Hebrews 3

Mose kaan aa te yebe erimba, Yesu kaan maa kora kule aa te yebe wen erungwa

Ena iru diga paamia, kabin sire dorimil mile nomanin naabilungwa ka main enan kobe, kamin ai God i bole milana dire, “I wo,” dire gala di i tomue. Yesu milungwa main i pire nomanin suna yeyo. Na ibal kobe ka main di gawa dibinga, Yesu ka main i kenin ere milungwa yal bil milama dire, God yalini nusi ime eremue. God gawliman kobe muru milungwa suna, Mose ka main konagi wai wen erungwa mere, God konagi Yesu, “Ero,” di tongwa, Yesu para pire wiina eremue. Yesu konagi iray erama dire, God yalini paale suna ere imue. Yal ta ogu kiingwa ibal kanere, “Ogu wai dimua,” dimba, ogu kiingwa yal i kaan aa te yebe wen eremue. Iru erungwa mere, ibal Mose kaan aa te yebe erimba, Yesu kaan aa te yebe wen erungwa kuunin paamue. Te ogu kiingwa main iwe, ogu ta ta para dungwa ibal kobe ogu iray kiimba, God kalkan para muru ere yomue. God gawliman kobe muru milungwa suna, Mose ka main konagi wai erere, te God eme ka ta di maribe erangwa mere di ibal tere, nil konagi iru ere God tomba, Kirisito nil konagi yal ta milekire God Wan milemia, ena yalini gawliman kobe para muru kenin ere ke milemue. Na ibal kobe God pi tegi yobinga, main i aa gi di pirabinga, te yalini kal wai ere na tenama di pire main i para aa gi di pirabinga, ena God gawliman kobe milabinwe.

Ibal kobe God ka dungwa pire wiina ta erekinangwa ibalin kobi God bole erin dorimil ta milekenangwa

Ena main paangwa i God Kegemama Iban ka iru di paalungwa paangwa,

“God ka dungwa malia piranga, ena goma ka dungwa pire wiina te erekinga mere, malia iru ta erekire, te girin di ta milekio. I ibal kobe gariba simi yongwa gul mile God ka dungwa pire wiina ta erekire, i yalini suan kaninga mere, i malia iru girin di milekio. God ka iru dungwa, ‘I sanamoi gilekume me erin yal sutan aan kawn muru na mile pai eriga main kanimba, ibalin kobi kal digan ere taalime erungwa na suan kanemua.’ 10 Kal iru eremia, ena na denan gule ibalin kobi tere ka iru diga, ‘Ibal kobe inin nomanin si pire kal ki ere warere, te na mile pai eriga mere, main i duulin bile ta warekimua.’ 11 Dire na maabinan mina aa taw sire ka iru diga, ‘Ibalin kobi ure na bole erin dorimil ta milekenamua.’”

Isirel ibal God ka dungwa pire wiina ta erekungwa mere na ibal kobe iru ta erekirabinga paangwa

12 Na ka main enan kobe, i ibal kobe milinga suna, ibal ta nomanin gule daalin sire ka main pire gi dikire, mun kal waa God tenangwa mere, ibal ta iru ta milekenama dire, i kanekun ere milo. 13 Ka main minin ganin bilungwa paangwa di i tega, “Malia dimua,” dungwa iwe. Dungwa ka main iray malia di i tomia, ena kal digan ere taalime eringa kela kule ka di i tenangwa, girin di ta milekenana dire, are kaun kaun inin inin aa ki di te ibeya ero. 14 Te Kirisito bole pena gale u taran pire milebilga main iwe. Goma na ibal kobe kawn kule Kirisito pi tegi yobinga, aa gi di pire milabingal milabinga main paamue. 15 Te ka main minin ganin main para iru dire bilungwa paangwa,

“God ka dungwa malia piranga, ena goma ka dungwa pire wiina ta erekinga mere ta erekire, te girin ta di milekio.”
16 Te ibena God ka dungwa pire wiina ta erekime? Ibal kobe Isipi piserungure Mose awli ungwa, ibalin kobi God ka dungwa pire wiina ta erekimue. 17 Me erin yal sutan aan kawn muru God ibena den gule tome? Ibal kobe kal digan ere taalime erungwa, yalini den gule ibalin kobe tongure, ibalin kobi ai simi yongwa gul mile gulemue. 18 God maabin mina aa taw sire, “Ibal kobe na bole erin dorimil ta milekenamua,” dungwa ibena milama dire, di bile dime? Yalini ka dungwa pire wiina ta erekungwa, ibal kan dimue. 19 Iru paimia ena ibalin kobi ka main pire gi ta dekungwa, God ibalin kobe bole erin dorimil ta milekungwa kanebinwe.

Copyright information for `GVF