d(Malakai 1.2-3)
e(Kisim Bek 33.19)
f(Kis 9.16)
g(Osea 2.23)
h(Osea 1.10)
i(Aisaia 10.22, 23)
j(Aisaia 1.9)
k(Aisaia 8.14, 28.16)

Romans 9

Pol Juda una pille wandill kerman golo awi

Na Krais wombaye moro ge na kandja kaima djindo, kende nadjindo. Na nomana pai mal ne, God Murble kandja dji mal yepill ge kandja taimane djipill pille, na ipon kandja manda djindo ge kandja kaima djindo. Na agana abana Juda una mor ge, ege ege na kambono pille wandill golo awo imb kerman kake embe yendo. Kambono er take dje po djine dje, Krais i yem worda dje na nomana kerman paro. Nanam Krais boll moro ge kere pagle er orko po wamo danaka, na agana kambono alla pakna wo na dumena ineba dje kamang yendo. Kambono ge Israel una kaima moi. God dji yene wombaye kaima moi. God kandjiye kerman pai mal une ombine dje awika kambono kani. Ye na wombana moyeke, na ye Godne moyaka, embe yembon we dje kandja gopa toi. Lo dje awo, lotu djine mal ombine dje awo, kun merke wal kaima ye auno we dje, God embe dje kambono awi. Juda una gollne moi ge kandjine kerman pai. Alla are iwa Krais makimb al woi ge une Juda una moi. Une God kaima moi. Wal porapora ge une kantau ye moraka, ege ege yene kandjiye amblo pla worbon mal pai, kaima.

God Juda una moi al yei ge Pol pepa bolo awi

Juda una mop awinj ge na wandill golo aundo ba na kando, kamasa God wal wopake ye auno we dji mal ge une nakeri. Une kaima yei ba Juda una porapora makimb al molo woi ge, pende Juda una kaima namoi. Yenekne gollne ge iwa Abraam moika, kambono meyam taimane moi ba pende moi ge yene wombaye kaima namoi. Namoi ge me embe mal pai. Asa Abraam wombaye pende moi ba God kandja embe dji,

ni warin Aisak taimane moro ge yene wombaye moye ge ni epilin are moye. Ni warin ta epilye namoye, man we dji. a 
God kandja embe dji ge me embe mal pai. Abraam epilye yene meyam taimane una are moye ge God wombaye namoye, man. God kandja dje Abraam awi mal, una pillgi djine una ge Abraam epilye kaima moye. Moye ge God kandja dji ge embe dji,

Kognumb ta wo er pundaka, na er yem wono poke ge, Sara warye ta moya we dji. b 

10 Nono kandja pupon ge embe mal paro. Sara warye moi ge nonekne gollne Aisak moi. Une yake kerman po molo, ana Rebeka i. I ge Rebeka warye olupokal soka kui. 11 Kui ba womba namopill poke ge God wo Rebeka moi al embe dji,

ni warin komne moya ge kalto moya, age are moya ge nukogo ye age aunda we dji. c 
Dji ge nono kanmon, God yene wal yeno dje pro mal kaima panda pille une embe yei. Womba soka singare ke wopake ge ta nayepill ba, warye are moi ge God dje i, ta ge man.
13 Yei ge kandja Baibel al ta pai ge embe djindo,

Iwa Jekop moi ge na wopake kanill ba iwa Iso moi ge na ke kanill we dji. d 

14 Embe pille, kandja namba we djimbon? Womba ta wopake kane, ta ke kane yei ge, God singare kune paro mal nayei mo? Ge man! 15 God Mosis dje awo embe dji,

na una ta wandill golo auno mo nauno ge, na boll yero. Una ta pak to auno mo nauno ge eri na boll yero we dji. e 
16 Embe dji pille, God nono dje inda ba nonekne nomane panda mal pille dje nainda, nono singare yembon al ge une kane dje nainda, man. Dje inda ge yene wandill golo aunda una dje inda. 17 Ida ge kandja ta Baibel al paro ge embe mal, God dumo Isip king moi al embe dji,

nanam djill ni king mon. Alla ni kogo yenden al ge, na yembena dongall paro mal una kanne dje yell. Yellka, una dumo yemyem mor ge na kandjina amblo pla worne we dji. f 
18 Embe yei pille, God iwa ta wandill golo auno dje pi dal, kaima golo aunda, ge God nomane al. Alla God yene yenda pille una kandja to woro napi dal, ge God nomane. 19 Ba ni man dje pille kandja embe djimben, God ta wandill golo awo, ta yene yendaka una kandja napiye ge, me namba mal pai pille nono God nale al wambo paro? Paro ge yene yendo. God piya mal yenda, una ne mal to worda? 20 Djimben ba ni makimb al una moren, God singare yenda mal ni omuk natamben. Una ta sin galla bekda ba sin ge kandja embe nadjinda, ni na embe beke worin moro ge namba yei pille beke worin moro ne? Sin ge kandja embe djinda mo? Ge man! 21 Una ta makimb kembis ta i pagle, une nomane paro mal pille sin galla soka bekda. Ta wopake bekda, una ipo kogo wopake mal yene. Ta kiwa bekda, una ipo kogo kiwa yene. Une embe bekdo ge kune nayendo mo?

22 Embe mal ge God embe eri yendo. God yembe dongall paro mal ne, yene elle kumbso aundo mal ge, une ombine dje una auno dje pro ba tau kanan molo natondo ge kune nayendo mo? Una wo ke po mor ge une tano dje yendo ba natondo ge kune nayendo mo? 23 Une kanan molo natondo al ge, yene singare wopake ne, kandjiye kerman paro mal une ombine dje aundo. Yene wandill golo auno dje pi una kupill al po wopake moye una kambono ge, une ombine dje aundo. Yendo al ge, kune nayendo mo? 24 Una God wandill golo aunda we dji ge, nono iwana God dje ido mal ge, pille dji. Nono Juda una epil taimane mormon ge man, epil djell mor ge pille aike dji. 25 God dji propet Osea pepa bolo wori pai ge embe djindo,

Na unakna namor una moye ge, na unakna mor we djino.
Alla na wopake nakanill una moye ge, na wopake kanill una mor we djino we dji. g 
26 Osea kandja ta pepa bolo wori pai ge embe djindo,

Dumo ta, ye na unakna namor we djill al ge na po embe djino, na God gun eri moro ge, ye na wombana mor we djino we dji. h 

27 Iwa Aisaia Israel una pille pepa bolo embe dji,

Iwa Kerman makimb al una kot ye awi pora dji, ola dje to pora djinda. Embe pille, Israel una ku okup merke moro mal embe moye ba God una merke dje nainda, yepall ta dje inda we dji. i 
29 Yei ge kamasa Aisaia pepa bolo wori pai ge embe dji,

God yembe pai una moi ge une nono to pora dji mopin ba, une wandill golo awika, nonekne wombane sokarita moi. Une wandill golo nawika, nono dumo Sodom ne Gomora to ke yei mal embe yeika we dji. j 

Israel una pillgi nadji, God nale al wambo pai, kiwa namoi

30 God embe yei ge kandja namba we djimbon? Epil djell una God nale al wambo napanda kiwa mopon dje nayei ba, Jisas boll pillgi dji al, God nale al kiwa moi. 31 Alla Israel una lo ye kune yembona, God nale al wambo napanda, kiwa mopon we dje yembe kaima yei ba, man pai, God nale al wambo pai, kiwa namoi. 32 Kune namoi ge me namba mal pai? Ge kambono Jisas kandjiye al pillgi nandji pille kune namoi. Lo ye kune yembona God nale al kiwa mopon we dje pi. Ku ta aketo tonda ge, kambono nakane po be kablmaka, ake toika kulngab yagi. 33 Yagi ge Baibel kandja ta bolo wori pai ge embe djindo,

Ye pillme! Na kamkimb Sion yero al, una ku mul ta kakene boye ge worill paro. Una ku ge pillgi dji dal, ngandjill nagoye, megye kaima tonda we dji. k 
Copyright information for `GAM