Romans 8

No Halhaliana Tanuo i halamlam dahat sukun no sakana palpal narako ta dahat ma i tar no nilon taar ta dahat.

Io kaik um, God pa na kure hagahe diet ing diet narako ta Jisas Krais. Kanong warah, no Halhaliana Tanuo nong i tar ra nilon taar tagu narako ta Jisas Krais i kure tar iau, gi halangalanga iau huo sukun no nugu kinkinis ra hena no dadas ta ira magingin sakena ing i harkurai taar tagu ma i halangalanga iau sukun mah no nugu kinkinis tano ra minaat. Hokaiken, God ga tule no Natine tus ukai hoing ira sakana tunotuno bia na gil ra pinapalim tupas ira magingin sakena. Ing bia ga gil huo ga gil harkurai wara halhaliare ira magingin sakena ing i kis ta ira sakana tunotuno. Iakano linge ing ira harkurai ta Moses pa ga petlaar bia na gil kanong ira sakana palpal ta ira tunotuno i kap se no dadas ta kaike ra harkurai. Ma God ga gil huo waing dahat ing dahat pai lon mur ira sinisip ta ira udahat sakana palpal ma sen dahat lon mur ira sinisip tano Halhaliana Tanuo, io, dahat naga gil haruatne ira hartula ta ira harkurai ta Moses. Hokaiken, diet ing diet gil haruatne ira sinisip tano udahat sakana palpal, no sakana palpal i lue ira udiet lilik. Iesen diet ing diet gil haruatne ira sinisip tano Halhaliana Tanuo, no Tanuo i lue ira udiet lilik. Ing bia no sakana palpal i lue no lilik gar ta tikai, na halamlam tar ie tano minaat. Iesen bia no Halhaliana Tanuo i lue no lilik gar ta tiga nong, na halamlam ie taar tano nilon ma nora malum. Ma i ngan huo kanong warah, no tunotuno nong i sakena, no uno mangana lilik i manga malentakuane God. Tiga mangana tunotuno huo pai hanapui ta ira harkurai ta God. A tutun, pa na petlaar at bia na gil huo. Diet ing no sakana palpal i lue diet, diet pai petlaar bia diet na haguama God.

Iesen pai ngan huo balik ta muat. No sakana palpal pai lue muat. Taie. No Halhaliana Tanuo i lue muat kanong no Tanuo ta God i kis taar narako ta muat. (Io, ma bia sige ta tikai pai hatur kawase no Tanuo ta Krais, pai gar ta Krais ie.) 10 Ma bia Krais i kis taar narako taam huo, no tanuaam i lon taar kanong God i te kure bia u takodas ra matmataan tana. Ma a tutun bia u te gil ira magingin sakena ma no palatamaim i kis taar tano minaat, iesen u lon taar at. 11 Ma bia no Tanuo ta iakanong nong ga hatut pukus Jisas sukun ra minaat i kis taar narako ta muat, io, aie nong ga hatut Krais talur no minaat ma na tar lon mah ta ira palatamai muat ing na maat. Ma na gil huo ma no Tanuana nong i kis taar narako ta muat.

12 Io kaik, bar hinsakagu ta Krais, no udahat binlan at ie bia dahat na haut leh no Tanuo bia na lue dahat, ma pataie bia dahat na lon haruat ma ira udahat sakana palpal. 13 Kanong warah, ing bia muat lon haruat ma no numuat sakana palpal, a tutun sakit, muat na maat. Iesen bia ing muat la gilgil bing ira gingilaan ta ira sakana palatamai muat ma no harharahut tano Halhaliana Tanuo, io, muat na lon kanong diet ing no Tanuo ta God i lue diet, a nati God diet. 15 A tutun iakano kanong muat pa ga kap tiga mangana tanuo nong i te wis kawase habaling muat ma ra bunurut. Taie. Muat te kap no Tanuo nong i halon hapatangen dahat wara natine. Ma no Tanuo i haharuatne dahat bia dahat naga sasaring ma ra balaraan bia, “Mama, nugu Mama!” 16 Ma no Halhaliana Tanuo at i hinawas tutun taar ta ira tanua dahat bia dahat ira nati God. 17 Ma bia dahat ira natine, io tutun mah bia dahat ira mahal na tunotuno ing na rumahal namur. Dahat ira mahal na tunotuno gar ta God ma dahat na rumahal tika ma Krais kanong dahat la kapkap tika mei ira uno harharangungut waing dahat naga laka tika mah mei tano minamarine.

No Halhaliana Tanuo i haharuatne dahat bia dahat na nanaho ma ra nurnuruan uta ira haridaan namur.

18 Hokaiken, iau nes kilam bia ira udahat harangungut utano pakana bung kaiken i manga hansik sakit ing bia da hapupuo ie ma no minamar ing na hanuat puasa ta dahat. 19 Ma iakan i palai kanong no hakhakisi bakut i kis kawase ma ra tamat na masmasingan utano pakana bung bia God na hapuasne ira natine. 20 Ma no hakhakisi bakut i nanaho huo kanong God i te kure tar bia no hakhakisi pa na kap no kinkinis nong i haruat ma no mangana kinkinis God ga puo tar wara utana. Pai ngan huo kanong no hakhakisi at ga sip bia na ngan huo. Taie. I ngan huo kanong iakanong nong ga kure tar bia na ngan at huo ga sip bia na ngan huo. Iesen ga gil huo tano hakhakisi tano ula hanuo mah bia na nanaho ma ra nurnuruan bia na langalanga sukun ira uno winwisaan ing a mon marmarota ine, ma bia na manga langalanga timaan tika ma ira nati God.

22 Io, ma dahat nunure um bia no hakhakisi bakut i te kilkilingane ra but na tinirih tuk taar katin hoing tiga hatatnaan a bulu i papaas ie. 23 Ma pai no hakhakisi sen mon. Dahat ing dahat te kap no Halhaliana Tanuo hoing no luena hartabar nong i hatutun bia dahat na kap ira mes na haridaan namur, dahat ngan huo mah. Dahat kilingane ra but na tinirih narako ta ira bala dahat ing dahat kiskis kawase no pakana bung bia God na halon hapatangen tutun dahat wara natine ma bia na halangalanga ira palatamai dahat huo. 24 Ma dahat kilingane ra tinirih huo kanong ing God ga halon dahat ga tar no mangana harhalon taar ta dahat bia dahat na nanaho ma ra nurnuruan ta ira linge dahat na kap namur. Iesen bia ing dahat nanaho ma ra nurnuruan ta ira linge dahat nes kaiken, io, dahat pai nanaho tutun ma ra nurnuruan. Kanong warah, taie tikai pai nanaho ma ra nurnuruan uta ira linge i te hatur kawase um. 25 Iesen dahat nanaho ma ra nurnuruan uta ira linge dahat pai le hatur kawase baak, kaik dahat nanaho ma ra bala maat.

26 Huo mah, no Halhaliana Tanuo i harahut dahat uta iakano linge nong dahat pai petlaar wara utana. Hokaiken, dahat pai nunure bia asa ing dahat na sasaring utana iesen no Tanuo i sasaring wara gaie dahat. Ing i sasaring i kilingane ra but na tinirih ma i hapuasne huo ing pai tale bia da hapupuo ma ra nianga. 27 Ma God nong i la siisilih ta ira linge narako ta ira kati dahat i nunure tar no lilik tano Tanuo kanong no Tanuo i la saasaring haruat ma no sinisip at ta God wara gaie dahat ira matanaiabar tus ta God.

28 Ma dahat nunure bia God i la paapalim ta ira linge bakut wara hatahuatne nora bilai wara gaie diet ing diet sip God, diet at ing i te tatau leh diet haruat ma no uno lilik i te puo tar. 29 Ma iakan i palai kanong diet ing God ga huna bul no uno lilik uta diet wara nunure diet, io, diet at mah God ga puo tar menalua bia diet na kikios ing naga haruat hoing no Natine. Ma ga puo tar huo waing no Natine naga kap no luena kinkinis ta diet ira haleng na tasine. 30 Ma diet ing God ga puo tar menalua huo ta diet, io, ga tatau leh mah diet. Ma diet ing ga tatau leh diet, ga kure mah bia diet takodas ra matmataan tana. Ma diet ing ga kure uta diet huo, ga hamar um diet ma no tamat na minamar.

God i manga tur ma dahat ma no uno harmarsai pai tale bia na haan talur dahat.

31 Io, dahat na tange um hohe uta kaike? Ing bia God i tur wara gaie dahat, io, sige um i tale bia na tur wara hanghagahe dahat? 32 Nes! Pa ga hok tar no Natine tus. Taie. Ga tar sei bia na maat wara gaie dahat bakut. Aie nong i tar no Natine taar ta dahat huo, hohe, pa na tabar bia dahat ma ira linge bakut mah? A tutun sakit bia na gil huo! 33 Sige um i tale bia na tung diet ing God i te gilamis diet? Taie tikai. God aie nong i kure bia tiga nong i takodas ra matmataan tana. 34 Sige um i tale bia na kure hagahe dahat? Taie tikai. Jisas Krais aie nong ga maat. Iesen no tamat na linge balik bia God ga hatut pukus ie. Ma aie nong i kis tano tamat na kinkinis tano kata na limane God ma i la iangianga wara gaie dahat kaia. 35 Ma sige um i tale bia na harbasiane dahat sukun no harmarsai gar ta Krais? I tale bia nora purpuruan na gil huo, bia a harangunngutaan bia a hinelar bia a tamat na sam taburungan? Ing bia pata sigasigam bia ira hiniruo i hutaten dahat bia da kut bing dahat, i tale bia kaiken ra linge na harbasiane dahat huo? 36 I hoing no nianga ta God di ga pakat ie i tange bia,

“I hutet bia mehet na hiruo na minaat pane haitne ugu God.
Diet nes kilam mehet bia mehet hoira sipsip mon ing diet wara kutkut bing.”
37 Iesen pa na ngan huo. Ing kaike ra linge sa bia dahat kilingane, dahat manga lua sakit balik kanong dahat kis taar ta iakanong nong ga tar no uno harmarsai taar ta dahat. 38 Ma i tale bia ni tange huo kanong iau nunure tun at bia taie tiga linge pa na tale bia na harbasiane dahat sukun no uno harmarsai. Iakan ra nilon ma no minaat mah dir pa na tale. Huo mah ta ira angelo bia ira dadas na sakana tanuo, ma ta ira linge kaiken ma ing mah namur ma ta ira mes na dadas na lualua mah. 39 Taie tikai aram naliu bia kenas napu ma bia ta mangana linge sa mekaia tano hakhakisi bakut pa na tale bia na harbasiane dahat sukun no harmarsai gar ta God nong i tabar dahat mei tano udahat kinkinis narako ta Jisas Krais no udahat Watong.

Copyright information for `GFK