1 Thessalonians 5

Da taguro timaan tano hinanuat tano Watong.

Io, bar hinsaka metal ta Krais, muat pai supi bia metal na pakat ta nianga ukaia ho muat utano pakana bung ing kaiken ra linge na hanuat kanong muat at muat nunure timaan tar bia no pakana bung tano Watong na hanuat hoing no hinanuat ta tiga ut na kikinau ra bung. Ira matanaiabar diet na tange bia, “Dahat pa na burte ta tiga linge. A malum i kis taar ta dahat.” Io, ta iakano pakana bung at a but na halhaliarai na haan tupas diet hoing ira harpaas na bulu ing bia tiga hahin i wara kinakaha. Ma taie ta nong pa na hilau. Ma muat ira hinsaka metal, iakan ra bung pa na hakarup muat hoing tiga ut na kikinau kanong muat pai nat na kankado. Taie. Muat bakut, muat lon tano palai ra kasakes. Dahat pai lon tano kankado ra bung. Io kaik, waak dahat kubaba hoing diet tari. Na tahut bia dahat na hangala ma dahat na taguro ma ra palai na lilik hoing diet ing diet pai mom. Diet ing diet kubaba, diet la kumkubaba ra bung. Ma ira ut na minom, diet la mamom ra bung. Iesen dahat, dahat ira tunotuno gar na madaraas. Io kaik, waak dahat haruat hoira ut na minom. Dahat na taguro timaan. Hoing ira umri, dahat na sigam no udahat nurnuruan ma no udahat harmarsai hargilaas hoing tiga sigasigam na pala riam. Ma hoing ira umri mah, dahat na kuhe no udahat nurnuruan kawase no harhalon kanong God pai le bul no uno lilik bia no uno ngalngaluan na haan tupas dahat. Taie. I sip bia na halon dahat tano udahat Watong Jisas Krais nong ga maat wara gaie dahat. Ma ga maat wara gaie dahat waing dahat na lon tika mei. Taie ta linge bia dahat lon taar bia dahat te maat. Dahat na lon tika mei. 11 Io kaik, muat na habalaraan ma haragat harbasiane muat hoing muat la gilgil.

Da mur ira bilai na magingin.

12 Io, bar hinsaka metal ta Krais, metal saring muat bia muat na urur ta diet ing diet manga papalim nalamin ta muat. Diet balaure muat ta ira numuat nilon tano Watong. Ma diet pir muat mah. 13 Na tahut bia muat na manga lik hatamat diet ma bia muat na marse diet uta ira pinapalim diet gil. Muat na harbalaan hargilaas.

14 Bar hinsaka metal, metal haragat muat bia muat na hakatom ira malmalungana, ma muat na habalaraan diet ira ut na nginarau, ma muat na harahut diet ing diet pai tur dadas, ma bia muat pa na manga gasien wara hapidanau tiga nong. 15 Muat na harbalaurai timaan bia waak muat balu ra sakena ma ra sakena baling. Iesen muat na walar hatikane wara gilgil ra tahut harbasia ta muat ma diet ira mes mah.

16 I tahut bia muat na guama hathatika. 17 Muat na sasaring hait. 18 Muat na tanga tahut uram ho God ta ira linge bakut. Warah, kanong God i sip bia muat ing muat kis taar ta Krais, muat na lon huo.

19 Waak muat tur bat no pinapalim tano Halhaliana Tanuo. 20 Waak muat malok ise ira nianga gar na tangesot. 21 Iesen, i tahut bia muat na walar kilam ira linge bakut. Muat na palim kawase ira bilai. 22 Muat na tur talur ira mangana sakena bakut.

23 Metal sasaring bia God at nong i tar ra malum ta dahat, na bul hasisingen ira numuat nilon bakut bia na halhaal talur ira sakena taar ta ira gamgamatien. Ma metal sasaring mah bia na balaure ira tanua muat, ira bala muat, ma ira palatamai muat waing taie tiga nong na tale wara kilkilam muat bia a mon sakena ta muat tano pakana bung bia no udahat Watong Jisas Krais na hanuat. 24 God nong i tau muat na gil kaiken kanong i la gilgil haruatne ira uno nianga.

25 Bar hinsaka metal, na tahut bia muat na sasaring wara gaie metal. 26 Muat na haatne leh ira hinsaka dahat ta Krais ma muat na gawane leh diet ma ra tahut na magingin. 27 Iau tange hadadas ta muat tano hinsana ra Watong bia muat na was iakan ra pakpakat ta ira hinsaka dahat bakut.

28 No harmarsai tano udahat Watong Jisas Krais na kis ta muat.

Copyright information for `GFK