2 Timothy 4

Jesus Kristus Nug eḏua uḏiḵu, nuhig ḏo maḏoḏ ele daaḵu amunu Nug bau dayak aḏi amu mauhak aḏi ele epeḏiadḵu, amu da Nug amu Kayak ele, a noolahp̱a na uḏat imu heḵutnu g̱agaṯag na amenp̱a aṯem. Na amunu dab mak aonna, nai nuhig mehuqe! Danab ag nahip nai dooglagtai o iiṯa iitai doomna amge na haen oh Kristusnu nai mehuqe! Haen oh ag Kayaknu kobol dim lamidḵulagnu ag oolag yaan, daulag batan, g̱agaṯag ele aqe! Na amu henana amu, na bahin aib yom, ip̱uniṯak ele peheṯaknab he! Aḏinu? Dimp̱a haen laa amu danab ag ip̱uniṯak tutuḵu, meu ele, uuglag. Ag ahilag dab mak dim lamidna, ip̱uniṯak danab ham bup̱uak kuḏum diiglag. Diip̱eg, ip̱uniṯak danab amu ag nai laala, danab ag dooglagnu oolag niiṯe ele, amuib ap̱eg dooglag. Amu ag nai genab meu ele amu di meṯana, kaya hamu amunuib daulag human dooglag. Amge nahipnu amu na haen oh dab mak amahlak ele daye! Ug haenp̱a na g̱agaṯag daanna oiye! Kayak nai mehuqak uḏat am na he! Na Kayaknu mehuqak danab daaḵutnu amu na aḏi uḏat heḵutnu daaṯe amu na he!

Dahilnu amu danab ag da iup̱eg mauhḵulnu haen miag do, da goḵulnu aaḵu haen malom. Danab ag doḏ main Kayak medaṯeb amu da amubia daaṯem. Da Jesusnu uḏat ena hein malen, da aḏi uḏat heḵulnu dayom amu hein, gogp̱a tein amu da dahil oop̱a genab doyak ele atog nomi amu gemu nob ena da aoḵulnu amu Kayak Nug aaḵu meum daaṯe. Nob ena amu Naḏi, Nug danab ah tutuḵuib epeḏiadṯe ele amu, Nug eḏua hibaiṯaknu deḏp̱a da meḏaḵu. Amge daḵaib iiṯa, aun laa oh ag Nug eḏua uḏiḵunu tap̱aḏidna daaṯeb ele amu ag ele madaḵu.

PAULUSNU UḎAT MALAḴUNU HEṮE

Dimas nug haen gemu imunuib dab mak awawa, da uuiḏa Tesalonika uḵom. Keresens nug Galata uḵom, Titus nug Dalmesia uḵom amunu na wagai mena, paha da gumiḏna uḏie! 11 Lukas nuḵaib da ele daaṯep amu na uḏiḵutnu amu na Makus, nug da ehaniḏḵunu ena amu, na nug aop̱e, a oh uḏieḏ! 12 Da Tikikas mei, Epesus uḵom. 13 Na uḏinna amu lamen dahil Troas ap̱a Kapas laugp̱a ap̱a uumi daaṯe amu na aon uḏie! Buk oh ele aḵan uḏiḵutnu ool daaṯe amge buk laa, ag buk amu keeke laa onig pasment, amup̱a hep̱ig ele amu, na amu aon uḏiḵutnunab ool daaṯe.

14 Aleksanda, nug am keeke brasp̱a hak doyak danab amu, nug da eheḏnab heiḏom. Dimp̱a Naḏi Nug kobol nug heum ele, amunu elelep̱a nob medaḵu. 15 Na ele nuhignu dab mena autna awe! Aḏinu? Nug ihinig nai tap̱eb na autanab aoḵunu dab ma heum.

16 Tatam da heṯoḏiakp̱a meiḏp̱ig amu laip̱u laa da ii ehaniḏom, ohnab da uuiḏna malap̱ig amge da ab ag qaḏelagp̱a ii nemanu Kayak unuqidṯem. 17 Ag anam hep̱ig amge Naḏi Nug da ehaniḏom, g̱agaṯag ele meḏom amunu da nai aṯem madiḵulnu amu doomi. Iiṯa aḏi, ag heṯoḏiak abenp̱a daap̱ig ele amu, ag ele da oḏel doop̱ig amu Kayak Nug da laion oḏep̱anu behiḏom. 18 Ao, Naḏi Nug hak nau oh oop̱anu, nuhig abenp̱a daaḵulnu eḏua awiḏḵu. Ig Nug binag haen oh metu! Genab.

19 Na Prisila, Akwila amu Onesiporas baeḵudp̱a ele humiṯak dahil imu ap̱e doyeg! 20 Erastas nug am Korint daaṯe amu Tropimus nug am oḏe ele amunu da nug Mailitas ap̱a uuidmi daaṯe. 21 Na haen gamag imup̱a, oug haen iiṯa imup̱a, wagai mena, paha gumiḏna uḏie! Eubilus, Pyudens, Lainas, Klodia amu ig lainḵad ele oh na humidṯeb.

22 Naḏi Nug amu nuhig ehaniṯak oḵai hamu megṯe ele amu nahipp̱a dayeḏ!

Copyright information for `GAW