a(Aisaia 45.23)

Romans 14

Agane kambono singare yenj mal nono nadjimbon

Una pillgi kembis paro una nomane paro mal ge, ye kane nadjine, ye wopake ye i pakna worne moye. Ge iwa ta pillgi dje molo kandja embe djinda, kwa kayekaye paro ge, na nano wambo naparo we djinda. Ba, iwa ta pillgi kembis djinda ge, wal mindjye nanonda, mokna nonda. Iwa ta wal kayekaye nonda ba une age midjiye nanonda una moya al dje ke nayenda. Alla iwa ta midjiye nanonda ge, yene age wal kayekaye nonda ge dje ke nayenda. God kando, soka dje i pakna wori mormell. Iwa ta moya, yene boiye una moya ba, ni una ne mal molo boi una singare yendo ge dje ke ye aunden? Ge man. Une kogo ke wopake yendo ge, yene iwa kerman kane djinda, ni nadjimben. Ba alla boi una moro ge une kaima aglo gi djinda. Yene Iwa Kerman amblo pille dje aundaka, une aglo gi dje moya.

Yendo mal embe, una pende kandja embe djinj, ege ta yenda ege ge God nale al kerman yero, alla ege ta ge man we djinj. Ba una pende kandja embe djinj, ge man, ege ege yero ge God nale al kune mal embe yero we djinj. Djinj ba, ye yenekne mor ge, ye nomane al pille kune ye pagle, singare yene. Embe yenj alla kambono ege yero ge God nale al kerman yero we djinj ge, God pille djembon tambon dje pille djinj. Alla kambono wal kayekaye nonj ge, God pille wopake we dje awo nonj. Nonj ge kanmon, ga God pille djembon to awo nonj. Alla una kwa mapill yenj ge, ga para God pille wopake we dje, djembon to awo yenj.

Nono gun mormon ne, gopon ge, nono boll yero we nadjimbon, man. Nono kond wanmon ge God pille wanmon. Nono gopon panda ge, God pille gopon. Embe mal ge, nono gun mopon mo gopon ge God wombaye mormon. Ba Krais golo aglo er wo gun pi ge, nono gun mormon mo gopon ge, une nono Iwa Kerman molo kantau yeno dje pille golo aglo er wo gun pi.

10 Embe mal ge, ni agan singare ta yendaka, ni kane djimben ge kune nayendo. Namba yei pille ni une kane ke yenden? Pren mo? God kot yenda poke ge, nono porapora po aglo moponka une kot piya. 11 Ge Baibel kandja ta bolo wori paro ge embe djindo,

Na Iwa Kerman kaima moro ge, na kandja kaima dje embe djindo, are una porapora yenekne gopne boglo, kandja dje pene woro embe djine, ni God kaima moren we djine we dji. a 
12 Dji mal ge, nono porapora kot al bon paro, singare ke wopake yenmon mal dje pene worbonka God kane djinda.

Nono agane kulnab yage djine dje yembon

13 Embe yenda pille, agane singare yenj mal, ye dje ke ye awinj ge alla nayene. Ye agane kambono kulnab yage to djine dje pille kanpol tane.

14 Na Iwa Kerman Jisas wombaye moro pille na kandja embe djindo, wal porapora nonmon ge, God nale al wambo naparo we dje na kaima pro. Ba una wal ta kane mapill ye nanane ge, yenekne boll mapill yene. 15 Embe yei pille, wal ta yendaka, ni agan ta kane embe djinda, God nale al wal nambon ge mapill paro we djinda ba, ni po wal ge i non dal, agan ke piya. Ni agan wopake nakanden mal yenden. Krais ni agan pille goi ba, ni po wal ge no, une nomane to ke ye awo yenden ge, kune nayendo. 16 Ye singare wopake ta piye ba una ye dje ke ye djine dje pille, kanpol tane.

17 Embe mal ge, God unakye kantau yendo al ge nono kwa nonmon ne, nu nonmon ge, me embe mal paro mo? Ge man. Nono God Murble boll wo pille, arngan yendaka, singare wopake yembon, me ge paro. 18 Nono nomane embe pai dal, Krais kogo yembon ge, God nono boll wo piya. Alla una kane wopake pille aune.

19 Embe yendo pille singare embe yembon. Nono una boll kumbene taimane pandaka, nono aglo gi djimbon dje pille, singare embe yembon. 20 Alla God ni agan boll kogo yenda ba ni wal namben, mo nanamben ge ni urup naumben. Wal porapora God nale al wopake yero, una nane ba, ni wal ta namben al ge, ni agan ta kane ke pille kulnab yagi dal, ni ye ke ye agan aunden. 21 Ni wal mindjye ta namben mo, wain ta namben, singare ta yemben ge, ni agan ta kane kulnab yagi dal, ni singare ge alla nayemben. 22 Na ke nayendo, na singare pai mal yendo, God ke napiya we dje pillgi djin dal, ni wo pille singare ge yemben, ke napupen. 23 Ba alla ni nomanin soka pandaka, wal ge nano mo nanano dje pin dal, ni pillgi naparo, wambo panda, nanamben. Alla singare ke ta paro we dje pillgi djimben ba, ni po embe yen dal, ni ke yenden.

Copyright information for `GAM