Hebrews 1

God ka dungwa yalini Wan i maribe erungwa

Ena goma God ka di yalini ka kebe yal kobe tongure, yalin kobi ka iray kwi si aine di na ibal kobe sanamoi gilekume tomue. Ka di ka kebe yalin kobi tongwa main iwe, kamin kaun binanbile di yalin kobe tere, te main ta ta para erungwa, di maribe ere yalin kobi tomue. Di tomba kamin kaun wei sinangwa kaun, malia yalini Wan ka di tongure, si aine di na tomue. Te God kalkan para muru ere yongwa, God inin Wan, “Konagi iray ero,” di tomue. Yalini Wan kalkan para muru kobaan milama dire, God yalini paale suna ere imue. Te yalini Wan milungwa mere main iwe. God naabile aw dungwa mere, yalini para iru naabile aw dimue. Te God milungwa mere, yalini iru wen si paale ire milemue. Te kalkan para muru imo di paangwal paangwa, yalini yobilaan bile ka dungwa main iru paimue. Ibal kobe kal digan ere taalime erungwa, pirin gule ere terala dire gulungure, ena yalini kamin ai pire naanin wen paangwa yal, God guman mina amin di milemue.

God inin Wan angel kobe yaa ime si tongwa

God Wan kaan ye tongure, kaan iray maa kora kule paamue. Angel kobe kaan bil paangure pare, God yalini kaan aa yebe di ye minin mina ibe eremue. Ena ka iru di tega main iwe. God mile, “Na Wanan milinwa,” dire ka iru di angel kobe ta tekungwa inin Wan tawle di tomue. Di tongwa God ka iru dungwa,

“I na Wanan milinga, malia na i kulere, i Nenin na taran miliwa.”
Dire yalini Wan pire ka iru dungwa,

“Yalini Nen na milalga, te na Wanan yalini milamua.”
God yalini Wan kominin nusi gariba gul erala di ere milungwa kaun God ka iru dungwa,

“Na angel kobe para muru ana dire deminin si Wanan tenangwa paamua.”
Angel kobe mile pai erungwa mere, God ka di ime ere iru dungwa paangwa,

“Gwi maare gin taran ongure, te enderin dere kal para de taa ongwa mere, angel kobe nil konagi iru ere teiwa.”
Angel kobe mile pai erungwa mere ka iru dimba, yalini Wan milungwa mere ka iru dungwa,

“God yo, i kenin ere ke mile milangal milanwa. Main kirara kawen paangwa mere pire, kenin ere ke mile milinwa.
Ibal kabin sire kal wai ere milungwa, i wai kane tenba, ibal kal piril sungwa ere milungwa, nigi de pire tenwa. Iru ere milinga, ena ibal kobe wai pirimba, i wai wen pire miriin painana dire, i Nenin God i paale suna ere imua.”
10 Dire ka kwi ainere iru dungwa paangwa,

“Singabo, kalkan ta ole ere yekebinga kaun, i gariba gul ere yenwa. Te i inin anin mina kamin ere yenwa.
11 Kalkan para ere yenga kobi, kamin kaun ta kirara wei sinamba, i imo mile painangal painanwa. Gal bali sire u golin ongwa mere, kalkan kobi para iru namua. 12 Gal bege dire gal gule yongwa mere, kalkan kobi iru pisere ere ye paalinwa. Gal golin gule ere gal kwi si gi dungwa mere, kalkan kobi i pisere kalkan kwi ere yenanwa. Kalkan kobi main iru paamba, i goma milinga mere, malia i iru mile painangal painanga i ta gulekenanwa.”
13 God ka iru di angel kobe ta tekungwa,

“I u na gumanan mina amin di milo. Milangire i kayminin ibal yaa ime si tegire, i egilana dire, iru ere i teralwa.”
Ka iru di angel kobe ta tekimba, di yalini Wan tomue.
14 Ka iru dungwa paamia, ena angel kobe milungwa main iwe. Angel kobe ibal iban mere mile, God nil konagi ere tenama dire, God ibalin kobi nusi kole kole eremue. God mile, “Ibal aa te pilaan pai teralgire, sigare kule u wai pi milamua,” dungwa pire angel kobe ibalin kobi aa ki di tenama dire, God nusi kole kole eremue.

Copyright information for `GVF