1 John 1

Yal iray ta milekenangwa ibal para muru ta milekerabinga

Yal iray ta milekenangwa ena ibal para muru ama ta milekerabingire, yalini milungwa mere, ka minin ganin bile i terabina. Kamin kaya goma wen kalkan kawn kule ere yongwa, yalini milemue. Milungwa omilan kanere, yalini u maribe ongwa kanere, ka dungwa pirere, yalini milungwa gain mina aa tere na ibal kobe bole para milebinga. Mile painangwal painangwa Kobaan, yalini Abe God bole milere, ere ime ungure u maribe pi na ibal kobe tongwa kanebina, ena di maribe ere kere di i ibal kobe tobinga. Na ibal kobe mile Abe God te yalini Wan Yesu Kirisito bole pena gale milebinga mere, i ibal kobe pena gale na ibal kobe tenana dire, na kane pirebinga kere di maribe ere i ibal kobe tobinga. Na ibal kobe te i yal kobe para miriin wen painama dire, ka minin ganin bile i ibal kobe tongwa.

Na ibal kobe nomanin naabilungwa kol ware milabinga

Ena ibal nomanin kama sungwa mere, God iru wen ta milekire yalini nomanin naabile aw dungure milemue. Ka main paangwa i, Yesu Kirisito di na ibal kobe tongure, pirere kere di maribe ere i ibal kobe tobinwe. Na ibal kobe nomanin kama sungwa ware mile, “God bole pena gale milebinwa,” dirabinga, ena kakiibi dire God ka main wiina ere tekerabinwe. Dimba ibal kobe nomanin naabilama dire, God aw di ibal kobe tongwa, na ibal kobe iru nomanin naabilangwa, ena bole pena gale na ibal kobe inin inin terabingire, God Wan Yesu mayan garu di na tere na ibal kobe kal digan ere taalime erebinga, yalini kire di eramue.

Na ibal kobe mile, “Kal digan ere taalime ta erekungwa ibal milebinwa,” dirabina, ena na inan milebinga mere paikungwa pire ka main pire nomanin suna ta yekebinwe. God, “Kal iru eralwa,” dungwa mere erungwa, te kal main wai paangwa kal para eremue. Yalini iru ere milungwa, kal digan ere taalime erebinga, di maribe erabinga, ena yalini pirin i gule erere, te main paikungwa kal erebinga para kire di ere na tenangure u wai nabinwe. 10 Na ibal kobe mile, “Kal digan ere taalime ta erekibinwa,” dirabina, ena “God kakiibi dimua,” dungwa mere dirabinwe. Dire yalini ka main pire nomanin suna ta yekirabinwe.

Copyright information for `GVF