Judges 10

ወቆመ ፡ እምድኅረ ፡ አቢሜሌክ ፡ ዘያድኅኖሙ ፡ ለእስራኤል ፡ ቶላ ፡ ወልደ ፡ ፉሐ ፡ ወልደ ፡ እኁሁ ፡ ለአቡሁ ፡ ብእሲ ፡ ዘእምነ ፡ ይስካር ፡ ወውእቱሰ ፡ ይነብር ፡ ውስተ ፡ ሰማርያ ፡ ውስተ ፡ ደብረ ፡ ኤፍሬም ። ወኰነኖሙ ፡ ለእስራኤል ፡ ዕሥራ ፡ ወሠለስተ ፡ ዓመተ ፡ ወሞተ ፡ ወተቀብረ ፡ ውስተ ፡ ሰማርያ ። ወቆመ ፡ እምድኅሬሁ ፡ ኢይእር ፡ ገላአዳዊ ፡ ወኰነኖሙ ፡ ለእስራኤል ፡ ዕሥራ ፡ ወክልኤተ ፡ ዓመተ ። ወቦ ፡ ሠላሳ ፡ ወክልኤተ ፡ ደቂቀ ፡ ወይጼዐኑ ፡ ላዕለ ፡ ሠላሳ ፡ ወክልኤቱ ፡ አእዱግ ፡ ወቦሙ ፡ ሠላሳ ፡ ወክልኤቱ ፡ አህጉረ ፡ ወሰመዮን ፡ ዳብራተ ፡ ዘኢያኢር ፡ እስከ ፡ ዮም ፡ ወሀለዋ ፡ ውስተ ፡ ገላአድ ። ወሞተ ፡ ኢያኢር ፡ ወተቀብረ ፡ ውስተ ፡ ረሞ ። ወደገሙ ፡ ደቂቀ ፡ እስራኤል ፡ ገቢረ ፡ እኩይ ፡ ቅድመ ፡ እግዚአብሔር ፡ ወአምለክዎ ፡ ለበዓልም ፡ ወለአስጠሮት ፡ ወአማልክተ ፡ ሶርያ ፡ ወአማልክተ ፡ ሲዶና ፡ ወአማልክተ ፡ ሞአብ ፡ ወአማልክተ ፡ ደቂቀ ፡ ዐሞን ፡ ወአማልክተ ፡ ኢሎፍሊ ፡ ወኀደግዎ ፡ ለእግዚአብሔር ፡ ወኢተቀንዩ ፡ ሎቱ ። ወተምዕዐ ፡ መዐተ ፡ እግዚአብሔር ፡ ላዕለ ፡ እስራኤል ፡ ወአግብኦሙ ፡ ውስተ ፡ እደ ፡ ኢሎፍሊ ፡ ወውስተ ፡ እዴሆሙ ፡ ለደቂቀ ፡ ዐሞን ። ወሣቀይዎሙ ፡ ወአጠቅዎሙ ፡ ለደቂቀ ፡ እስራኤል ፡ በማዕዶተ ፡ ዮርዳንስ ፡ በምድረ ፡ አሞሬዎን ፡ በገላአድ ። ወዐደው ፡ ደቂቀ ፡ ዐሞን ፡ ዮርዳንስ ፡ ይትቃተልዎሙ ፡ ለይሁዳ ፡ ወለብንያም ፡ ወለቤተ ፡ ኤፍሬም ፡ ወተሣቀዩ ፡ ደቂቀ ፡ እስራኤል ፡ ጥቀ ። 10 ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ፡ ወይቤሉ ፡ አበስነ ፡ ለከ ፡ እስመ ፡ ኀደግናከ ፡ አምላክነ ፡ ወአምለክናሆሙ ፡ ለበዓልም ። 11 ወይቤሎሙ ፡ እግዚአብሔር ፡ ለደቂቀ ፡ እስራኤል ፡ አኮኑ ፡ ግብጽ ፡ ወአሞሬዎን ፡ ወደቂቀ ፡ ዐሞን ፡ ወሞአብ ፡ ወኢሎፍሊ ፤ 12 ወሲዶና ፡ ወምድያም ፡ ወዐማሌቅ ፡ ሣቀዩክሙ ፡ ወገዐርክሙ ፡ ኀቤየ ፡ ወአድኀንኩክሙ ፡ እምእዴሆሙ ። 13 ወአንትሙሰ ፡ ኀደግሙኒ ፡ ወአምለክሙ ፡ ባዕደ ፡ አማልክተ ፤ በበይነ ፡ ዝንቱ ፡ ኢያድኅነክሙ ። 14 ሑሩ ፡ ጽርሑ ፡ ኀበ ፡ አማልክት ፡ እለ ፡ ኀሬክሙ ፡ ለክሙ ፡ ወያድኅኑክሙ ፡ በመዋዕለ ፡ ምንዳቤክሙ ። 15 ወይቤልዎ ፡ ደቂቀ ፡ እስራኤል ፡ ለእግዚአብሔር ፡ አበስነ ፡ ረስየነ ፡ ዘከመ ፡ ትፈቅድ ፡ ቅድሜከ ፡ ወባሕቱ ፡ እግዚኦ ፡ አድኅነነ ፡ በዛቲ ፡ ዕለት ። 16 ወአሰሰሉ ፡ አማልክተ ፡ ባዕድ ፡ እምነ ፡ ማእከሎሙ ፡ ወአምለክዎ ፡ ለእግዚአብሔር ፡ ወአሥመርዎ ፡ ወዐንበዙ ፡ እምነ ፡ ሥቃይ ፡ እስራኤል ። 17 ወዐርጉ ፡ ደቂቀ ፡ ዐሞን ፡ ወኀደሩ ፡ ውስተ ፡ ገላአድ ፡ ወወፅኡ ፡ ደቂቀ ፡ እስራኤል ፡ ወኀደሩ ፡ ውስተ ፡ ምድረ ፡ መሴፋ ። 18 ወተባሀሉ ፡ መላእክተ ፡ ሕዝበ ፡ ገላአድ ፡ በበ ፡ በይናቲሆሙ ፡ መኑ ፡ ብእሲ ፡ ዘይእኅዝ ፡ ይትቃተሎሙ ፡ ለነ ፡ ለደቂቀ ፡ ዐሞን ፡ ወይኩን ፡ ርኡሰ ፡ ለኵሉ ፡ እለ ፡ ይነብሩ ፡ ውስተ ፡ ገላአድ ።
Copyright information for Geez