a(Sam 44.22)

Romans 8

Singare ke yepin ge Krais wo i woro, yene Murble i nono awi

Ge pille, Krais Jisas boll aike mor una ge, kiwa mor, God kot ye awo natonda. Ye Krais Jisas boll aike mor pille, God Murble yembe ye worika, nono gun mormon. Asa nono Mosis lo dji al ge, nono singare ke yepin una mopin, God to goya mal embe molo kaye papin. Ba God Murble ye worika nono dje i orko wori, kiwa mormon. Asa nono makimb nomane pai mopin, Mosis loye ye kune yembon dje yepin, man pai. God nono i yem nawori una mopin. Ba nono Mosis loye ye kune nayepin al ge, God wo yene ye kune yei. Yene warye dje wori woi ge, una djingjang paro una mor mal une embe molo wo nono pille goi. Goi al ge, God ye wori nono kaye pa singare ke ye mopin ge alla kere er orko wo kiwa mormon. Nono makimb nomane pai wanpin ba ipon God Murble kandja djindo mal yenmon una mormon. Nono Mosis lo ye kune yembon we dje bolo wori pai ge, nono God nale al ye kune yepin pora dji mopon dje pille goi.

Una makimb al nomane pai mor ge, yenekne makimb nomane paro mal ge singare ke ye waninj. Ba God Murble kandja djindo mal pille yenj una mor ge, God Murble kandja djindo mal pille ye waninj. Una God Murble boll moye ge, gun moye, ellne tukne arngan yenda moye. Ba makimb nomane panda ye wanne una ge, goye. Makimb nomane pai una mor ge, ga God boll kunda yem una mor. Ge God lo djindo mal nayenj, yembon dje yene kune nayenda. Alla God singare wopake kando singare ge, makimb nomane pai mor una ge, yene kune nayenda.

Ba ye makimb nomane napai pille singare ke ye nawaninj, man. God Murble ye boll moro pille, ye une boll aike waninj. Ba Krais yene Murble una boll namoya ge, Krais wombaye namoye. 10 Ye singare ke yei pille ye makimb gaklene goya ba Krais ye boll moya ge, ye God nale al wambo napanda, kiwa molo, ye nomane gun panda moye. 11 Jisas golo pai ge God i gun wori. Wori iwa ge, yene Murble ye boll moi dal, Jisas i gun wori mal embe, God ye wordaka, yene Murble wo ye golo pane ge i gun worda moye.

God Murble awika nono une wombaye mormon

12 Embe yei pille, agana kambono, nono wal ta yembon paro. Nono makimb al nomane panda singare ke nayembon, man. God yene Murble kandja djinda mal ge yembon. 13 Ye makimb nomane panda wanne ge, ye kaima goye. Ba God Murble yembe yendo mal ge, ye i singare ke gaklene al pai waninj ge to wori dal, ye gun moye. 14 Ge God Murble kondwe tondo al pinj una ge, ga God wombaye mor.

15 God yene Murble i ye awi ge, ye nukogo una kand golo yenj mal embe yene dje nawi, man. God yene Murble wo ye i pakna wori, ye God wombaye kaima molo, Nena, Nena dje yau to mor. 16 Nono God wombaye mormon we dje nono nomane al embe pirmon ge, God Murble nono boll moro ge, une kandja taimane dje embe djindo, ge kaima, ni God wombaye moren we djindo. 17 Alla nono God wombaye kaima mopin dal, God wal yenda ge, nono wal yenda, alla Krais wal inda mal ge nono aike imbon. Krais imb kaki mal embe kakpin dal, une kupill al po yene kandjiye kerman paraka wopake moro mal embe, nono para aike po embe mopon.

Are kupill al po wopake mopon

18 Na embe dje pro, ipon imb kakmon ge wal kembis ke yero. Ba are God nono kandjine kerman ye aundaka, une boll aike wopake mopon ge, wal kerman ke yenda dje na pro. 19 Are God ombine dje aundaka yene wombaye kaima moye mal ge God wal beke wori mor ge, kanbonba dje pille kui ye mor. 20 God mangal toika wal beke wori mor ge wo ke pi ba yenekne nayei, God yei. Yei ge wal porapora mor ge kui ye mor. 21 Kambono kaye pa, nom djindaka, gopon dje ye mor ba, God wombaye kere er orko wo wopake moye poke ge, wal porapora mor ge para aike wopake mopon dje pille kui ye mor.

22 Mor ge nono kanmon, kamasa ke, God wal porapora beke yei ge nomane to mor. Ana womba kupon dje pille, ngembill gor mal embe ga nomane to pille molo woi, ipon para to pille pa mor. 23 Yenj mal embe yenmon. Nono kimb ye kui yenmon. God asamoll wal wopake nono awi ge, yene Murble awi, are nono wopake mopon dje kanmon. Ba God yene wal ipo yene wombaye aunda poke ge, une nono mopon al iwo awo, nonekne gaklene gun panda ge iwo awo, embe yenda dje pille kui yenmon. 24 Er take dje nambon, God nono i yem dji pora dji mormon ba, une wal wopake iwo nono aunda ge nono kui ye moponka are aunda. Kui ye molo imbon we dje kandja embe djinmon ge, nono naipin, are imbon dje pille djinmon. Iwa ta wal ta inda dje kui yenda ba inda poke ge, une are kui yenda ge kune nayenda. 25 Alla nono kanmon, wal naipin wal ge, God nono are kaima aunda dje pille kiye dje molo kui yenmon.

26 Yendo mal embe, nono kimb ye kui yenmon al ge, God Murble wo nono pakto aundo. Aundo ge nono kamang namba mal yembon ne, naral wal we djimbon ge, God Murble yene wo elle tukye boll nono pille kamang ye God aundo. 27 Alla God nono nomane pakna kando iwa ge, yene Murble wo nono pille kamang yendo mal ge, God kando. Ge yene pro mal embe ge, yene Murble wo une wombaye mormon pille kamang yendo.

28 Alla God wopake kaninj una, God nomane paro mal yene dje pille, dje i mor ge, nono kanmon, wal porapora ga boll wonda wal ge, God yenda wopake panda. 29 Yene unakye are moye ge une kamasa kani pora dji. Alla, une dje ika, ga yene warye moro mal embe moye dje pille dje i. Embe yei pille, Krais yene age ambe merke moye, une ga agane komne mal embe moya. 30 Alla God asamoll dje ino dje pi una ge, God dje i. Alla God dje i una ge, une ye worika, ga yene nale al wambo napai, kiwa moi. Alla kiwa moi una ge, yene kandjiye kerman pai ge awika ga i pagle, une boll aike wopake moye.

God nono wopake kando mal ge kan pa moya pora nadjinda

31 God nono embe yei pille, na kandja embe djindo, God nono wopake pille aundo, una wo nono to worne kune nayendo. 32 Kune nayendo me ge embe mal paro. Una wo yene warye to goi ba une man we nadji. Dje wori wo nono pille goi. God yene warye i nono awi pille, wal merke plato paro ge i nono aunda eri.

33 Nono God dje i una mormon pille, una wo ni wambo paro we djine kune nayenda. Alla, God ye ale paro we djinda mo? ge man, yene dji, nono wambo naparo, kiwa mormon we dji. 34 Krais Jisas yene golo nono pille aglo er wo gun po pagle, God agle woto molo nono pille kamang ye awo moro. Kamang ye awo moro pille, una wo nono mormon al, ye singare ke yenj, top ke ine we djine ge kune nayendo. 35 Krais nono wopake kando ge, una wo ye worneke Krais nono alla wopake nakanda mo? Ge man. Imb ta wonda mo, una ta wo nono ye ke ye aune mo, kam koll gopon mo, konkunom nayenda mo, wal ke ta wo nono boll wonda mo, kunda panda ge, wal porapora wonda ba, ge man, Krais nono wopake kando ge kan pa moya. 36 Ba una wo ye ke ye aune ge Baibel bolo wori pai ge embe djindo,

No ni woban mormon pille, ege ege una no to gopon dje yenjka, mormon. Una kog sipsip to gor mal embe una no to gopon dje eri yenj we dje pepa embe boi. a 
37 Imb nono boll wonda ba, Krais nono wopake kani pille, nono iwa yembe kaima yepin.

38 God nono wopake kando ge une yembe yendo. Nono gopon panda, mo gun mopon, mo tau agelo ta wo yene mo, murble ke wo wal ta yene mo, imb ipon wonda mo, kumaike wonda mo, wal dongall ta nono boll wonda mo, wal pla kupill al ta wonda, mo wal ta makimb al wonda, mo God wal porapora beke yei ge ta yenda mo? Wal ge wonda ba na embe dje pro, God nono wopake kando ge pora nadjinda. Nono Iwa Kerman Krais Jisas kogo yei al ge nono kanmon, God nono wopake uro kaima kando. Wal ta wo to worda, kune nayendo, nono wopake kane pa moya.

Copyright information for `GAM