka, kambono nalene emill yendaka, wal nakanmolo, mopne buko djindaka, ege ege magi dje wan moye we dji. d 

God epil djell una i yem dji

11 Na kandja ta alla dje piyo, Juda una kulnab yagi ge, alla nagye mo? Ge man! Ga alla agye ba, kambono God pille mop awi al ge God epil djell una dje i. Dje i ge, Juda una kane minj ine dje, dje i. 12 Juda una Krais pille mop awi al ge, makimb al una wal wopake i. Alla Juda una kandja napille yei al ge, epil djell una wal wopake i. Ba alla Juda una Krais boll pillgi dji dal, makimb al una porapora wopake uro kaima moye.

13 Epil djell una ye mor ge, na ye pille djindo. God dje wori na ye boll aposel kogo yendo. Alla na ye boll kogo yendo ge na wopake uro kaima pro. 14 Na embe yendo ge, God ye epil djell una dje i mal embe, Juda una para imbon dje yeneke God pende i yem djinda. 15 Ge God makimb al una boll djelldjell moi ba une Juda una keri al ge, une makimb al una wo er taimane pi. Ge wopake yei ba alla, une Juda una alla dje i dal, wopake uro kaima panda. Ge una golo pa aglo er wo gun pinj mal embe panda.

16 Una God aumbon dje pille bret yene poke ge, bret boll gale, tuge ta ipo opa ye God aune. Embe yene ge bret boll yenda ge God wal yenda eri. Kandja taimane ge embe mal paro. God ikoye me ta panda, alla ole ge God ikoye ole para panda. 17 Juda una ge iko olip umbye mal embe mor. Ba God wo ole pende kelip to worika, ye epil djell una iko ole saide mal embe mor ge, God wo ye ipo iko ole kelip to wori al pagi. Pagi ge iko me nuye ido ge ye epil djell i nonjka, ole ta asa pai ge i nonjka, ye embe ye molo wopake mor. 18 Ba ye kandjine amblo pla woro nayene. God wo iko ole simb to wori ge no iwo pagi mormon we nadjine, ye kanpol tane, pir mo? Iko me ge makimb nuye i aunda ye nonj. Ye auneke iko me ge nonda kune nayendo.

19 Ye kandja embe djine, God no i pla woro pagyo dje pille iko ole ta kelip to wori we djine. 20 Ge kaima, God embe yei ba, ole simb to wori ge, ga pillgi nandji pille, une simb to wori. Alla ye ole mor ge ye pillgi dji pille God iwo pagi ye mor. Ye yenekne kandjine amblo pla naworne! Ye kand goye! 21 Pir mo? Ole asa pai ge God asamoll iwo pagi pai. Alla are une wo simb to wori. Alla, ye simb tonda mal pai dal, ye para to worda.

22 God embe yendo ge embe dje kanmon, une wandill golo aundo ba une yembe ye tondo eri. Una mop awo yei ge une yembe ye toi. Ba alla ye mor al une wandill golo awi. Awi al ge ye molo kal woro moye. Man panda, une wo ye para simb to worda. 23 Alla God wo Juda una simb to wori ge, kambono alla pillgi dji dal, une simb to wori al ge alla i pagya. Ge une yenda kune yendo. 24 Alla ye iko olip saide moro mal embe mor, God wo ye mor al ole simb to, ole ge ipo iko djell, iko olip umbye moro al alla pagi. Pagi ge kune nayenda mal pai ba une wopake yei. Ba Juda una mor al wopake uro kaima yeno dje yendo. Juda una iko olip umbye moro mal embe mor, God iko umbye ole simb to kal wori ge, une alla iwo yenekne iko olip umbye pai al alla pagya ge, wopake kune paro mal pagya.

Una porapora mor ge God wandill golo auno dje yendo

25 Agana abana kambono, kandja seke ta pai ge ye yenekne kandjine amblo pla woro djine dje pille na ye piye dje djindo. Kandja seke pai ge embe mal paro. Israel una pende mor ge kumbene ku dal paro. Ba alla kandja napille pa moyeke, epil djell una yenekne namba God dji mal wo pakna moi dal, Israel una ge kandja alla piye. 26 Embe piye pille, God Juda una porapora i yem djinda. Ge Baibel kandja ta bolo wori pai ge embe djindo,

Ye i yem worda iwa ge une Jerusalem kere er orko wo yendaka, Jekop epilye God kandjiye napille moye ge, alla kandja piye.
27 Yene poke ge, na kandja ta kambono boll dje worna yenda ge embe mal panda. Kambono singare ke paro ge na i woro kerno we dji. e 
28 Israel una Jisas kandjiye mop awi pille, kambono God boll kunda yem una mal embe moi. Kambono yei al ge, God ye epil djell una ye wopake ye awi. Ba Juda una mor ge God yene unakye molo pa mor. God Juda una Abraam, Aisak ne Jekop moi al kandja dje gopa to wori yei pille, une Juda una nakeri. 29 Ge kamasa God Juda una wal auno we dji mal ge nakerda. Juda una dje i, yene unakye kaima moye we dje une embe yei ge, kaima yenda, nakerda.

30 Asa ye epil djell una God kandja dji mal pille mop awi, ba ipon Juda una God pille mop awi al ge, God ye boll wandill golo aundo. 31 Paro mal embe, ipon Juda una God dji mal pille mop awinjka God ye boll wandill golo aundo ba, are God Juda una wandill golo aunda. 32 Ge una porapora mop awinj al ge, God dji mal kaye par. Ba God embe yei al ge, una porapora wandill golo auno dje yei.

Nono God kandjiye amblo pla worbon

33 Aya! God wopake uro kaima moro! Une singare yendo mal ne, nomane kerman paro mal ne, wal pro mal ge kerman kaima paro. Nu solwara mur moro mal embe paro. Une wal yeno dje pro mal ge, nono namba mal pupon? Une nono boll singare yendo mal ge, namba mal pille kune yembon? Yembon kune nayendo! 34 Ge Baibel kandja bolo wori pai ge embe djindo,

Una ne mal God nomane paro mal, kaima piya? Una ne mal God moro al po kandja embe djinda, ni ge yemben, ge nayemben we djinda?
35 Una wal naral wal ipo God auneke, God wal ulle awo yem woro aunda? Ge man! Kune nayendo. f 
36 Wal porapora ge God wal me moro. Wal porapora paro ge une ye beki, yene wal ne taimane kaima moro. Yene kandjiye ege ege kerman pa moyabe. Kaima.

Copyright information for `GAM