John 20

Jisas ga lon balin, sukun no midi.

(Matiu 28.1-8; Mak 16.1-8; Luk 24.1-10)

Ra mala bungbung ra Sade ing baak ga kankado taar Maria nong me Magadalen ga haan ukaia tano midi gaam a nes bia di gate kap se tar no haat tano matanangas tano midi. Io, ga hilau tupas Saimon Pita ma no mes na bulu na harausur nong Jisas ga sip tar ie, gaam tange bia, “Di te kap leh no Watong meram tano midi ma metal pai palai bia di te bul ie iahe!”

Io kaik, Pita ma no mes na bulu na harausur dir ga taman tut laah wara ukarawa tano midi. Dir ga hilhilau haan, iesen no mes na bulu na harausur ga hilau nalua tane Pita gaam a huna hanuat karawa tano midi. Ga heraro laka uram ta ira katona maal diet ga noh taar kaia, iesen pa ga laka. Io, Saimon Pita um nong ga murmur haan tana ga me hanuat gaam haan laka tano midi. Ga nes ira katona maal diet ga noh taar kaia tika ma no maal na haratur di ga pulus no ulu Jisas mei. Iakano maal ga noh sisingen taar at ma ga tamapuli timaan taar. Io, no mes na bulu na harausur nong ga huna hanuat kaia tano midi ga haan laka mah. Ga nes ma ga nurnur. (Dir pa ga palai baak bia ira nianga tane God di ga pakat i tange bia Jisas na tamat tut at sukun ra minaat.)

Jisas ga harapuasa tane Maria nong me Magadalen.

10 Io, ira iruo bulu na harausur dir ga tapukus balin taar ta ira ngasia dir tikatikai. 11 Iesen Maria ga tur taar at nataman tano midi ma ga susuah. Ing ga susuah ga heraro laka uram tano midi ma ga nes leh airuo angelo. Ira kiniasi dir a ponponiana ma dir ga kis taar tano subaan di ga hainoh tar baak no palatamaine Jisas kaia. Tikai ga kis taar urau ra uno ulalang ma nong tikai ga kis taar uras tano uno kinakadus.

13 Dir ga tiri Maria bia, “Awai, u susuah warah?”

Ma Maria ga balu dir hoken: “Di te kap leh no nugu Watong ma iau pai nunure bia di te bul ie he.”
14 Ing ga tange tar huo ga tahurus gaam nes Jisas ma ga tur taar kaia. Iesen pa ga nes kilam ie bia Jisas mon.

15 Ma Jisas ga tange, “Awai, u susuah warah? Sige iakanong u sisilih utana?”

Maria ga lik bia aie no ut na harbalaurai ta iakano matana daha, kaik gaam tange tana bia, “Maris, bia u te kap leh ie, hinawase iau bia u te bul ie iahe, iau nigi a kap leh ie.”

16 Jisas ga tange tana, “Maria.”

Maria ga talinganei ma gaam tange tana hoken: “Rabonai!” (a kukuraina bia ‘tena harausur’ tano nianga gar na Iudeia.)

17 Io, Jisas ga tange bia, “Waak bia u palpalim iau kanong iau pai tapukus baak uram ho Mama. Iesen haan uras ta ira tasigu ma nu hinawase diet bia iau hanahaan um uram tano ragu Sus ma nora diet Sus mah, uram tano nugu God ma no udiet God mah.”

18 Io, Maria nong me Magadalen ga haan tupas ira bulu na harausur ma kanin ra hinhinawas: “Iau te nes no Watong!” Ma ga hinawase diet bia Jisas gate tange tar kaiken ra linge tana.

Jisas ga harapuasa ta ira uno bulu na harausur.

19 Ta iakano Sade ra matarahien ruruk ira bulu na harausur diet ga kis hurlungen taar narakoman tiga hala. Ma diet gate banus bat hadadas tar ira matanangas kanong diet ga burte ira Iudeia. Ma Jisas ga hanuat ga me tur harue diet gaam hamatien diet ma ga tange bia, “A malum ta muat!” 20 Ga tange tar kaiken ga hamines ira iruo lapara limana ma no binabatine ta diet. Ma ing ira bulu na harausur diet ga nes no Watong diet ga manga guama sakit.

21 Tiga pakaan balin Jisas ga tange bia, “A malum ta muat! Hoing Mama gate tule iau, io, iau mah, iau tultule muat huo.” 22 Io, namur, ga manasung taar ta diet ma ga tange, “Muat hatur kawase leh no Halhaliana Tanuo. 23 Bia ing muat lik luban se ira magingin sakena gar tikai, io, God i te lik luban se ira uno magingin sakena. Ma bia ing muat pai lik luban se ira magingin sakena gar tikai, io, God pai le lik luban se ira uno magingin sakena.”

Tomaas ga nes Jisas kaik gaam nurnur tana.

24 Tomaas, nong di kilam ie bia no Kasang, ma aie tikai ta ira sangahul ma iruo, pa ga kis tika taar ma ira bulu na harausur ing Jisas ga hanuat. 25 Io kaik, ira mes na bulu na harausur diet gaam hinawasei bia, “Mehet te nes no Watong!”

Iesen ga tange ta diet hoken: “Bia ing iau pa ni nes ira matana nil ta ira iruo lapara limana ma bia pa ni bul no kaskas na limagu kaia, ma bia pa ni bul halaka no limagu tano binabatine, taie tun at pa ni nurnur.”

26 Ma ra liman ma itul a bung namur ira bulu na harausur diet ga kis taar baling narako tano hala, ma Tomaas tika ma diet. Ma ira matanangas diet ga banus bat hadadas tar iesen Jisas ga hanuat ma ga tur harue diet gaam hamatien diet bia, “A malum ta muat!” 27 Io, ga tange ta Tomaas hoken: “Bul no limaam kai. Nes ira lapara limagu. Tul se no limaam ma nu bul halakai tano binabatigu. Waak u lilik iriruo iesen nu nurnur!”

28 Kaik, Tomaas gaam tange tana, “Augu no nugu Watong ma no nugu God!”

29 Io, Jisas ga tange tana bia, “U te nurnur kanong u te nes iau. Iesen diet daan ing diet pai nes iau ma diet nurnur at.”

No burena kaik Jon gaam pakat iakan ra pakpakat.

30 Io, Jisas ga gil ra haleng mes na dadas na hakilang ra matmataan ta ira uno bulu na harausur ing iau pai le pakat halaka ta iakan ra pakpakat. 31 Iesen iau te pakat kaiken waing muat naga nurnur um bia Jisas aie at no Mesaia, no Nati God, ma bia muat na nurnur tana, io kaik, muat na hatur kawase no nilon tutun nong i kis tana.

Copyright information for `GFK