Revelation of John 22

Nil ta te eri ta nere mile painangwal painangwa main dungwa

Ena angel ta ogu ai iray i maribe ere na tongwa milere nil nuule ta ibal nil iray nenangwa, mile painangwal painangwa yalini para i maribe ere na tomue. Nil nuule yaangwa iwe, nilniminin naabile aw dungwa mere, nil iray iru naabile aw dungure, te nuule iray nil gibilin God te Bolima Siipe Siipe Gawlin kenin ere ke milungwa bol suna nil iray umue. Urere ogu ai kombil suna umue. Nil nuule binan kole ibe te kolia kwi milungwa eri ta maare dimue. Eri iray me erin taran milin ginin anan kole kole muru kawnan milin sutan morin morin kulemue. Ba gire yongwa yongwa mere kule omue. Gariba gul bilin ibal ta ta para u wai pi milama dire, eri iray arin kabe madasin mere dimue. God kalkan nigi de kanungwa kalkan i, ogu ain iray ala ta dekenamue.

God te Bolima Siipe Siipe Gawlin kenin ere ke milungwa bol ogu ain iray ala dinamia, ena God nil konagi ibal ana dire deminin si yalini tenamue.
Ibalin kobe yalini guman kanangure, te yalini inin kaan ibalin kobi maabin mina bile paalamue. Te kamin kwi ta gire si bilekenangure, te kewa ta galekinangure, te are ta sekenamue. Main iru u maribe nangwa iwe, God Singaba aw di ibalin kobi tenangure, yal bil kenin ere ke mile milungwa mere, ibalin kobi inin yal bil mere mile, milangwal milamue.

Yesu gin taran unangwa

Ena angel iray ka iru di na tongwa, “Na kawen di i teralga, ibal ka iray pire pi tegi yenangwa paamua. Te God Singaba yalini inin Iban ka kebe yal tongwa kalkan taw gin taran u pilau dinangwa, God nil konagi ibal pirama dire, yalini inin angel ta nusi eremua.”

Te Yesu ka iru dungwa paangwa, “I piro, na uralga kaun u maala omua. ‘Kalkan u maribe namua,’ dire Yon buku ta iru bile ka di maribe erungwa, ibal kobe ka iray pire wiina erangwa, ena ibalin kobi wai pire miriin painamua.”

Ena na Yon mile kal para kan diga i, kaya pi kaniwe. Na kane wei sirere pare, angel kal iray di maribe ere na tongwa, na yalini kawn mina yaa gobin bile ana dire deminin si yalini terala di eriiba, yalini ka iru di na tongwa, “I kal iru ere na tekio. I te ka kebe yal kobe ka main enin kobe nil konagi ere Yesu tere, te ka minin ganin buku iray bile paalungwa, pire wiina eringa mere, na para iru milia, ena ana dire deminin si God to.” 10 Dire ka ta iru di na tongwa, “‘Kalkan u maribe namua,’ dire buku ta i, i di maribe erana dire i tongwa, i aal kulekio. Kalkan i u maribe nangwa kaun u maala omia, ena i aal ta kulekire di maribe ere to. 11 Kalkan i u maribe nangwa u maala omia, ena ibal kobe kal ki ere milungwa, ibalin kobi iru ere milangwa paangure, te ibal kobe kal piril sungwa ere milungwa, ibalin kobi iru ere milangwa paamba, ibal kobe kal wai ere milungwa, ibalin kobi iru ere milangwa paangure, te ibal kobe kabin sire kal wai ere milungwa, ibalin kobe iru ere milangwa paamua.”

12 Ena Yesu ka iru dungwa, “Ka dirala piro. Na kwi uralga kaun u maala omua. Ibal kobe mile pai erungwa mere, na kanere tobe kuunin maan terala dire uralwa. 13 Kalkan para muru main na miliga, te kalkan kawn kule erungwa, na kalkan i para eriga, te kalkan kirara wei sungwa, na kalkan i para eriga yal na miliwa.”

14 Kwi milungwa eri milin nerala dire, te ogu ain iray kana giran pi ala nala dire, ibal kobe galsuna bigin sungwa mere, God ka dungwa pire wiina eremue. Iru ere milungwa ibal, wai pire miriin painamue. 15 Dimba ogu ain iray mena kol milungwa ibal iwe, awi biin ele paangwa mere milungure, te kankiray erungwa ibal milungure, te yal abal kunibe ingwa ibal milungure, te yal abal si gulungwa ibal milungure, te galbale kobile ana dire deminin si tongwa ibal milungure, te kakiibi di wai pirungwa ibal milungure, ibal iru ogu ain mena kol milamue.

16 “Ena na Yesu mile ka main ibal taminin ta ta para ka dungwa i, pirama dire, na inan angel ta nusi ime eriwa. I sanamoi Debiti yalini komin kanin na milere, te yalini gawlin na para miliwa. Te kulmama kwimile taanima de dungwa, Mebil iray de dungwa mere, na mile aw di i te miliwa.”

17 God Iban te ka main ibal taminin Yesu Kirisito pire gi di tongwa ibal para, “Pire gi di Yesu tenana wo,” dimue. Te ibal para ka dungwa i pirangwa, ibalin kobi para, “Pire gi di Yesu tenana wo,” dimue. Nil ta ibal nil iray nenangwa, mile painangwal painamue. Ibal ta nil iray gule te nil iray nerala dinangwa, ena yalini nil iray imore nenana wo. Nenangwa sigare kule u wai namue.

18 Ena na Yon mile i kiranin aa tere ka niminin mile di i terala piro. “Kalkan ta eme u maribe namua,” di i tega i piringa, ena yal ta mile, “Yon ka dungwa paimba, na main taw ama di maribe ere i teralwa,” dire yalini kal main gogo ta iru eramia, ena, “God giil obin dongwa tenamua,” diga mere, God kal iru ere yal iray tenamue. 19 Te “Kalkan u maribe namua,” dire buku ta i di maribe eriga, yal ta mile, “Yon ka dungwa i paikimua,” dinangwa, ena yal iray kwi milungwa eri milin ta nekire, te God ogin ain iray pi ala ta pekenama dire, God kal main iru ere yalini tenamue. Iru ere tenangwa mere iwe, ka minin ganin bile i tega, ka iray bile i teiwe.

20 Ena ka di i ibal kobe tega, kobaan yal i ka iru dungwa, “Owa, na gin taran ere ime uralwa.” Dungure Yesu Singaba i kawen dinga, ena para, i kwi ere ime wo.

21 Yesu Singaba kenin wai ere God ibalin gawliman para tenama di piriwe.

Copyright information for `GVF