b(Song 32.1-2)

Romans 4

Abraam God nale al wambo napai, kiwa moi

Nono Juda una mormon ge Abraam nono gollne iwa asamoll moi. Une kond wani mal ge kandja namba we djimbon? Abraam singare wopake yei pille God nale al wambo napai kandja ge kaima pai dal, une yene kandjiye amblo pla worda kune yenda. Ba une God nale al wambo napai ge kondwe ge al napai. Napai ge Baibel kandja embe djindo,

Abraam God kandja dji mal pillgi dji pille, God nale al une wambo napai kiwa moi we dji. a 
Una kogo ye po top inj ge, kogo yenj al top inj, kiwa nainj. Ba God embe nayendo. God nale al una wambo napanda, kiwa moye ge, una kogo yene mal pille kiwa namoye, man. God ge yene yendaka, singare ke yenj una wambo napanda kiwa moye dje wori iwa moro ge, une boll pillgi dji dal, God nale al kiwa moye, wambo napanda. Depit kandja ge dji eri. Una kogo ta nayene ba, God nale al wambo napanda kiwa moye ge, ga wo piye we dje Depit pille pepa bolo embe dji,

Una singare ke ta yene, wambo panda ba God kane kere aunda ge kambono wopake molo wo piye.
Iwa ta singare ke yenda ba, God ni embe yen una we dje napiya ge, une wopake molo wo piya we dje Depit pepa embe boi. b 
Una wopake molo wo embe piye ge, ga gaklene kelip tane mo natane ge wopake piye mo? Ge man, nono kandja embe djinmon, Abraam pillgi dji al une God nale al wambo napai, kiwa moi we djinmon. 10 Ba alla une God nale al wambo napai kiwa moi ge wal naral pai pille une wambo napai? Yene gakle asamoll kelip to woro une are God nale al wambo napai kiwa moi mo? Mo une God nale al wambo napai kiwa moi alla are, une gakle kelip to wori mo? Ge man. Une gakle kelip natoi poke ge une God nale al wambo napai, kiwa moi. Une gakle kelip toi ge are toi. 11 Abraam gakle kelip natoi poke ge une pillgi dji pille, God nale al une wambo napai, kiwa moi. God nale al Abraam wambo napai, kiwa moi pille God su ta yei, ge Abraam gakle kelip toi. Embe pille, una gaklene kelip natane ba pillgi djine una ge, ga gollne asamoll moi una ge Abraam moro. 12 Paro mal embe, una gaklene kelip tane ba alla pillgi dji dal, Abraam kambono gollne asamoll moi mal embe moya eri. Ge Abraam asamoll pillgi dji, are gakle kelip toi.

God wal auno we dji ge pillgi dji una moi al pille dji

13 Asa God kandja dje Abraam gollye kambono boll awo embe dji, makimb porapora yero ge na i ye mor al auno we dji . Dji ba Abraam lo ta yei al karkar yei pille God une moi al, na ni kaima auno we dji mo? Ge man. God kandja dji ge Abraam pillgi dji pille, God nale al une wambo napai, kiwa moika, God na kaima auno we dji. 14 Ge God embe auno we dji ge, una namba mal ine? Ge pillgi djine al ine. Alla una yenekne lo karkar ye wani al imaka, nono pillgi ge wal kiwa yeika. Alla, God embe auno we dji ge, wo kiwa pika. 15 Nono kanmon, lo ta pandaka una ale yeneke, God elle kumbso aunda. Ba lo ta napanda ge, una ale yene kondwe nayero.

16 Embe yei pille God wal kaima auno we dji ge une wandill golo kiwa auno dje pille dji. Nono imbon panda, yene kandja dji al kaima aunda dje pupin dal, imbon. Lo kandja djinda mal yembon mo nayembon, ge man. Abraam pillgi dji mal una embe yene ge kaima ine. Alla pillgi djine una porapora moye ge, ga gollne moi ge Abraam moi. 17 Moi ge kandja Baibel al paro ge embe djindo,

Na yenaka ni womban ne, gawan are moye ge merke moye we dji. d 
God kandja dji mal Abraam pillgi dji. God una gor ge i gun woro, wal namoi wal ge alla worika wo moi iwa ge, une kandja dji mal Abraam pillgi dji.
18 God Abraam moi al embe dji, na yenaka kam kandjip merke moro mal embe ni epilin merke are moye we dji. Kune nayenda mal pai ba God kandja dji ge Abraam pillgi djika gawe merke moi. 19 Abraam kognumb wan andret (100) mal embe moi ge wombaye kuya ege pora dji ba, pillgi dje pa moika, yene game gama Sara womba kuya kune nayenda mal pai ba alla 20 God kandja dji mal ge Abraam pillgi dje pa moika, nomane soka napai. Une pillgi kaima dje molo God kandjiye amblo pla woro embe dje kani, 21 God embe auno we dji mal ge une kaima aunda kune yendo dje kani. 22 Abraam pillgi dji al ge God embe dji, Abraam ge, wambo naparo, kiwa moro we dji. 23 Baibel al kandja bolo wori pai ge, God embe dji, Abraam ge une wambo naparo, kiwa moro we dje pepa boi ge, iwa Abraam taimane ge pille naboi. 24 Man, nono pille aike boi. God ge nono Iwa Kerman Jisas i gun wori iwa ge, nono pillgi djipin una mormon ge, God pille embe djinda, ga wambo naparo, kiwa mor we djinda. 25 Una Jisas ipo to goi ge, nono singare ke yepin al to goi. Alla God, nono wambo napanda kiwa mopon dje pille, une Jisas i gun wori.

Copyright information for `GAM