a(Song 51.4)
b(Song 14.1-3, 53.1-3)
c(Song 5.9, 140.3)
d(Song 10.7)
e(Aisaia 59.7-8)
f(Song 36.1)

Romans 3

God singare kune paro mal yendo

Una embe djine, Juda una mor ge me kerman naparo we djine. Alla Juda una gaklene kelip taneke God nale al djingjang pa moya ge kambono gaklene kelip tonj ge kiwa tonj; me ta napai we djine. Ba djinj ge kune nayendo. Juda una mor ge me kerman paro. Kandja ngambale ge embe mal paro. Asa God kandjiye dje awi ge une Juda una moi al ge dje awi, ye amblo gi dje molme! dji. Alla God kandjiye pai ge Juda una pende kane mop awi, ge kaima. Yenekne kandja dji mal ge nayei, ba alla nayei al ge, God wal auno we dji ge ye naunda mo? Ge man, une kaima aunda! Makimb una porapora mor ge kandja kende djine ba God kende nadjinda. Kandja Baibel al paro ge embe djindo,

Ni kot ye aunden ge kune paro mal ye aunden. Una wo kandja djine ba ni kandja dje yem woro yembe yemben we dji. a 
Una pende kandja embe djinj, nono singare ke yepin ge me wopake ta paro. Singare ke nayepinka God nono ye wopake ye awi ge, una nakanmaka. Ba alla God nono wopake ye awi, nono une nale al djingjang pa namoro. Namoro pille, God nono djingjang pille elle kumbso awo tonda ge kune nayendo we djinj. (Na kandja embe djindo ge makimb una kandja ale ye djinj we dje na embe djindo) Ba djinj ge kune kaima nayendo. God moro ge singare du dje paro mal yendo. God embe nayenda ge, une makimb una kandja kot ye aunda ge kune nayenda. Ga kandja djinj ge kandja embe mal djinj, no kandjine kende ge yendaka God kandjiye kaima er pene wonda, una kane God kandjiye amblo pla worne. Una amblo pla wori dal, namba yei pille God no singare ke yenmon al ge kane tonda? Man, une no tonda ge kune nayendo we dje ga kandja embe djinj. Kandja djinj ge wopake, man. Me embe mal paro. Djingjang ke yembon ge, wal wopake panda we dje bakalo awo, Pol kandja embe djindo we djinj. Kandja djinj ge God du dje paro mal tonda.

Una porapora kuruwo kama dumo yemyem mor ge singare ke yenj, God nale al kiwa namor

Kambono kandja embe djinj ge kandja namba we djimbon? Nono Juda una wopake mormon ba epil djell una ke mal mor we djimbon mo? Ge man. Na kandja djill pora dji. Juda una ne, epil djell una porapora singare ke aike yenj. 10 Kandja ge Baibel al paro. Kandja embe djindo,

Una taimanta singare wopake nayendo, una porapora singare ke yenj.
11 Una porapora nomane wopake naparo, God pille nakurinj. 12 Una porapora God kere er take dje pi pora dji. Una taimanta singare wopake ta yenda ba ge man. Una porapora ke mal moi pora dji. b 
13 Kandja djinj ge ke mal djinj. Una gull to pagirka, killang yendo mal ge kandja embe djinj. Kandja kende dje, una boll kandja ke dje awo, nomaga ke wo una tondo mal ge kandja embe djinj. c 
14 Kandja bage awo, kandja mangal to awo embe ye mor, d  15 ga ola dje aglo po una to golo, 16 dumo yem yem po waninj al ge, imb kerman i una awij, una ami wopake dje namor.
17 Una boll mor ge wopake namor, yenekne kumbene ge djelldjell paraka, e  18 God pille kand ta nagor we dje Baibel kandja embe djindo. f 
19 Nono kanmon, Mosis lo bolo pagi ge una lo menameto mor una ge pille bolo pagi. Kandja ge bolo wori pai pille nono kanbon, nono una wopake mormon we djimbon ba God man djinda. Ye una porapora makimb al mor ge ye djingjang paro we djinda. 20 Une kandja embe djinda ge me embe mal paro. Una God lo bolo pagi mal ge kere kane, ye kune yembona God nale al nono wambo napanda, kiwa mopon we dje kanne ba ge kune nayendo. Mosis lo kere kanmon al ge, nono una porapora singare ke yepin pora dji dje kanbon.

Una Krais pillgi djine ge, God nale al wambo napanda kiwa moye

21 Alla kamasa Mosis ne, propet kambono kandja Baibel al bolo pagi mal ge, God nono kondwe ta ombine dje awi. Lo dji mal ge ye kune yembona God nale al nono wambo napanda, kiwa mopon, ge man. Juda una ne, epil djell una porapora mormon ge, nono Jisas Krais boll pillgi djipin dal, God nale al wambo napanda kiwa mopon. 23 Una porapora mormon ge nono singare ke yepin pora dji. Nono kupill al po God boll aike mopon ge kune nayendo. 24 Ba ipon Krais Jisas nono top to i yem wori pille, God nono wandill golo awo embe djindo, ye wambo naparo, ye kiwa mor we djindo. Nonekne yembona wambo napanda mopon ba ge man, God yene kiwa awi al ge nono kiwa mormon. 25 God nono elle kumbso awo tonda mal mopin, ba une dje worika, Jisas kal wo yene meyam toi al nono pillgi djipin dal, God nono singare ke kere awo, natonda. Kamasa una singare ke yemaka, God kane kanan molo natoi ge, une nono ombine dje awi kanmon, yene singare kune paro mal yei. 26 Alla ipon, singare ke yenj una Jisas boll pillgi djine ge yenekne wambo napanda, kiwa moye we dje God embe djindo ge, une nono ombine dje awi kanmon, yene singare kune paro mal yendo.

27 Una ne mal yene kandjiye amblo pla woro kandja embe djinda, na singare wopake yell al God nale al na kiwa moro we djinda? Ge man. Nono God nale al kiwa mopon ge nono pillgi djimbon al ge nono kiwa mopon. 28 Nono kandja embe djinmon. Mosis lo kane ye kune yembona God nale al kiwa mopon we djimbon ge kune nayendo. Nono pillgi djimbon, God nale al kiwa mopon. 29 Embe pille, God moro ge Juda una godne moro, alla una djell godne para moro. 30 God ge taimane moro. Une una porapora godne moro pille, una gaklene kelip toi natoi una mor ge kambono pillgi djine ge porapora God nale al wambo napanda, kiwa moye. 31 Ba una kandja embe djine, ni kandja djinden ge, no pillgi djipin dal, Mosis lo mop awo kerbon dje pille djinden we djine. Ba na man djindo. Nono pillgi djinmon al ge, nono lo kandja ge wopake panda dje yenmon.

Copyright information for `GAM