a(Song 69.9)
b(Song 18.49)
c(Lo 32.43)
d(Song 117.1)
e(Aisaia 11.10)
f(Aisaia 52:15)

Romans 15

Krais nomane paro mal singare embe yembon

Nono Jisas kandjiye al pillgi dje, aglo gi dje mormon ge, nono agane pillgi kembis paro, imb kakinj una mor ge, amblo pille dje aumbon, nonekne pille nayembon. Nono taimantaiman dje mormon ge, agane kambono amblo pille dje aumbonka, ga wopake molo, aglo gi dje moye. Ge Krais yene pille nawani, man. Una wo ye ke ye awi ba Krais ge God pille pla ye wani. Baibel kandja ta bolo wori pai ge embe djindo,

God, una ni pille bakalo awi ge, na we dje pille bakalo awi we dji. a 
Kamasa kandja Baibel al embe bolo wori pai ge, nono singare yembon mal ombine dje awi. Baibel kere pupin dal, nono aglo gi dje, God nono inda dje kui ye mopon. Alla God nono wopake pille aundaka, aglo gi dje mormon mal ge, une ye aundaka, ye Krais Jisas boll wanne ge, ye pillgi pai una boll nomane taimane panda moye. Ye embe yei dal, ye kandja taimane djineke, ye nomane taimane pandaka, nono Iwa Kerman Jisas Krais Ne God moro ge, ye une kandjiye amblo pla worne.

Juda una ne, epil djell una nomane taimane panda

Embe yei pille Krais ye boll wopake pille aundo mal embe, ye yenekne wopake pille moye. Ye embe yei dal, God kandjiye kerman panda. Ge Krais Juda una moi al po yenekne boi kogo yei mal ge, une nono ombine dje awi, God Juda una nane kokane kandja embe ye auno we dje wori yei ge, kandja kaima pai kanmon. Alla une woika God nono wandill golo awi ge epil djell una kane God kandjiye amblo pla worne dje pille woi. Ge Baibel kandja bolo wori pai ge embe djindo,

Embe yei pille na epil djell una mor al po ni pille pla yeno. Ni kandjin paro ge na pille i gollang djino we dji. b 
10 Alla kandja ta Baibel al bolo wori paro ge embe djindo,

Ye epil djell una mor ge, ye God unakye boll aike molo wo pillme dji. c 
11 Alla kandja ta Baibel al bolo wori paro ge embe djindo,

Epil djell una porapora Iwa Kerman kandjiye amblo pla wornembe. d 
12 Pi, alla propet Aisaia Baibel al pepa bolo embe dji,

Iwa Jesi yene epilye moi al iwa king gun ta wo epil djell una kantau yenda. Alla kandja djinda mal, une kaima ye aunda dje kambono kui ye moye we dji. e 

13 Kandja embe bolo wori paro pille na kamang embe yendo. God nono pakto aundaka yene kandja dji mal nono aunda dje pille kui yenmon iwa ge, une ye aundaka, ye pillgi djinj al, wo kerman piyeke, ye ellne tukne arngan kaima yenda. God Murble ge ye boll yembe yendaka, God kandja dji mal kaima aunda dje kui ye mor ge, kaima kui ye molo, kere djine dje na kamang yendo.

Pol wo pille God kogoye yei

14 Na agana abana kambono ye mor ge, na kando, ye singare wopake uro yenj. Ye wal pille kune ye, ye yenekne boll kandja beke awinj ge kune yendo. 15 Kune yendo ba na pepa ipon bolo aundo ge, na kandja dongall mal dje awo, ye nomane to magno dje yendo. Yendo ge me embe mal paro. God na wandill golo awo 16 dje worika, na epil djell una moi al po Jisas Krais kogoye yell. Na opa gale awinj una mal embe molo, God kandjiye wopake dje epil djell una moi al ge awill. God Murble ge yendaka ga kumbene kurwo yendaka, opa wopake mal embe moyeke, na ipo God aunaka, God kane wo piya dje na kogo embe yendo. 17 Ge na Jisas Krais kandjiye al po God kogoye embe ye wanill mal ge na kandjina amblo pla worno paro, 18 ba na naworno. Krais na boll kogo yei mal ge na kandja ge dje pene worno, kandja ta man. Na po kandja dje awill al ge ne, na singare ye wanill mal ge ne, God Murble na boll moika, na po kogo dongall merke yell ge, epil djell una kane, God kandjiye al pille karkar yei. Yell ge na Jerusalem molo kogo kindja ye, Krais kandjiye wopake dje una awill. Awo pagle, na alla kondwe tambye kogo ye er propins Ilirikum po kandja dje una awo embe yell. 20 Na dumo ta wane kandja wopake dje una aundo ge, na una Krais kandjiye napille moi al ge na wo pille po kandja dje awill. Dumo ta una dji pi pora dji al ge, na po nadjill. Una djell ta asamoll po numb taki pora dji, na are po numb be al takno kune nayendo. 21 Ge man, kandja Baibel al paro mal ge na yeno dje pro. Baibel kandja embe dji,

Una pende une kandjiye dje nawi al ge, are kanne.
Alla una pende une we dje napi una ge, are piye we dji. f 

Pol Rom po, are dumo Spen puno dje yei

22 Na kamasa ye moi al wono dje yell ba na kogo ge yell pille nawoll.

23 Alla kognumb merke er wo pika, dumo manda ge kogo pai pille, na ye moi al nawoll. Ba ipon na kogo yell pora dji pille, na ye mor al wono dje pille moro. 24 Embe mal ge na dumo Spen puno ba asamoll na ye mor al wono. Na ye boll wo pille moponka, ege tuge ta wo er pundaka, ye pak to auneke, na er dumo Spen puno.

25 Wono ba asamoll na er Jerusalem po God unakye pak to auno paro. 26 Yeno ge, Jerusalem una pende wal nayei pille, God unakye propins soka Masedonia ne, Akaia molo kane, ku i pakna woro embe dji, nono God unakye wal nayei Jerusalem mor ge pak to aumbon we dji. 27 Yenekne nomane pai mal pille embe dji, nono wal ta awo yem woro Jerusalem una aumbon paro we dji. Dji ge kandja wopake mal dji. Asa Juda una wo epil djell una moi al, kupill al kandja mal embe dje aumaka, kambono wopake pi pille, wal makimb wale awo yem woro aumbon we dji ge kandja kune mal embe dji.

28 Embe yei pille na ku ge ipo Jerusalem una auno. 29 Awo kere, are na er dumo Spen puno dje pill dal, ye mor al wono. Alla na kando, wono poke ge, Krais na ye wopake ye aunda mal embe, une ye ye wopake ye aunda.

30 Agana kambono ye mor ge, na kandja dje ye aundo, nono Iwa Kerman Jisas Krais wombaye mormon pille, ye na pille kamang yene. God Murble ge yei, nono wopake kane aunmon mal ge pille, na yembe ye God pille kamang yendo mal ge, ye na pille kamang embe yene. 31 Na er Jerusalem punaka, Juda una God kandjiye mop awinj una wo na to djine. Alla na po God unakye mor al ku ge aunaka, una wopake piye dje ye kamang embe yene. 32 Yene ge, God kapla we djindaka, na wopake pille ye mor al wono. Na ye boll yepall ta waka moyaka, na yembena alla dongall panda. 33 God nono ellne tukne arngan ye aundo iwa moro ge, une ye boll porapora moya, kaima.

Copyright information for `GAM