a(Aisaia 52.5)

Romans 2

God kot paro mal djinda

Kambono singare ke kaima yenjka God tonda we djinden ba ye taimantaiman dje kune nayenj. Kambono singare ke yenj ge ni ye kune yenden. Yenden pille, God kambono tonda we djinden ge une ni aike tonda dje pille djinden. Nono kanmon, una singare ke yenj ge God kane tondo. Alla God embe yendo ge une paro mal yendo. Una singare ke yeneke ni kane djimben ba kambono ke yenj mal ge ni ye kune yenden. Yenden pille, God tonda ge, une ni aike natonda mo? Ge man! Une ni tonda eri. God ni pille tau kanan molo, wopake ye awo, ola dje natondo ge, ni ke nakanben. Ni nomanin ake tamben dje une wopake ye aundo. Yendo ge ni nakanden mo?

Ba ni girngine dje molo, ni nomanin ake naton ge, God ni tonda mal ge wo er kerman punda dje pille yenden. Are God kot du dje yenda poke ge, une singare paro mal ye ni to derpall yenda. Una singare yene mal ge God kane kot ye top aunda. Una pende singare wopake ye pa molo, wal ta dulo pine. God nonekne kandjine amblo pla woro, une nono pille pla yendaka, nono une boll aike gun molo pa mopon dje yene ge, kambono wal ge pille dulo pine. Pine al ge God ye wordaka, kambono kaima gun molo pa moye. Ba una porapora singare ke ye, yenekne taimane pille we ye wane, kandja kaima paro ge napille mop awo yene ge, God elle kumbso awo to derpall yenda. Una porapora singare ke ye pa moye una ge, imb kerman kake, ke mal embe moye. Ga Juda una asamoll kakne ba epil djell una aike kakneke yene. 10 Ba una singare wopake yene una ge, God pille pla ye, yenekne kandjine amblo pla ye wordaka, ga ellne tukne kaima arngan yenda moye. God embe yenda ge, une Juda una moye al asamoll ye aunda ba, epil djell una moye al ge aike ye aunda. 11 Ge God Juda una wopake kane, epil djell una ke kane embe nayenda. Una djelldjell mor ge God i kune ye aunda, i awo pla kal nayenda.

12 Mosis lo bolo pagi mal ge epil djell una nakani ba singare ke embe yene ge God tonda. Alla Juda una Mosis lo bolo pagi mal ge kani ba lo paro mal embe nayei dal, God lo paro mal tonda eri. 13 Mosis lo bolo pagi ge una kiwa kere kane embe djine, God nale al na ale naparo, na kiwa moro we djine ba djine ge ale paro. Mosis lo dji mal una pille kane embe yei dal, God nale al ge ale napanda, kiwa moye. 14 Mosis lo bolo pagi ge epil djell una boll napai ba, Mosis lo kandja dji mal kambono kiwa nomane al pille kane yei dal, nono kanmon, yenekne nomane al ge lo mal embe bolo wori paro. 15 Embe yene ge nono kanmon, God loye kandja djindo mal kambono nomane al pai pille, singare wopake paro mo ke paro ge yenekne nomane al kane kune yene. 16 Ge pille, na kandja wopake dje una aundo ge kandja embe mal dje aundo. Are ege ta wonda, God djindaka, Jisas Krais kot yenda. Una porapora singare ta ye seke yene ge Jisas wo kane djinda.

Juda una ge Mosis loye pille pla yei

17 Alla ipon ge, ye Juda una mor al na kandja dje ye aundo. Ye kandja embe djinj, Mosis lo ge God nono awi pille une nono kot ye naunda, nono God unakye kaima mormon we dje molo, ye yenekne kandjine amblo pla woro waninj. 18 God nomane paro mal ge ye kaninj. Alla, Mosis lo singare wopake paro mal ge ye kane kune yenj. 19 Ye kandja embe djinj, Mosis lo ge God iwo nono awi pille nonekne nomane ge kune paro we djinj. Una nalene emill moye ge no kond ombine dje aunmon we djinj. Una emill ye pai al waninj ge no wamo suwa gale iwo aunmon we djinj. Una dall nomane pai ge no kandja beke awo, womba ker ge kandja beke awo, embe ye kandja pai mal djinmon we djinj.

21 Ye una mor al po kandja beke awinj ba ye yenekne kandja djinj mal ge yenj mo? Ye kandja embe djinj, ye wal kunumb nanome! djinj ba ye wal kunumb nanonj mo? 22 Iwa ana ye mor ge djingjang nayeme! djinj ba ye po djingjang embe nayenj mo? Una god kende mor al po gopne boglo yene ge ye man djinj ba, kambono lotu yenj al ge ye numog po wal kunumb nanonj mo? 23 Ye yenekne kandjine amblo pla woro embe djinj, Mosis loye ge no kanmon we djinj ba lo kandja djindo mal ye nayenj al ge, ye God bakalo awinj. 24 Ye lo to worinj ge kandja ta Baibel al paro ge embe djindo,

Ye singare ke yenj al ge epil djell una kane God kandjiye ge bakalo awinj we dji. a 

Juda una gaklene kelip tonj ge me embe mal paro

25 Ge ye Juda una God unakye mopon dje gaklene kelip tonj, ba ye Mosis lo bolo wori paro mal pille kane yei dal, yenekne gaklene kelip toi ge kune mal embe panda. Ba ye gaklene kelip to, alla Mosis lo djindo mal to wori dal, epil djell una gaklene kelip natonj mal embe moye. 26 Alla Mosis lo djinda mal ge epil djell una pille kane yei dal, God nale al ge yenekne gaklene kelip toi una mal embe moye. 27 Mosis lo bolo pagi ge ye kaninj alla ye gaklene kelip toi una mor ba, ye Mosis lo djindo mal pille kane nayenj al, ge pille epil djell una kane dje pene worne. Ga gaklene kelip natoi ba Mosis lo pille kane yene ge, ga ye mor al embe djine, God ye tonda we djine.

28 Ye Juda una mor ge, ye nane mane Juda una moi pille ye Juda una mor mo? Mo ye gaklene kelip toi pille ye Juda una mor mo? Ge man. 29 Una Juda una kaima moye ge yenekne ellne tukne paknato ge Juda una moye. Gaklene be al kelip natane, man, God Murble wo kambono nomane al ne, kumbene al ge kelip mal embe to aunda. Una embe mal moye ge makimb una kane wopake nayene ba God kane wopake yenda.

Copyright information for `GAM