Revelation of John 18

Bebilon ogu ai si suule i sutaw erungwa

Ena iru kanere pare, angel ta kamin ai pisere ere gariba gul ungwa kaniwe. Angel i yobilaan bil pai milere, inin naabile aw dungwa gariba gul para naabile tomue. Tere ure gala bil dire ka iru dungwa, “Bebilon ogu ai bilkaw iray si suule i sutaw eremua. Kirara suule i sutaw erungwa kaniwa. Malia sia te sia digan ogu ai bil iray pire ki pai milemua. Kauba dua kabe nongwa kauba iray, te kauba kal ki erungwa para, ain iray pi aan ye pai milemua. Ogu ain iray ibal kal piril sungwa erungwa, u sinaa di u gariba kole kole para omua. Gariba gul yal bil kobe pi abalini bole paire kunibe ingure, te abalini kalkan para kane daan gule irala dimia, ena aibe tobe erungwa yal kobe kobile moni te bona gana binanbile gure ire aa te nomua.”

Ena iru dungure, kamin ai ka ta ime ure iru dungwa,

“Na gawlimanan kobe, i ogu ai bil iray pisere ere mena wo. Gin taran wei di ere mena wo. Ibalin kobi kal digan ere taalime erungwa, i bole para ta erekinanga paamua. Te ibalin kobi gain giil pire milangure, i bole para ta pire milekenanga paamua.
Gariba mina kalkan aa taminin si yongwa, maa pi kamin mina ongwa mere, abalini kal digan ere taalime erungwa binanbile iru wen maa yebe omua. Kal ki iru erungwa, God kane gain giil pire tomua. Ibalin kobe kal digan ere i tongwa mere, maan iru ere ibalin kobi to. Ere tenanga, maa kora kule to. Gain giil pire i tongwa, i maan maa kora kule pire to. Ibalin kobi inin egin wai gale komina depil nongwa mere, i giil iru pire ibalin kobi to. Pire tenanga main iwe, ibalin kobi ka iru di milungwa, ‘Na ibal singaba bil milebinwa. Ibal binanbile u na kule milungwa, na inan ta milekebinwa. Te na kay mun bile yaare ta miikirabinwa.’ Ibalin kobi ka iru dimia, ena God kal ki ta ta ere ibalin kobi tenangwa, are kaun ta gin taran giil pire tenamua. Pire tenangwa iwe. Nibil ere terere, te inin kay mun bile yaare miinama dire, ere terere, te kenan bil gule ibalin kobi tenamua. Enderin bil denangure, ibalin kobi de taa namua. Ka kol ere ibalin kobi tongwa yal, God Singaba ere tenangwa main iwe, yalini naanin paire inin niminin wen milemua.”
Ena gariba gul yal bil kobe pi Bebilon ibal kobe bole paire irere, te kal piril sungwa iru erere, ogu ai iray enderin dere de taa ongwa kanere, kay mun bile yaare miinamue. 10 Ogu ai iray ibal giil bilkaw piremia, ena yalin kobi tayan mile kanere ka iru dungwa, “Eke, miriin pirie. Ogu ai bil Bebilon, God kaun tawle, gin taran ibalin kobe sire i sutaw ere giil pire tomua.”

11 Ena aibe tobe erungwa yal kobe bona gana kwi yekinangwa paamia, ena yalin kobi ogu ai iray pire kay mun bile yaare miimue. 12 Bona gana goma yongwa kal iwe, kobile gol yerere, te ain yobilagi ta kaan siliba yerere, te kobile tobe bil bilungwa yerere, te nil kabe ta milin ta tobe bil bilungwa kaan pel yerere, te gal wai wen dungwa yerere, te gal pilaan paire naanin paangwa yerere, te gal baa ta wai wen dungwa yerere, te eri palan balungwa wai dungwa yerere, te bolima kabe bil kaan elapant sigin bale ere yongwa yerere, te eri palan balungwa tobe bil bilungwa yerere, te ain yobilagi te kobile wai dungwa kalkan ere yongwa yerere, 13 te kal minanin wai sungwa kalkan kaan sinamon te kaa te ulgu paula te wel niriin, tobe bil bilungwa te paula ta yerere, te nil wain te eri niriin ta ibal nenangwa yerere, te komina birete palua te eri milin yerere, te bolimakau te bolima siipe siipe yerere, te bolima ausi te bolima ausi gure pala dungwa kal ain yobilagi yerere, te nil konagi yal abal para yerere, aibe tobe erungwa yal kobe goma kalkan iru yomba, malia kwi ta yekinangwa paamue. 14 Ta yekire aibe tobe erungwa yal kobe iru dinangwa, “I Bebilon ibal kalkan mun bile irala dinga, kal i kirara wei simua. I kulgal bona te kobile moni aa te nenga, te egin galinga kal para wei simua. Goma aa te nenga kal iray i kwi ta kanekinanwa.” 15 Dungure aibe tobe erungwa yal kobe ogu ai iray kalkan yere, te kalkan gibilin sire kobile moni binanbile gure ingwa, ogu ai ibal gain giil piremia, ena yalin kobi tayan ale mile kay mun bile yaare miire, 16 ka iru dinangwa, “Eke, miriin pirie. Ogu ai bil Bebilon, u sutaw ongwa kanebinga miriin pirie. Ogu ai iray ibalin kobi gal pege wai te gal nobe gi kulungwa te gal baa goma wai wen egin galere, te kobile gol te kobile tobe bil bilungwa, te nil kabe ta milin tobe bil bilungwa kaan pel, para egin wai galungwa, kal ali dungwa ire warimba malia i kano. 17 Kaun tawle gin taran ibalin kobe kulgal bona te kobile moni aa te nongwa, kirara wei simua.”

Ena sipe nen kobe para te sipe ongwa ibal te sipe konagi erungwa ibal, ibal para nil minimina ware konagi erungwa, ibalin kobi tayan ale mile,
18 ogu ai iray enderin dere enegi bil maangwa kanere, gala dire ka iru dungwa, “Ogu ai bil iray dungwa, ogin ai bil ta kuunin ta dimo? Wen ta dikimua.” 19 Dire gariba mai kaure simil kay miire, te kay mun bile yaare miire iru dungwa, “Eke, miriin pirie. Ogu ai bil, Bebilon u sutaw ongwa kanebinga miriin pirie. Sipe kobaan pirin nil minimina ware konagi erungwa, ogu ai iray pire kobile moni binanbile ire ire eremua. Erungwa ai iray kaun tawle gin taran kalkan para muru wei simua,” dire kay miimue.

20 Ena ogu ai iray si suule u sutaw omia, ena kamin ai ibal milinga, wai pire miriin payo. Ai taran i kal ki ere i tongwa, God ka kol ere tere giil pire tomia, ena God ibalin gawliman te nusi erungwa ongwa ibal, Aposel, te ka kebe ibal, i ibal kobe wai wen pire miriin payo.

21 Ena kal main iru wei sungure, angel ta naanin wen paangwa, kobile milin bilkaw wen aa tere pusi pirin nil ali erere ka iru dungwa, “Na kobile iray pusi eriga mere, ogu ai bil Bebilon iru si suule u sutaw nangure, ibal ain iray kwi ta kanekinamua. 22 Ogu ai iray ali gita dungwa mere kaan kaap ta sekenangure, te pu mugu ama ta sekenangure, te bu mugu dungwa ama bu ta dikinamua. Kal miremil erungwa yal ta ta para ogu ai i ala konagi ta erekinangure, te dodal milin si darawal dungwa ama ta dikinamua. 23 Enderin derin ogu ai iray para ta dekenangure, te yal abal gibilin si ire wai pire miinin maangwa mere, iru ta erekinamua. Aibe tobe erungwa yal kobe ogu ai iray milungwa, yalin kobi yobilaan bile niminin mile milungure, te ogu ain iray ibal kankiray erere gariba gul ibal para bawle tomua.” Dire angel iru dimue.

24 God ka kebe yal kobe te yalini ibalin gawliman kobe ogu ai iray ala si gulemia, ena God giil pire Bebilon ibal kobe tomue. Iru si gulungwa tawle tamama, ibal para ogu ai iray ala si gulemue.

Copyright information for `GVF